કૃતિ વર્મા કોણ છે ? જે ટેક્સ ઓફિસરમાંથી બની એક્ટ્રેસ, 263 કરોડના ઘોટાળામાં આવ્યું હવે નામ

Kriti Verma tax scam : જેકલીન ફર્નાન્ડિઝ અને નોરા ફતેહી બાદ મની લોન્ડ્રીંગ કેસમાં વધુ એક એક્ટ્રેસનું નામ સામે આવ્યું છે. આયકર અધિકારીનું પદ છોડી એક્ટ્રેસ બનેલી કૃતિ વર્મા વિરુદ્ધ ઈડીએ 263 કરોડ રૂપિયાના મની લોન્ડ્રીંગ કેસમાં તપાસ શરૂ કરી દીધી છે. રોડીઝ અને બિગ બોસ સીઝન 12 જેવા ટીવી શોમાં દેખાઈ ચૂકેલી કૃતિ વર્મા પર આરોપ છે કે, તેણે ટેક્સ રિફંડ જાહેર કરવાના નામે આવકવેરા વિભાગ સાથે છેતરપિંડી કરી છે અને સમાન ગુનાઓમાં સામેલ મુખ્ય આરોપીઓ સાથે સંબંધ છે. જે બાદ હવે EDએ કૃતિને પૂછપરછ માટે સમન્સ પાઠવ્યું છે.

EDએ તપાસ શરૂ કરી

હકીકતમાં, વર્ષ 2022 માં, સેન્ટ્રલ બ્યુરો ઑફ ઇન્વેસ્ટિગેશન (CBI) એ પનવેલના બિઝનેસમેન ભૂષણ અનંત પાટીલ, આવકવેરા વિભાગના વરિષ્ઠ ટેક્સ સહાયક તાનાજી મંડલ અધિકારી સહિત ઘણા લોકો સામે છેતરપિંડી કરીને ટેક્સ રિફંડ જારી કરવા બદલ કેસ નોંધ્યો હતો. સીબીઆઈએ આ મામલે દિલ્હીમાં એફઆઈઆર નોંધી હતી. જેમાં વર્ષ 2007-08 અને 2008-09ના બનાવટી રિફંડ ઈશ્યુ કર્યાની ફરિયાદ કરવામાં આવી હતી. આ જ FIRના આધારે EDએ PMLA હેઠળ તપાસ શરૂ કરી છે.

શું છે મામલો?

અનંત પાટીલના બેંક ખાતા સિવાય અન્ય કેટલાક બેંક ખાતાઓમાં પૈસા ટ્રાન્સફર કરવામાં આવ્યા હતા. તપાસ મુજબ, તાનાજી સર્કલ ઓફિસર દ્વારા 15 નવેમ્બર 2019 અને 4 નવેમ્બર 2020 વચ્ચે રૂ. 263.95 કરોડના 12 બોગસ TDS રિફંડ જાહેર કરવામાં આવ્યા હતા. છેતરપિંડીથી મેળવેલ રિફંડ નાણા સંબંધિત વ્યક્તિઓ, પાટીલ, સંસ્થાઓ અને શેલ કંપનીઓના બેંક ખાતામાં ટ્રાન્સફર કરવામાં આવ્યા હતા.

EDનું કહેવું છે કે, મોટા ભાગના ગેરકાયદે નાણાં ભૂષણ પાટીલના ખાતામાં મોકલવામાં આવ્યા હતા અને એક ભાગનો ઉપયોગ મિલકતો ખરીદવા માટે કરવામાં આવ્યો હતો. આ પૈસાથી ખરીદાયેલી કેટલીક પ્રોપર્ટી કૃતિ વર્માના નામે પણ હતી. જોકે, કૃતિ વર્માએ આ આરોપોને નકારી કાઢ્યા હતા. તેણે કહ્યું કે, પાટીલ સાથે સંબંધ બાંધતા પહેલા તેણે ડાન્સ પરફોર્મન્સ આપ્યું હતું. તે પ્રદર્શન માટે તેને 1 કરોડ રૂપિયા ચૂકવવામાં આવ્યા હતા.

કોણ છે કૃતિ વર્મા?

કૃતિ વર્માનું કહેવું છે કે, 2020ના અંતમાં એક ડાન્સ શો દરમિયાન પાટીલને મળ્યા બાદ તેણે પાટીલ સાથે સંબંધ બન્યો. કૃતિએ કહ્યું કે, એક જવાબદાર નાગરિક તરીકે તેણે આરોપીઓ વિરુદ્ધ તમામ માહિતી આપીને એજન્સીઓને મદદ કરી. કૃતિએ દાવો કર્યો હતો કે, છેતરપિંડી વિશે જાણ થતા જ 6 મહિનામાં જ તે ભૂષણ પાટિલથી અલગ થઈ ગઈ હતી.

અભિનેત્રી બનતા પહેલા કૃતિ વર્મા ગુડ્સ એન્ડ સેલ્સ ટેક્સ (GST) ઈન્સ્પેક્ટર હતી. વર્ષ 2018માં રોડીઝમાં સિલેક્શન બાદ તેણે સરકારી નોકરી છોડી દીધી હતી. કૃતિએ બિગ બોસની 12મી સિઝનમાં પણ ભાગ લીધો હતો. તેણીને ઘણી વેબ સીરીઝની ઓફર મળી અને ડાન્સ શો પણ મળ્યા. આ ડાન્સ શો દરમિયાન કૃતિની મુલાકાત બિઝનેસમેન ભૂષણ પાટીલ સાથે થઈ અને થોડા સમય પછી બંને રિલેશનશિપમાં આવી ગયા.