શુભાંગી ખાપરે : ભારતીય જનતા પાર્ટી (BJP) ના મહારાષ્ટ્ર એકમે પાર્ટી હાઈકમાન્ડને વિનંતી કરી છે કે તે રાજ્યની વિધાનસભાની ચૂંટણીઓને લગભગ પાંચ-છ મહિના આગળ વધારવાના તેના પ્રસ્તાવ પર વિચાર કરે જેથી કરીને તે એપ્રિલ-મે 2024માં યોજાનારી લોકસભાની ચૂંટણીઓ સાથે થઇ શકે. ભાજપનું કેન્દ્રીય નેતૃત્વ આ પ્રસ્તાવના ફાયદા અને ગેરફાયદાનું વિષ્લેષણ કરી રહ્યું છે. જોકે સૈદ્ધાંતિક રીતે તે ચૂંટણીને આગળ વધારવાના વિચારની વિરુદ્ધ છે.
મહારાષ્ટ્ર બીજેપીના ઉચ્ચ સ્તરીય સૂત્રોએ જણાવ્યું હતું કે પાર્ટી કેન્દ્રીય નેતૃત્વએ અગાઉ સંકેત આપ્યો હતો કે તે આદર્શ રીતે લોકસભા અને વિધાનસભાની ચૂંટણીઓને મિશ્રિત કરવાનું પસંદ કરશે નહીં. એકસાથે ચૂંટણી યોજવાથી રાજ્ય એકમ તેમજ કેન્દ્રીય નેતૃત્વ પર બોજ પડશે કારણ કે તેઓએ ડબલ પ્રચારનું કાર્ય હાથમાં લેવું પડશે. તેમ છતાં મહારાષ્ટ્ર ભાજપ એક સાથે ચૂંટણી માટે દબાણ કરી રહ્યું છે.
પાર્ટીના આંતરિક સૂત્રોએ જણાવ્યું હતું કે આ દરખાસ્ત માટેનું તેમનો તર્ક વિવિધ પરિબળો પર આધારિત છે. પ્રથમ તે સ્વીકારે છે કે કોંગ્રેસ, એનસીપી અને શિવસેના (ઉદ્ધવ બાળાસાહેબ ઠાકરે)નો બનેલો વિપક્ષ મહા વિકાસ આઘાડી (MVA) આગામી ચૂંટણીમાં એક પ્રચંડ ગઠબંધન હશે. MVAનું સામાજિક અંકગણિત કોઈપણ ચૂંટણી લડાઈમાં ભાજપ અને તેના સહયોગી મુખ્યમંત્રી એકનાથ શિંદેની આગેવાની હેઠળની શિવસેના માટે પડકાર ઊભો કરશે.
રાજ્ય ભાજપે 2024માં રાજ્યમાં દુષ્કાળની આગાહી વિશે કેન્દ્રીય નેતૃત્વને પણ જાણ કરી છે. ડેપ્યુટી સીએમ દેવેન્દ્ર ફડણવીસે બજેટ સત્ર દરમિયાન રાજ્ય વિધાનસભાને જણાવ્યું હતું કે આ ઉનાળામાં પાણીની અછત કેવી રીતે ચિંતાનો વિષય બની શકે છે. ભાજપના મગજમાં એક મુખ્ય પરિબળ એ મુદ્દો છે કે સેનામાં વિભાજન અને ઉદ્ધવ સરકારના પતન છતાં સેના (UBT) હજુ પણ પાયાના સ્તરે તેના સમર્થન આધારને નોંધપાત્ર અંશે જાળવી રાખવામાં સફળ રહી છે.
બીજેપીના એક વરિષ્ઠ કાર્યકર્તાએ નામ ન આપવાની શરતે કહ્યું કે શિંદેએ ઉદ્ધવની પાર્ટીને વિભાજિત કરી દીધી. સેનાના 56માંથી 40 ધારાસભ્યો ઉપરાંત 18માંથી 12 લોકસભા સાંસદો તેમની બાજુમાં હતા. પરંતુ હજુ પણ ઉદ્ધવ સેનાની વોટબેંક સંપૂર્ણપણે ખતમ થઈ નથી. તેણે MVAના સપ્તરંગી સામાજિક ગઠબંધનને મજબૂત બનાવ્યું છે જે તેના સમર્થન આધાર તરીકે અન્ય સમુદાયોમાં મરાઠા અને OBCનો નોંધપાત્ર આધાર ધરાવે છે.
આ પણ વાંચો – દિલ્હીમાં વડાપ્રધાન નરેન્દ્ર મોદીના વિરોધમાં પોસ્ટર પર હંગામો, 44 ફરિયાદ નોંધાઈ, ચારની ધરપકડ
ઓક્ટોબર 2019ની વિધાનસભા ચૂંટણીમાં ભાજપ અને ઉદ્ધવની આગેવાની હેઠળની અવિભાજિત શિવસેનાએ કોંગ્રેસ-એનસીપી ગઠબંધન સામે એકસાથે ચૂંટણી લડી હતી. જેમાં રાજ્યની 288 બેઠકોમાંથી ભાજપે 105 બેઠકો, શિવસેનાએ 56, કોંગ્રેસે 44 અને NCPએ 56 બેઠકો જીતી હતી. ભાજપને 25.75%, સેનાને 16.41%, NCPને 16.71% અને કોંગ્રેસને 15.87% વોટ શેર મળ્યા હતા.
