લિઝ મૈથ્યુ : લોકસભા ચૂંટણી 2024ને લઇને તમામ પક્ષોએ પોતાની તૈયારીઓ તેજ કરી દીધી છે. જોકે આ બધાની વચ્ચે આંધ્ર પ્રદેશની રાજનીતિમાં કંઈક અલગ જ થતું દેખાઈ રહ્યું છે. આંધ્ર પ્રદેશમાં ભારતીય જનતા પાર્ટી અને તેલુગુ દેશમ પાર્ટી (ટીડીપી) વચ્ચે ગઠબંધનની સંભાવના ખતમ થતી દેખાઈ રહી છે. જેનું સૌથી મોટું કારણ જગન મોહન રેડ્ડીની પાર્ટી છે. ભાજપ જગન મોહન રેડ્ડીના નેતૃત્વવાળી વાયએસઆર કોંગ્રેસ પાર્ટી (વાયએસઆરસીપી) સાથે ગઠબંધન કરવા માટે ઉત્સુક જણાય છે. ભાજપના સૂત્રોએ જણાવ્યું હતું કે ટીડીપી સાથે સંભવિત ગઠબંધન અથવા કોઈપણ ચૂંટણી કરાર અંગે અંતિમ નિર્ણય રાજકીય પરિસ્થિતિના સંપૂર્ણ મૂલ્યાંકન પછી લેવામાં આવશે.
તેલુગુ દેશમ પાર્ટીના વડા ચંદ્રાબાબુ નાયડુ હાલ દિલ્હીમાં છે પરંતુ તેઓ ભાજપના કોઈ નેતાને મળે તેવી શક્યતા ઓછી છે. આ પહેલા જૂનમાં નાયડૂએ કેન્દ્રીય ગૃહમંત્રી અમિત શાહ અને ભાજપ અધ્યક્ષ જેપી નડ્ડા સાથે બેઠક કરી હતી. આ બેઠકોએ આગામી ચૂંટણીઓ – આંધ્રપ્રદેશ અને તેલંગાણામાં લોકસભા અને વિધાનસભાની ચૂંટણીઓ પૂર્વે ભૂતપૂર્વ સાથી પક્ષો વચ્ચે સંભવિત ગઠબંધન વિશેની ચર્ચાઓને વેગ આપ્યો હતો.
સોમવારે નાયડુએ પોતાની પાર્ટીના નેતાઓ સાથે મુખ્ય ચૂંટણી કમિશનર રાજીવ કુમાર સાથે મુલાકાત કરી હતી અને આંધ્રપ્રદેશની મતદારયાદીમાં મોટી સંખ્યામાં નકલી મતદારોનો કથિત રીતે સમાવેશ કરવાની ફરિયાદ કરી હતી.
વાયએસઆર કોંગ્રેસ પાસે લોકસભાની 25 માંથી 22 બેઠકો છે
જ્યારે નાયડુ ભાજપના નેતૃત્વ સાથે સકારાત્મક વાતચીતની રાહ જોઈ રહ્યા છે. ભાજપે રાજ્યની હાલની રાજકીય પરિસ્થિતિનો તાગ મેળવ્યો હોય તેવું લાગી રહ્યું છે. સૂત્રોએ જણાવ્યું હતું કે ભાજપના નેતૃત્વએ આંધ્રપ્રદેશની રાજકીય પરિસ્થિતિનું પ્રાથમિક મૂલ્યાંકન કર્યું છે. આ રીતે જોવા જઇએ તો ભાજપ જગનમોહનની પાર્ટી વાયએસઆરસીપી સાથે સૌહાર્દપૂર્ણ સંબંધો રાખવા માટે ઉત્સુક છે. ભાજપને લાગે છે કે 25 લોકસભા સીટોવાળા રાજ્ય આંધ્ર પ્રદેશમાં જગનમોહનની પાર્ટીથી તેને ફાયદો થઈ શકે છે. કારણ કે વાયએસઆરસીપીનો રાજ્યમાં સારો પ્રભાવ માનવામાં આવે છે. 2019ની લોકસભાની ચૂંટણીમાં તેમણે 22 બેઠકો જીતી હતી.
ભાજપ કેમ કરી રહ્યું છે વિચાર?
ભાજપના નેતાઓએ કહ્યું કે વાયએસઆરસીપી ચૂંટણીલક્ષી સારી સ્થિતિમાં હોવાનું જણાય છે. રેડ્ડીની કલ્યાણકારી યોજનાઓ લોકપ્રિય સાબિત થઈ રહી છે, જ્યારે ટીડીપી છેલ્લા સાડા ચાર વર્ષમાં જમીની સ્તર પર સરકાર વિરોધી મતોને એકત્રિત કરવામાં નિષ્ફળ રહી છે.
રેડ્ડીએ તાજેતરમાં જાહેરાત કરી હતી કે તેમની સરકારે ડિસેમ્બર 2022થી જુલાઈ 2023ની વચ્ચે વિવિધ કલ્યાણ કાર્યક્રમોમાંથી બાકી રહેલા 2,62,169 લાભાર્થીઓને 216.34 કરોડ રૂપિયા નું વિતરણ કર્યું છે. આંધ્રપ્રદેશના મુખ્યમંત્રીએ કહ્યું છે કે તેમની સરકાર સુનિશ્ચિત કરશે કે કોઈ પાત્ર વ્યક્તિ લાભથી વંચિત ન રહે.
