ગુજરાતમાં ટ્રાફિક નિયમ ભંગમાં થશે કડક કાર્યવાહી, પોલીસ આપશે ઈ-ચલણ, જો દંડ ન ભર્યો તો જેલમાં પણ જવું પડશે

Gujarat Traffic E-Challan Rules : ભારતભરમાં માર્ગ સલામતી ઉજવણી શરૂ થઈ ગઈ છે. આ અંતર્ગત ગુજરાત સરકારે ટ્રાફિક નિયમનો ભંગ કરનારાઓ સામે કડક કાર્યવાહી કરવાનો નિર્ણય લીધો છે. ગુજરાત સરકારે એનઆઈસીના સહયોગથી ‘વન નેશન, વન ચલણ પ્રોજેક્ટ’ કર્યો છે. આ અંતર્ગત ટ્રાફિક નિયમ ભંગ કરનારને મોબાઈલ નંબર પર જ એસએમએસથી ઈ-ચલણ પ્રાપ્ત થશે, જે 135 દિવસમાં ન ભરવામાં આવ્યું તો, કોર્ટ કાર્યવાહી થશે અને જેલની સજા પણ ફટકારવામાં આવી શકે છે.

હવે ટ્રાફિક નિયમનો ભંગ કરતા પહેલા વાહન ચાલકો ચેતી જજો, ટ્રાફિક પોલીસ હવે તમને નિયમ ભંગ કરતા સમયે સ્થળ પર જ ઈ-ચલણ ભરવાનો મોકો આપશે, જો તમે ન ભરો તો 90 દિવસમાં મોબાઈલ દ્વારા ઓનલાઈન ઈ-ચલણ ભરી શકશો, ત્યારબાદ વર્ચ્યુઅલ કોર્ટમાં કાર્યવાહી થશે, અને ત્યાં પણ 45 દિવસમાં દંડ ન ભર્યો તો, ફિઝિકલ કોર્ટમાં આ મામલે કેસ ચાલશે અને તમને જેલની સજા પણ થઈ શકે છે.

તમને જણાવી દઈએ કે, 15 જાન્યુઆરીથી 15 ફેબ્રુઆરી માર્ગ સલામતી ઉજવણી શરૂ કરવામાં આવી છે, આ સંદર્ભે રાજ્ય સરકાર અમદાવાદ, રાજકોટ, વડોદરા અને સુરત જેવા શહેરોમાં ટ્રાફિકની સમસ્યાને હળવી કરવા માટે ટ્રાફિકના નિયમોનું લોકો સારી રીતે પાલન કરે અને કોઈ સમસ્યા ન સર્જાય તે માટે એનઆઈસીના સહયોગથી ‘વન નેશન, વન ચલણ પ્રોજેક્ટ’ હેઠળ ટ્રાફિક નિયમ ભંગ કરનાર માટે ઈ-ચલણ એપ્લિકેશન જાહેર કરી છે. તો જોઈએ સરકાર દ્વારા નવા નિયમોમાં શું હશે.

ટ્રાફિક નિયમ ભંગ બદલ કઈ રીતે કાર્યવાહી થશે?

(1) ટ્રાફિક નિયમ ભંગ કરતા જ ટ્રાફિક પોલીસ ઈ-ચલણ આપશે, જે તમે સ્થળ પર જ ભરી શકો છો, અથવા તમને 90 દિવસમાં ભર દેવાનો મોકો મળશે.

(2) 90 દિવસમાં તમે ઈ-ચલણ ન ભર્યું તો, આ ચલણ વર્ચ્યુઅલ કોર્ટમાં ટ્રાન્સફર થશે, જયાં તમે 45 દિવસમાં દંડની રકમ ભરી શકશો

(3) જો 45 દિવસમાં વર્ચ્યુઅલ કોર્ટમાં પણ દંડ ન ભર્યો તો, ચલણ ફિઝિકલ કોર્ટમાં ટ્રાન્સફર થશે, અહીં તમને કોર્ટ સમન્સ મોકલી કોર્ટમાં હાજર રહેવા જણાવી શકે છે, અને કાયદેસરની કાર્યવાહી બાદ દંડ સાથે કોર્ટ સજા પણ ફટકારી શકે છે.

(4) ઈ-ચલણ જનરટ થતાની સાથે જ આરટીઓ પણ આ ચલણની ભરપાઈ અંગેની માહિતી જોઈ શકશે, જેથી તમે વાહન ટ્રાન્સફર કે વેચી નહીં શકો.

(5) ભારતના કોઈ પણ રાજ્યની ગાડી કોઈ પણ અન્ય જગ્યાએ નિયમોનું ભંગ કરશે તો તેને આ એપની મદદથી પોલીસ ઇ-ચલણ આપી શકશે, આ દેશભરના તમામ આરટીઓમાં જોઈ શકાશે, એટલે તે લોકો પણ દંડથી બચી નહી શકે.

(6) હેલ્મેટ, સીટ બેલ્ટ અને નો પાર્કિંગ ઝોનમાં વાહન પાર્ક કરવા બદલ ઈ ચલણ ફટકારવામાં આવશે.

આ પ્રોજેક્ટ લાગુ થયા પહેલા જેમણે દંડ નથી ભર્યા તેમનું શું થશે

આ મામલે અમદાવાદ પૂર્વ ઝોન ટ્રાફિક ડીસીપી સફીન હસને ધ ઈન્ડિયન એક્સપ્રેસ ગુજરાતી સાથે વાતચીતમાં જણાવ્યું હતું કે, જે લોકોને ‘વન નેશન, વન ચલણ પ્રોજેક્ટ’ લાગુ થયા પહેલા ટ્રાફિક નિયમ ભંગ બદલ ચલણ મળ્યા છે, તેમણે પણ દંડ તો ભરવો જ પડશે, જોકે, તે વાહન ચાલકો ‘વન નેશન, વન ચલણ પ્રોજેક્ટ’ના નિયમની જોગવાઈમાં હેઠળ નહી આવે. પરંતુ, આ વાહન ચાલકો પાસેથી પણ દંડ વસૂલવાની કાર્યવાહી ચાલુ જ છે, અને તેઓ દંડ નહીં ભરે ત્યાં સુધી આરટીઓમાં તેમનું વાહન ટ્રાન્સફર કે વેચી નહીં શકશે નહી.

આ પણ વાંચો – અમદાવાદ : પક્ષીને બચાવવા જતા ફાયર કર્મી હાઈ ટેન્શન વાયરના કરંટથી સ્થળ પર જ ભડથું થયો

ઉલ્લેખનીય છે કે, અમદાવાદ સહિત મોટા શહેરોમાં ટ્રાફિકની સમસ્યા દિવસેને દિવસે વધી રહી છે, સરકાર દ્વારા ટ્રાફિક હળવો કરવા માટે ઓવર બ્રિઝ, અંડર બ્રિઝ સહિતના પ્રોજેક્ટો પર કામ ચાલી રહ્યા છે. ઠેર ઠેર નો પાર્કિંગ ઝોનમાં પાર્કિંગ કરવાથી ટ્રાફિકની સમસ્યા વધી રહી છે. તમને જણાવી દઈએ કે, આ પહેલા તર્કશ એપ્લિકેશનથી ઈ ચલણ આપવામાં આવતા હતા. પરંતુ વર્ષે 6 થી 7 લોકોને ઈ ચલણ મોકલવા છતા માત્ર એક લાખ જેટલા લોકોએ જ ઈ ચલણ ભર્યા છે.