Increase in salary of fixed salary employee in Gujarat : કેન્દ્રમાં મોદી સરકારે કેન્દ્રીય કર્મચારીઓના પગારમાં 4 ટકાનો વધારો કરવાની સાથે ગુજરાતની રાજ્ય સરકારે પણ ફિક્સ પગાર પર કામ કરતા કર્મચારીઓને દિવાળીની ખાસ ભેટ આપી છે. રાજ્ય સરકારે ફિક્સ પગાર કર્મચારીઓના વેતનમાં સીધો 30 ટકાનો વધારો કરવાનો નિર્ણય લીધો છે.
તમને જણાવી દઈએ કે, આજે સીએમ ભૂપેન્દ્ર પટેલની અધ્યક્ષતામાં કેબિનેટ બેઠક મળી હતી, જેમાં રાજ્યના ફિક્સ પગારના તમામ કર્મચારીઓના હિતમાં એક મહત્વનો નિર્ણય લેવામાં આવ્યો છે. આ મામલે સરકાર વતી મંત્રી ઋષિકેશ પટેલે જાહેરાત કરતા જણાવ્યું હતું કે, ગુજરાતના વિકાસમાં રાજ્યના કર્મચારીઓનો ખુબ જ મહત્વનો ફાળો રહ્યો છે. દરેક સરકારી યોજનાઓના અમલીકરણ તથા તેના પર યોગ્ય દેખરેખ થકી છેવાડાના માનવી સુધી યોજનાકીય લાભ પહોંચાડવામાં કર્મચારીઓએ હંમેશા ચાવીરૂપ ભૂમિકા ભજવી છે. ત્યારે દિવાળી પૂર્વે લેવામાં આવેલા આ નિર્ણય રાજ્યના પ્રત્યેક ફિક્સ પગારના કર્મચારીઓ તથા તેમના પરિવારજનો માટે ખુશીની લહેર લાવશે તેવો વિશ્વાસ વ્યક્ત કર્યો હતો.
કેટલા કર્મચારીઓને લાભ મળશે? પગાર વધારો ક્યારથી લાગુ થશે?
મંત્રિ ઋષિકેષ પટેલના જણાવ્યા અનુસાર, રાજ્યમાં હાલમાં 61,560 કર્મચારીઓ ફિક્સ-પગાર આધારિત નોકરી કરી રહ્યા છે. જેમના વેતનમાં 30 % જેટલો વધારો કરવાનો નિર્ણય કરવામાં આવ્યો છે. જેની અમલવારી તા.1 લી ઓક્ટોબર 2023 ની અસરથી કરવામાં આવશે. તેમણે કહ્યું કે, આ નિર્ણયથી રાજ્ય સરકારની તિજોરી પર વાર્ષિક રૂ.548.64 કરોડ રૂપિયાનું ભારણ પણ વધશે.
આ પણ વાંચો – DA Hike News : દિવાળી પહેલા સરકારી કર્મચારીઓને મોટી ભેટ, DAમાં 4 ટકા વધારાની જાહેરાત, સમજો કેટલો પગાર વધશે?
સમજો – તમારા ગ્રેડ પે આધારિત – કોનો કેટલો પગાર વધશે
મંત્રીએ આ મામલે વધારે માહિતી આપતા કહ્યું કે, વર્ગ-3 ના 4400 ગ્રેડ પે ધરાવતા કર્મચારીઓનો પ્રવર્તમાન માસિક ફિક્સ પગાર રૂ. 38,090 થી વધીને રૂ. 49,600 થશે. ઉપરાંત વર્ગ-3 ના 4200 અને 2800 ગ્રેડ પે ધરાવતા કર્મચારીઓનો પ્રવર્તમાન માસિક ફિક્સ પગાર રૂ. 31,340 થી વધીને રૂ. 40,800 થશે. તો વર્ગ-3 ના 2400, 2000, 1900 અને 1800 ગ્રેડ પે ધરાવતા કર્મચારીઓનો પ્રવર્તમાન માસિક ફિક્સ પગાર રૂ. 19,950 થી વધીને રૂ. 26,000 થશે. જ્યારે વર્ગ-4 ના 1650,1400 અને 1300 ગ્રેડ પે ધરાવતા કર્મચારીઓનો પ્રવર્તમાન માસિક ફિક્સ પગાર રૂ. 16,224 થી વધીને રૂ. 21,100 થશે.