આ પણ વાંચો – નરેન્દ્ર મોદી, રાહુલ ગાંધી, કેજરીવાલ કે યોગી આદિત્યનાથ, વડાપ્રધાન પદ માટે લોકો કોને પસંદ કરે છે? જાણો સર્વે
ભાજપના એક નેતાએ કહ્યું, “આ નવી યોજના સાથે જગનન્ના સુરક્ષા કાર્યક્રમ, જેનું નામ તેમણે પોતાના નામ પરથી રાખ્યું છે. તેમણે આ યોજનામાં તેમના પિતાના પ્રારંભિક વાયએસઆરને દૂર કર્યા છે, જેનો ઉપયોગ યોજનાઓના બ્રાન્ડિંગ માટે મોટા પ્રમાણમાં કરવામાં આવ્યો છે. આ યોજના રાજ્યના ગરીબોની સંપૂર્ણ વસ્તીને આવરી લેવા માટે છે. આનાથી તેમને ચૂંટણીના દૃશ્યમાં ઘણો ફાયદો થવાની સંભાવના છે.
ભાજપના સૂત્રોએ જણાવ્યું હતું કે રાજ્યમાં વાયએસઆરસીપીની સારી સ્થિતિ ભાજપને ટીડીપી પ્રત્યેના તેના પ્રસ્તાવો પર પુનર્વિચારણા કરવાની ફરજ પાડી રહી છે. જે નેશનલ ડેમોક્રેટિક એલાયન્સ (એનડીએ) માં પાછા ફરવા માટે તલપાપડ છે.
રેડ્ડીએ અત્યાર સુધી ભાજપ તરફથી ઔપચારિક રીતે એનડીએમાં જોડાવાના દબાણનો પ્રતિકાર કર્યો છે, પરંતુ દરેક મહત્વના મુદ્દા પર તેમણે નરેન્દ્ર મોદીના નેતૃત્વવાળી સરકારને સમર્થન આપ્યું છે. વાયએસઆરસીપીએ ચોમાસુ સત્ર દરમિયાન કોંગ્રેસ દ્વારા રજૂ કરવામાં આવેલા અવિશ્વાસ પ્રસ્તાવનો વિરોધ કર્યો હતો અને રાષ્ટ્રીય રાજધાની ક્ષેત્ર (એનસીટી) સુધારા બિલ પર સરકારની તરફેણમાં પણ મતદાન કર્યું હતું. આ ખરડો પાછળથી કાયદો બન્યો.
ભાજપના એક નેતાએ કહ્યું કે દક્ષિણમાં ભાજપની પ્રાથમિકતા કોંગ્રેસને રોકવાની છે. પાર્ટીએ એ સુનિશ્ચિત કરવું પડશે કે કર્ણાટક, તેલંગાણા અને આંધ્રપ્રદેશમાં કોંગ્રેસની લીડ મર્યાદિત કરે. વાયએસઆરસીપી પાસે આ માટે વધુ શક્યતાઓ છે. ભાજપે આંધ્રપ્રદેશમાં ક્યારેય એક પણ બેઠક જીતી નથી કે ન તો તે રાજ્યમાં પોતાનો વોટ શેર વધારી શકી છે. પાર્ટીના સૂત્રોએ જણાવ્યું હતું કે રાજ્ય એકમે રેડ્ડી સરકાર સામે અનેક આંદોલનો અને કાર્યક્રમો યોજ્યા છે પરંતુ તેમ છતાં ભાજપ રાજ્યમાં નોંધપાત્ર છાપ છોડી શકી નથી.
ડી પુરંદેશ્વરીને ભાજપે બનાવ્યા છે રાજ્યના ચીફ
રાજ્યમાં પાર્ટીને મજબૂત કરવા માટે ભાજપ હાઈકમાન્ડે તાજેતરમાં જ ડી પુરંદેશ્વરીને પ્રદેશ ભાજપ અધ્યક્ષ તરીકે નિયુક્ત કર્યા છે. પાર્ટી સૂત્રોના જણાવ્યા અનુસાર, આ માત્ર રાજ્યમાં પોતાનો સપોર્ટ બેઝ વધારવાનો પ્રયાસ છે. પૂર્વ કેન્દ્રીય મંત્રી અને નાયડુના ભાભી પુરંદેશ્વરીને દક્ષિણના સૌથી લોકપ્રિય નેતાઓમાંના એક એવા પોતાના પિતા એન ટી રામારાવનો વારસો સંભાળનારી મહિલા માનવામાં આવે છે. ભાજપના એક વરિષ્ઠ નેતાના જણાવ્યા અનુસાર તેઓ સ્પષ્ટવક્તા છે અને મોદી સરકારના કલ્યાણકારી પગલાંનો સંદેશ આપી શકે છે. આંધ્રપ્રદેશના ભાજપના એક નેતાએ જણાવ્યું હતું કે તે રાજ્યમાં એક મહત્વપૂર્ણ આધાર બનાવવા માટે પાર્ટી માટે વધુ મતો મેળવી શકે છે જ્યાંથી અમે તેને આગળ લઈ જઈ શકીએ છીએ.
Disclaimer :- આ આર્ટિકલ Indian Express પરથી અનુવાદિત છે. મૂળ આર્ટીકલ તમે અહીં વાંચી શકો છો
