Salman Khan Suffering From Trigeminal Neuralgia Disease : બોલિવૂડ સુપરસ્ટાર સલમાન ખાન લાંબા સમયથી નસની એવી બીમારીથી પીડિત છે, જેમા તેમના ચહેરા પર ઇલેક્ટ્રિક શોક જેવા લક્ષણો જોવા મળે છે. વીજ કરંટ જેમ ડંખ મારતા આ રોગને તબીબી ભાષામાં ટ્રાઇજેમિનલ ન્યુરલજીયા કહેવામાં આવે છે. આ એક એવી સ્થિતિ છે જેમાં ચહેરાથી મગજ સુધી સંકેત પહોંચાડતી ટ્રાઇજેમિનલ નસ દબાઇ જાય છે અથવા ક્ષતિગ્રસ્ત થાય છે. આ નસના સંકોચન અને ક્ષતિગ્રસ્ત થવાને કારણે ચહેરા પર અચાનક તીવ્ર અને ડંખ મારતો દુખાવો થાય છે. સલમાન ખાને હાલમાં જ એક ટોક શોમાં આ રોગ વિશે માહિતી આપી છે. સલમાન ખાનના જુના કો- એક્ટર કાજોલ અને ટ્વિંકલ ખન્ના આ શોને હોસ્ટ કરી રહ્યા હતા જેમાં સલમાન ખાને પોતાની બીમારીના પીડાદાયક અનુભવ વિશે જણાવ્યું હતું. સલમાન ખાન છેલ્લા સાડા સાત વર્ષથી આ બીમારી સામે લડી રહ્યો છે.
નિષ્ણાતે જણાવ્યું હતું કે, આ રોગને કારણે દર 4-5 મિનિટે દુખાવો થતો હતો. આ ચેતાતંત્રની સમસ્યાને કારણે તેને નાસ્તો કરવામાં દોઢ કલાકનો સમય લાગ્યો હતો. નિષ્ણાતે ખુલાસો કર્યો કે બીમારીના કારણે તે ઓમલેટ પણ ચાવી શકતો ન હતો, તેને નાસ્તો કરવા માટે પીડા સહન કરવી પડી હતી. સલમાન ખાને આ રોગથી છુટકારો મેળવવા માટે 2011માં ઓપરેશન કરાવ્યું હતું. હવે સવાલ એ ઉભો થાય છે કે ટ્રાઇજેમિનલ ન્યુરલજીયા બીમારી શું છે અને તેના લક્ષણો શું છે?
ટ્રાઇજેમિનલ ન્યુરલજીયા કઇ બીમારી છે?
ગુરુગ્રામની મેરેન્ગો એશિયા હોસ્પિટલના ચેરમેન ડો.પ્રવીણ ગુપ્તાએ જણાવ્યું હતું કે, “ટ્રાઇજેમિનલ ચેતા એક રોગ છે જેમાં બ્રશ કરવા અથવા મેકઅપ લગાવવા જેવા સહેજ સ્પર્શથી પણ ઇલેક્ટ્રિક શોક જેવી પીડા થઈ શકે છે. ટ્રાઇજેમિનલ ચેતામાં ત્રણ ભાગો હોય છે, જેમાં પ્રથમ ભાગ આંખ અને કપાળને આવરી લે છે. બીજો ભાગ ઉપરના જડબાને આવરી લે છે અને ત્રીજો ભાગ નીચલા જડબાને આવરી લે છે. જ્યારે આમાંના કોઈ પણ ભાગને નુકસાન થાય છે, ત્યારે દર્દીને ચહેરાથી માથા સુધી ઇલેક્ટ્રિક શોક જેવો દુખાવો થાય છે. આ પીડા ખાવાથી, વાત કરવાથી અથવા હળવાશથી સ્પર્શ કરવાથી પણ વધી શકે છે. આ રોગના લક્ષણોને કારણે, તેને ઘણીવાર Suicidal Disease કહેવામાં આવે છે, કારણ કે દર્દી માટે આ પીડા સહન કરવી મુશ્કેલ છે.
ટ્રાઇજેમિનલ ન્યુરલજીયા બીમારના લક્ષણ
- ચહેરા પર અચાનક ડંખ અથવા ઇલેક્ટ્રિક શોક જેવા તીવ્ર દુખાવો
- દુખાવો થોડી સેકંડથી થોડી મિનિટો સુધી રહી શકે છે
- બ્રશ કરવા, ખાવું, ચહેરો ધોવા, હસવું અથવા વાત કરવાથી પણ પીડા થાય છે
- વારંવાર થતા દુખાવાને કારણે ખાવા-પીવું અને સામાન્ય કામગીરી કરવી ખૂબ જ મુશ્કેલ બની જાય છે
ટ્રાઇજેમિનલ ન્યુરલજીયા બીમારી થવાના કારણ
નસ પર આર્ટરી અથવા નસનું દબાણ આ રોગનું કારણ બની શકે છે. કેટલીકવાર ગાંઠ કે ટ્યુમરના કારણે નસ પર દબાણ આવી શકે છે.મલ્ટીપલ સ્ક્લેરોસિસથી પીડાતા દર્દીઓમાં આ સમસ્યા થઈ શકે છે કારણ કે નસનું રક્ષણાત્મક સ્તર (માયલિન આવરણ) નુકસાન પામે છે.ચહેરા પર ઇજા, સ્ટ્રોક અથવા ડેન્ટલ સર્જરીથી પણ આ બીમારી થઈ શકે છે.તે મહિલાઓ અને 50 વર્ષથી વધુ ઉંમરના લોકોમાં વધુ સામાન્ય છે.
ટ્રાઇજેમિનલ ન્યુરલજીયા સારવાર
- ટ્રાઇજેમિનલ ન્યુરલજીયા બીમારીની સારવાર દવાથી કરવામાં આવે છે. તેને સોડિયમ ચેનલ બ્લોકર્સ જેવી દવાઓ આપવામાં આવે છે, જે ચેતાની પીડાને અટકાવે છે.
- રેડિયો ફ્રીક્વન્સી લેસર એબ્લેશન દ્વારા પણ સારવાર કરવામાં આવે છે, જેમાં હીટ આપી નસ પર એક નાનો જખમ બનાવવામાં આવે છે જેથી પીડાના સંકેતો મગજ સુધી ન પહોંચે.
- ફુગ્ગા કમ્પ્રેશન દ્વારા પણ આ રોગની સારવાર કરવામાં આવે છે. આ કમ્પ્રેશનમં નસને ફુગ્ગાની મદદથી દબાવીને દુખાવો ઓછો કરવામાં આવે છે.
- ગ્લિસરોલ ઇન્જેક્શનથી સારવાર કરવા માટે, નસને સહેજ નુકસાન પહોંચાડીને પીડા રાહત આપવામાં આવે છે.
- માઇક્રો વેસ્ક્યુલર ડિકમ્પ્રેશન સર્જરી કરવામાં આવે છે જેમાં નસ પર દબાવતી રક્ત વાહિનીઓને દૂર કરવામાં આવે છે અને તેનાથી રાહત મળે છે.
