ગુજરાતના પૂર્વ મુખ્યમંત્રી વિજય રૂપાણીએ (Vijay rupani) મુખ્યમંત્રી પદેથી રાજીનામું આપવાને લઇ મોટો ખુલાસો કર્યો છે. રાજીનામું આપ્યાના એક વર્ષ બાદ વિજય રૂપાણીએ કહ્યું છે કે, ‘તેમને બીજેપીના “હાઈ કમાન્ડ” દ્વારા આગલી રાત્રે જ રાજીનામું આપવાનું કહેવામાં આવ્યું હતું. મેં આ નિર્ણયને લઇ એક પણ સવાલ અથવા તો કારણ પૂછ્યા વગર રાજીનામું આપી દીધું હતું. તેમજ મને કારણ પણ જણાવવામાં આવ્યું નથી. પરંતુ મેં બીજેપીના નિર્ણયનું સન્માન કરતા ખુશી ખુશી CM પદેથી રજીનામું આપી દીધું હતું. કારણ કે હાઇકમાન્ડનો નિર્ણય હંમેશા ફાઇનલ જ હોય છે’.
વિજય રૂપાણીની રાજીનામાને લઇ વાતચીતધ ઇન્ડિયન એક્સપ્રેસના ઇન્ટરવ્યૂમાં વિજય રૂપાણીએ કહ્યું કે, ‘બીજેપી હાઇકમાન્ડે રાજીનામું આપ્યાની આગલી રાત્રે જ જણાવ્યું હતું કે, તમારે CM પદેથી રાજીનામું આપવું પડશે. ત્યારબાદ મેં તેના બીજા જ દિવસે મુખ્યપ્રધાન પદેથી રાજ્યપાલને રાજીનામું ધરી દીધું હતું. વિજય રૂપાણીએ 11 સપ્ટેમ્બર 2021ના રોજ CM પદેથી રાજીનામું આપ્યું હતું’.
હું હંમેશા પાર્ટીનો શિસ્તબદ્ધ કાર્યકર્તા રહ્યો છું: વિજય રૂપાણીઇન્ટરવ્યૂ આગળ ધપાવતા વિજય રૂપાણીએ વધુમાં જણાવ્યું કે, ‘હું હંમેશા પાર્ટીનો શિસ્તબદ્ધ કાર્યકર્તા રહ્યો છું અને પાર્ટીના દરેક આદેશોનું પાલન કર્યું છે. જ્યારે પાર્ટીએ મને ગુજરાતના મુખ્યમંત્રી બનાવવાનો નિર્ણય લીધો હતો તો હું એ નિર્ણયથી પણ સહમત થઇ ગયો હતો અને જ્યારે મુખ્યમંત્રીના પદેથી રાજીનામું આપવાનો નિર્ણય લેવાયો તે સમયે પણ મેં ખુશી ખુશી રાજીનામું આપી દીધું હતું. આ ઉપરાંત વિજય રૂપાણીએ જણાવ્યું કે, હું ક્યારેય પાર્ટીની વિરુદ્ધ ગયો નથી અને એટલે જ મેં હસતા હસતા CM પદેથી રાજીનામું આપી દીધું હતું.
હું મારી જાતને ભાગ્યશાળી માનું છું: વિજય રૂપાણીવિજય રૂપાણીને ગુજરાતના ટોચના પદેથી હટાવ્યાના એક વર્ષ પછી બીજેપીએ તેમને પંજાબના પ્રભારી તરીકે નિયુક્ત કર્યા છે. રૂપાણી તેના નવા કાર્યને રાષ્ટ્રીય રાજનીતિમાં તેમની ઉન્નતિ અને એક નવા અંદાજના રૂપમાં જોવે છે. જેને લઇને વિજય રૂપાણીએ જણાવ્યું હતું કે, “હું મારી જાતને ભાગ્યશાળી માનું છું કે પાર્ટીએ મને પહેલા શહેર સ્તરે પછી પ્રદેશ સ્તરે જનતાની સેવા કરવાનો લાભ આપ્યો અને મેં તે પ્રમાણે કામ કરવાનો પૂરતો પ્રયાસ કર્યો છે. મને રાજ્યસ્તર પર ચાર વર્ષ માટે મહાસચિવની જવાબદારી સોંપવામાં આવી હતી અને આખરે મને મહત્વની જવાબદારી એટલે કે ટોચનું સ્થાન મુખ્યમંત્રી બનાવવાનો નિર્ણય લેવાયો હતો. આ સિવાય વિજય રૂપાણીએ પ્રદેશ પ્રમુખની ભૂમિકા પણ નિભાવી છે. ત્યારે સ્વાભાવિક છે કે, મારી સેવા અને મારા અનુભવનો ઉપયોગ હવે રાષ્ટ્રીય સ્તરે કરવામાં આવશે.
વિધાનસભાની ચૂંટણીમાં ઉંડો રસ લેશે: વિજય રૂપાણી
ભારતીય જનતા પાર્ટીના દ્રષ્ટિકોણથી પંજાબ નબળું રાજ્ય છે. એવામાં પાર્ટીએ મને પંજાબના પ્રભારી તરીકે જવાબદારી સોંપી છે. ત્યારે પાર્ટી મારી પાસેથી સારા પરિણામની અપેક્ષા રાખે છે. પાર્ટીએ મારા પર વિશ્વાસ દાખવ્યો છે. જે મારા માટે અત્યંત મહત્વપૂર્ણ છે. વિજ્ય રૂપાણી આગળ કહે છે કે, મારી નવી જવાબદારીને હું એક પડકાર અને મારી તાકાતનું શ્રેષ્ઠ પ્રદર્શનની તક માનું છું. આ સાથે રૂપાણી ગુજરાત વિધાનસભાની ચૂંટણીને અનુલક્ષીને જણાવ્યું હતું કે, તેઓ વિધાનસભાની ચૂંટણીમાં ઉંડો રસ લેશે.