શિંદે કેબિનેટમાં ભાજપના વરિષ્ઠ મંત્રીએ જણાવ્યું હતું કે લોકસભા અને વિધાનસભાની ચૂંટણીઓ અલગ-અલગ અથવા એકસાથે યોજવી જોઈએ તે અંગેની ચર્ચા અમારા રાજ્ય અને કેન્દ્રીય નેતૃત્વ વચ્ચે વિવિધ મંચો પર ચાલી રહી છે. તે હજી અનિર્ણિત છે. રાજ્યના બીજેપીના વડા ચંદ્રશેખર બાવનકુલેએ રાજ્યનો વ્યાપક પ્રવાસ કર્યો છે. અમે વહેલી ચૂંટણી માટે તૈયાર છીએ. અમે એક સાથે ચૂંટણી માટે તૈયાર છીએ.
સામાન્ય ચૂંટણીઓ સાથે સુસંગત થવા માટે વિધાનસભાની ચૂંટણીઓને આગળ વધારવા માટે રાજ્ય ભાજપના તર્કને સમજાવતા મંત્રીએ કહ્યું કે ભાજપ માને છે કે નરેન્દ્ર મોદીનો જાદુ જે લોકસભાની ચૂંટણીમાં મતદારોને આકર્ષશે તે વિધાનસભાની ચૂંટણીમાં પણ પાર્ટીને લાભ આપશે. સંસદીય ચૂંટણી પ્રચાર ચરમસીમાએ હશે અને અમે વિધાનસભાની ચૂંટણીમાં પણ તેનો ફાયદો ઉઠાવી શકીએ છીએ.
બીજેપી એ પણ આશંકા વ્યક્ત કરે છે કે આગામી ઉનાળા દરમિયાન સંભવિત દુષ્કાળની પરિસ્થિતિમાં ખેડૂતોમાં વધુ અશાંતિ થઈ શકે છે. જે ઓક્ટોબર 2024માં વિધાનસભાની ચૂંટણીઓ અલગથી યોજવામાં આવે તો નુકસાન કરી શકે છે.
ભાજપ માને છે કે એમવીએ ગઠબંધન વચ્ચે બેઠકોની વહેંચણી સરળ રહેશે નહીં કારણ કે દરેક બેઠક માટે તેમની વચ્ચે તીવ્ર સંઘર્ષ થઈ શકે છે. જેના કારણે મોટી સંખ્યામાં ટિકિટ ઇચ્છુકો અને વર્તમાન ધારાસભ્યોને પણ ટિકિટ મળશે નહીં. જે ભાજપમાં આવી શકે છે. રાજ્યના ઉદ્યોગ મંત્રી ઉદય સામંતે કહ્યું કે કોંગ્રેસ, એનસીપી, સેના (યુબીટી)ના ઓછામાં ઓછા 10-12 ધારાસભ્યો અમારા સંપર્કમાં છે. ચૂંટણી પહેલા તેઓ અમારા ઉમેદવાર તરીકે ઉભરી આવશે.
વિપક્ષ પણ એકસાથે ચૂંટણીને લઈને ભાજપની ચાલ પર નજર રાખી રહ્યું છે. એનસીપીના વરિષ્ઠ નેતા અને વિપક્ષના નેતા અજિત પવારે કહ્યું કે મારી પાસે કોઈ સત્તાવાર માહિતી નથી પરંતુ મારું અનુમાન છે કે ભાજપ લોકસભા અને વિધાનસભાની ચૂંટણી એકસાથે કરાવવા માંગશે.
આ પણ વાંચો – રાહુલ ગાંધી પર પ્રહાર કરતા ભાજપે ચીર-પરિચિત ઉપનામ મીર જાફરનો સહારો લીધો
એક મહિના પહેલા હોમ ટાઉન નાગપુરમાં પાર્ટીના કાર્યકરોને સંબોધિત કરતી વખતે ફડણવીસે તેમને 2024 સુધી મલ્ટિ-ટાસ્કિંગ કરવાની આદત પાડવા માટે પ્રોત્સાહિત કર્યા હતા. તેમ છતાં તેમનો સંદેશ સંગઠનાત્મક કાર્યના સંદર્ભમાં હતો, રાજ્યભરમાં પાર્ટી દ્વારા હાથ ધરવામાં આવેલી ચૂંટણીની તૈયારીઓ, ઉમેદવારોના શોર્ટલિસ્ટિંગ વગેરે પ્રારંભિક ચૂંટણી માટે તેમની ઉત્સુકતા દર્શાવે છે.
જોકે ભાજપમાં એવો પણ મત છે કે મતદારોને કળી શકાય નહીં. ભાજપના એક વ્યૂહરચનાકારે કહ્યું કે 1999માં અમે વિધાનસભાની ચૂંટણી છ મહિના આગળ વધારી હતી. એક સાથે ચૂંટણી ઘાતક સાબિત થઈ. જ્યારે ભાજપ-સેનાએ લોકસભામાં 48માંથી 28 બેઠકો જીતીને સારો દેખાવ કર્યો હતો, જ્યારે વિધાનસભા ચૂંટણીમાં કોંગ્રેસ-એનસીપી સાથે નાના પક્ષો અને અપક્ષોએ 146 બેઠકો જીતી હતી. એનડીએને માત્ર 131 સીટો જ મળી હતી.
