Bilkis Bano Case : સુપ્રીમ કોર્ટે બિલકિસ બાનોની રિવ્યુ પિટિશન ફગાવી દીધી છે. આ અરજીમાં બિલકીસ બાનોએ મે મહિનામાં આપેલા સુપ્રીમ કોર્ટના એ આદેશને પડકાર્યો હતો, જેમાં ગુજરાત સરકારને 1992ના જેલ નિયમો હેઠળ 11 દોષિતોને મુક્ત કરવાની મંજૂરી આપવામાં આવી હતી.
આ અરજીમાં બિલકિસ બાનોએ તેના દોષિતોને મુક્ત કરવાનો વિરોધ કર્યો હતો. બાનોએ તેની અરજીમાં 2002માં તેના પર સામૂહિક બળાત્કાર અને તેના પરિવારના સભ્યોની હત્યા માટે દોષિત 11 લોકોની વહેલી મુક્તિને પડકારી હતી.
સુપ્રીમ કોર્ટે જલ્દી સુનાવણી કરવાનો ઇનકાર કર્યો હતો
અગાઉ, સુપ્રીમ કોર્ટે આ અરજી પર વહેલી સુનાવણી કરવાનો ઇનકાર કર્યો હતો. બિલ્કિસ બાનો તરફથી હાજર રહેલા એડવોકેટ શોભા ગુપ્તાએ ચીફ જસ્ટિસ ડીવાય ચંદ્રચુડ અને જસ્ટિસ પીએસ નરસિમ્હાની બેન્ચને વિનંતી કરી હતી કે, આ મામલાની સુનાવણી માટે બીજી બેન્ચની રચના કરવાની જરૂર છે. જેના પર CJI ચંદ્રચુડે કહ્યું, “રિટ પિટિશન સૂચિબદ્ધ કરવામાં આવશે. મહેરબાની કરીને એક જ વસ્તુનો વારંવાર ઉલ્લેખ કરશો નહીં.”
બિલકિસ બાનોએ સુપ્રીમ કોર્ટમાં રિવ્યુ પિટિશન દાખલ કરી હતી
બિલ્કિસ બાનોએ દોષિતની અરજી પર સુપ્રીમ કોર્ટ દ્વારા 13 મેના રોજ આપેલા આદેશની સમીક્ષાની માંગ કરી હતી. સુપ્રીમ કોર્ટે ગુજરાત સરકારને 9 જુલાઈ 1992ની નીતિ હેઠળ દોષિતોની સમય પહેલા મુક્તિની માંગ કરતી અરજી પર બે મહિનાની અંદર વિચાર કરવા જણાવ્યું હતું. ગુજરાત સરકારે 15 ઓગસ્ટ, 2022 ના રોજ તમામ 11 દોષિતોને તેમની સજા માફ કરીને મુક્ત કર્યા હતા.
સુપ્રીમ કોર્ટે લિસ્ટિંગ સામે ઘણી વખત વાંધો ઉઠાવ્યો હતો
આ પહેલા બુધવારે ચીફ જસ્ટિસ ઓફ ઈન્ડિયા (CJI) સમક્ષ બિલ્કીસ બાનોના કેસનો બે વખત ઉલ્લેખ કરવામાં આવ્યો હતો. વિનંતીઓને પગલે, તેમના દ્વારા દાખલ કરવામાં આવેલી બંને અરજીઓ મંગળવારે કોર્ટની બે અલગ-અલગ બેન્ચ સમક્ષ સૂચિબદ્ધ કરવામાં આવી હતી. જે બાદ CJIએ કહ્યું, “હંમેશા આ બાબતનો ઉલ્લેખ ન કરો. આ ખૂબ જ ટોર્ચર કરે છે. દરરોજ તમે એક જ મુદ્દાનો ઉલ્લેખ કરો છો.”
ગુજરાતમાં ગોધરા ટ્રેન સળગાવ્યા પછીના રમખાણો દરમિયાન બિલકીસ બાનો પર સામૂહિક બળાત્કાર થયો હતો અને તેના પરિવારના સાત સભ્યોની હત્યા કરવામાં આવી હતી. આ ઘટના સમયે બિલ્કીસ બાનો 21 વર્ષની હતી અને પાંચ મહિનાની ગર્ભવતી હતી. 21 જાન્યુઆરી 2008ના રોજ, મુંબઈની વિશેષ સીબીઆઈ કોર્ટે 11 દોષિતોને આજીવન કેદની સજા ફટકારી હતી. બાદમાં બોમ્બે હાઈકોર્ટ અને સુપ્રીમ કોર્ટે પણ તેની સજા યથાવત રાખી હતી.
આ પણ વાંચો – બિલકિસ બાનોના વકીલની વારંવારની અરજી પર સુપ્રીમ કોર્ટ ભડકી, જાણો શું હતું કારણ
આ કેસમાં દોષિત ઠરેલા 11 લોકોને 15 ઓગસ્ટના રોજ ગોધરા સબ જેલમાંથી મુક્ત કરવામાં આવ્યા હતા. ગુજરાત સરકારે રાજ્યની માફી નીતિ હેઠળ આ દોષિતોને મુક્ત કરવાની મંજૂરી આપી હતી.
