Gujarat Rain Weather Forecast Update : ગુજરાતમાં વરસાદ ધીમો થયો હોય તેવો માહોલ જોવા મળી રહ્યો છે. મંગળવારને 2 સપ્ટેમ્બરના રોજ સવારના 6.00 થી સાંજના 4.00 વાગ્યા સુધીમાં 12 તાલુકામાં વરસાદ નોંધાયો છે. જેમાં સૌથી વધારે ડાંગના શુબીરમાં 10 મીમી વરસાદ વરસ્યો છે.
એકપણ તાલુકામાં એક ઇંચથી વધારે વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં મંગળવારને 2 સપ્ટેમ્બરના રોજ સવારના 6 થી સાંજના 4 વાગ્યા સુધીમાં ફક્ત 12 તાલુકામાં વરસાદ વરસ્યો છે. એકપણ તાલુકામાં એક ઇંચ પણ વરસાદ જોવા મળ્યો નથી. શુબીરમાં 10 મીમી, ડાંગ આહવામાં 5 મીમી, સોનગઢમાં 4 મીમી, કપરાડા, વઘઇ, વ્યારામાં 3 મીમી, વિજયનગર, જલાલપોર, વાંસદામાં 2 મીમી, બારડોલી, ઉચ્છલ અને ડોલવણમાં 1 મીમી વરસાદ વરસ્યો છે.
હવામાન વિભાગની આગાહી
હવામાન વિભાગની આગાહી પ્રમાણે 3 સપ્ટેમ્બરે નર્મદા અને તાપીમાં ઓરેન્જ એલર્ટ સાથે અતિભારે વરસાદની આગાહી કરવામાં આવી છે. જ્યારે દાહોદ, પંચમહાલ, છોટાઉદેપુર, ડાંગ, નવસારી, વલસાડમાં યલ્લો એલર્ટ સાથે ભારે વરસાદની આગાહી કરવામાં આવી છે. બાકીનાં જિલ્લાઓમાં છુટાછવાયા ઝાપટા પડી શકે છે.
આ પણ વાંચો – ગુજરાતમાં ફરી એકવાર વીજળીના ભાવમાં ઘટાડો, જાણો તમારા ઘરનું લાઈટ બિલ કેટલું ઓછું આવશે?
રાજ્યમાં સિઝનનો કુલ 91.15 ટકા વરસાદ
2 સપ્ટેમ્બર 2025 સુધીમાં રાજ્યમાં સિઝનનો કુલ 91.15 ટકા વરસાદ નોંધાયો છે. જેમાં કચ્છમાં 85.14 ટકા, ઉત્તર ગુજરાતમાં 95.35 ટકા, પૂર્વ મધ્ય ગુજરાતમાં 90.84 ટકા, સૌરાષ્ટ્રમાં 84.56 ટકા અને દક્ષિણ ગુજરાતમાં 95.31 ટકા વરસાદ વરસ્યો છે.
સરદાર સરોવર નર્મદા નિગમ લી. માં 2 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 298320 mcft છે. જે કુલ સંગ્રહ ક્ષમતાના 89.30% જેટલી છે. રાજ્યના અન્ય 206 જળાશયોમાં સંગ્રહ 453776 mmcft છે. જે કુલ સંગ્રહ ક્ષમતાના 81.34% છે. 100 ટકા ભરાયેલ ડેમોની સંખ્યા 80 છે. 111 ડેમ હાઇ એલર્ટ પર અને 29 ડેમ એલર્ટ પર છે.
