Gujarat Weather winter updates, winter forecast, ગુજરાત હવામાન ઠંડીની આગાહી : ગુજરાતમાં અત્યારે ઠંડીમાં બે તરફી વલણ જોવા મળી રહ્યું છે. ક્યાંક ક્યાં ઠંડી વધી રહી છે તો ક્યાંક ક્યાં ઠંડીમાં ઘટાડો નોંધાયો છે. અમદાવાદ અને ગાંધીનગર જેવા શહેરોમાં બે ડિગ્રી જેટલું તાપમાન ઘટ્યું હતું જ્યારે નલિયામાં એકાએક ચાર ડિગ્રી તાપમાન વધ્યું હતું. જોકે, આગામી પાંચ દિવસ વાતાવરણમાં કોઈ મોટો ફેરફેર નહીં જોવા મળે.
નલિયામાં એકાએક ચાર ડિગ્રી ઠંડી ઘટી
અત્યારે સમગ્ર ગુજરાતમાં ઠંડીનો ચમકારો ચાલી રહ્યો છે ત્યારે નલિયામાં એકાએક ચાર ડિગ્રી તાપમાન વધ્યું હતું. હવામાન વિભાગે આપેલા આંકડા પ્રમાણે સોમવારે ગુજરાતમાં 9.8 ડિગ્રીથી લઈને 19 ડિગ્રી વચ્ચે લઘુતમ તાપમાન નોંધાયું હતું. નલિયામાં 9.8 ડિગ્રી લઘુતમ તાપમાન નોંધાયું હતું. જે પહેલા 6 ડિગ્રીએ રહ્યું હતું. જ્યારે ઓખામાં 19 ડિગ્રી લઘુતમ તાપમાન રહ્યું હતું.
અમદાવાદ અને ગાંધીનગરમાં બે ડિગ્રી ઠંડી વધી
ગુજરાતમાં અત્યારે ઠંડા પવનો ફૂંકાઈ રહ્યા છે જેના પગલે અમદાવાદ અને ગાંધીનગર જેવા શહેરોમાં બે ડિગ્રી જેટલું તાપમાન ગગડ્યું હતું. અમદાવાદમાં તાપમાન 14.3 ડિગ્રી અને ગાંધીનગરમાં 14.8 ડિગ્રી લઘુતમ તાપમાન નોંધાયું હતું. વડોદરામાં 15.4 અને સુરતમાં 17.9 ડિગ્રી લઘુતમ તાપમાન નોધાયું હતું.
રાજ્યમાં ક્યાં કેટલી ઠંડી નોંધાઈ?
| શહેર | મહત્તમ તાપમાન (ડિગ્રીમાં) | લઘુતમ તાપમાન (ડિગ્રીમાં) |
| અમદાવાદ | 30.2 | 14.3 |
| ડીસા | 30.9 | 12.4 |
| ગાંધીનગર | 30.5 | 14.8 |
| વિદ્યાનગર | 29.1 | 15.0 |
| વડોદરા | 31.0 | 15.4 |
| સુરત | 32.2 | 17.9 |
| વલસાડ | – | – |
| દમણ | 30.2 | 18.6 |
| ભૂજ | 32.3 | 16.0 |
| નલિયા | 31.8 | 9.8 |
| કંડલા પોર્ટ | 30.0 | 14.0 |
| કંડલા એરપોર્ટ | 30.7 | 11.9 |
| અમરેલી | 31.4 | 15.7 |
| ભાવનગર | 29.8 | 15.8 |
| દ્વારકા | 31.2 | 16.8 |
| ઓખા | 27.4 | 19.0 |
| પોરબંદર | 31.6 | 13.2 |
| રાજકોટ | 33.5 | 12.7 |
| વેરાવળ | 29.4 | 18.1 |
| દીવ | 27.9 | 13.7 |
| સુરેન્દ્રનગર | 32.3 | 14.0 |
| મહુવા | 33.4 | 13.9 |
| કેશોદ | 30.5 | 12.7 |
આગામી પાંચ દિવસ તાપમાનમાં કોઈ ફેરફાર નહીં થાય : હવામાન વિભાગ
હવામાન વિભાગની આગાહી પ્રમાણે આગામી પાંચ દિવસ તાપમાનમાં મોટો કોઈ ફેરફાર જોવા નહીં મળે. એટલે આગામી પાંચ દિવસ સુધી ઠંડીનું જોર યથાવત રહેશે. ઠંડી વધતાં લોકો ઠંડીમાં ઠઠુંરવાનો વારો આવ્યો હતો.
