Gujarat Rain Updates: સીએમ ભૂપેન્દ્ર પટેલે જામનગરમાં પૂરગ્રસ્ત વિસ્તારોનું હવાઈ સર્વેક્ષણ કર્યું

કચ્છ જિલ્લા માં ભારે વરસાદ અને સંભવિત વાવાઝોડાની આગાહી ને પગલે મુખ્યમંત્રી ભૂપેન્દ્ર પટેલ વડોદરાથી સીધા ગાંધીનગર સ્ટેટ ઇમરજન્સી ઓપરેશન સેન્ટર પહોંચ્યા છે. જિલ્લા કલેકટર સાથે વીડિયો કોન્ફરન્સ કરીને તેમણે આ કુદરતી આફત સામે તંત્રની સજજતાની સમીક્ષા કરી . આ આફતથી લોકો ને બચાવી શકાય તે માટે જરૂર જણાય ત્યાં તાત્કાલિક અસરથી સ્થળાંતર કરવા મુખ્યમંત્રીએ સૂચનાઓ આપી છે. મુખ્ય સચિવ રાજકુમાર અને વરિષ્ઠ સચિવો પણ આ બેઠકમાં જોડાયા હતા.

પશ્ચિમ રેલવેના વડોદરા ડિવિઝન પર ભારે વરસાદને કારણે બાજવા સ્ટેશન પર પાણી ભરાવાને કારણે કેટલીક ટ્રેનોને અસર થશે. જેની વિગતો નીચે મુજબ છે.

સંપૂર્ણપણે રદ ટ્રેનો

1. 30 ઓગસ્ટ 2024ની ટ્રેન નંબર 09495 વડોદરા-અમદાવાદ સંકલ્પ ફાસ્ટ પેસેન્જર

2. 30 ઓગસ્ટ 2024ની ટ્રેન નંબર 09496 અમદાવાદ-વડોદરા સંકલ્પ ફાસ્ટ પેસેન્જર

શોર્ટ ટર્મિનેટ ટ્રેન

30 ઓગસ્ટ 2024ની ટ્રેન નંબર 09328 અમદાવાદ-વડોદરા મેમુ રનોલી સ્ટેશન પર શોર્ટ ટર્મિનેટ થશે.

શોર્ટ ઓરિજિનેટ ટ્રેનો

1. 30 ઓગસ્ટ 2024ની ટ્રેન નંબર 09311 વડોદરા-અમદાવાદ મેમુ રણોલી સ્ટેશનથી શોર્ટ ઓરિજિનેટ થશે.

2. 30 ઓગસ્ટ 2024ની ટ્રેન નંબર 09273 વડોદરા-અમદાવાદ મેમુ રણોલી સ્ટેશનથી શોર્ટ ઓરિજિનેટ થશે.

દેવભૂમિ દ્વારકા : ગુજરાતના મુખ્યમંત્રી ભૂપેન્દ્ર પટેલ ખંભાલામાં પૂરગ્રસ્ત લોકોને મળ્યા હતા.

જામનગરઃ ગુજરાતના મુખ્યમંત્રી ભૂપેન્દ્ર પટેલે પૂરગ્રસ્ત વિસ્તારોનું હવાઈ સર્વેક્ષણ કર્યું. તેમની સાથે મંત્રી મુળુભાઇ બેરા અને સાંસદ પૂનમ માડમ પણ ઉપસ્થિત હતા.

જામનગરઃ ગુજરાતના મુખ્યમંત્રી ભૂપેન્દ્ર પટેલે પૂરની સ્થિતિ અને પૂર પ્રભાવિત વિસ્તારો અંગે જિલ્લા અધિકારીઓ સાથે બેઠક યોજી હતી.

29 ઓગસ્ટને શુક્રવારના રોજ સાંજના ચાર વાગ્યા સુધીમાં કચ્છના માંડવીમાં 10 ઇંચ વરસાદ નોંધાયો છે. આ સિવાય મુન્દ્રામાં 185 મીમી, દ્વારકામાં 133 મીમી, અબડાસામાં 106 મીમી, અંજારમાં 58, ગાંધીધામમાં 44 મીમી વરસાદ વરસ્યો છે.

સીએમ ભૂપેન્દ્ર પટેલ જામનગર પહોંચ્યા. જામનગરની પરિસ્થિતિની સમીક્ષા કર્યા પછી તેઓ દેવભૂમિ દ્વારકા જિલ્લાના ખંભાળિયામાં પૂરની સ્થિતિની સમીક્ષા કરવા માટે ઉડાન ભરશે. દેવભૂમિ દ્વારકાથી મુખ્યમંત્રી જામનગર પરત ફરશે અને ત્યાંથી વડોદરા જવા રવાના થશે.

સ્ટેટ ઇમરજન્સી ઓપરેશન સેન્ટર ગાંધીનગર દ્વારા જાહેર કરેલા વરસાદના આંકડા પ્રમાણે આજે ગુરુવારે સવારે 6 વાગ્યાથી લઈને બપોરે 2 વાગ્યા સુધીમાં 154 તાલુકામાં વરસાદ નોંધાયો હતો. સૌથી વધારે વરસાદ કચ્છના માંડવીમાં સવા નવ ઈંચ વરસાદ પડ્યો હતો. જ્યારે મુંદ્રામાં પાંચ ઈંચ, અબડાસામાં અઢી ઈંચ વરસાદ ખાબક્યો હતો.

વડોદારમાં એક તરફ પૂરની સ્થિતિ છે તો બીજી તરફ મગરનો આતંક રહ્યો છે ત્યારે વડોદરામાં વેમાલીમાં આપેલા આતિથ્ય પાર્ટી પ્લોટમાં બે લોકોને કરંટ લાગ્યો હતો જેના પગલે તેમનું મોત નીપજ્યું હતું.

વડોદરામાં પૂરની પરિસ્થિતિ વચ્ચે મહારાજા સયાજીરાવ ગાયકવાડ યુનિવર્સિટીમાં મગર ઘૂસ્યો હતો. જોકે રેસ્ક્યૂ ટીમે મગરને પકડીને વન વિભાગને સોંપ્યો હતો.

ભારે વરસાદથી જળબંબાકાર વડોદરા બેહાલ થયું છે. પાણીમાં ગરકાવ માંજલપુર વિસ્તારમાં એક વૃધ્ધાની તબિયત લથડતાં ટ્રેક્ટરમાં સારવાર માટે લઇ જવાયા હતા.

અમદાવાદ શહેરમાં સવારે વરસાદી છાંટા બાદ ઉઘાડ કાઢ્યો હતો. જોકે, બપોરે પછી અચાનક ધોધમાર વરસાદ પડ્યો હતો. ભારે વરસાદી છાપટાના કારણે રસ્તાઓ ઉપર પાણી ફરી વળ્યા હતા. વરસાદના પગલે કામ અર્થે નીકળેલા લોકોને મુશ્કેલીઓનો સામનો કરવો પડ્યો હતો.

ગુજરાતમાં ભારે વરસાદના પગલે પૂરગ્રસ્ત વિસ્તારોમાં રાહત અને બચાવ કામગીરી ચાલું છે. જેના ભાગરૂપે ભારતીય કોસ્ટ ગાર્ડ હેલિકોપ્ટર દ્વારા દેવભૂમિ દ્વારકાના કલ્યાણપુરના શુમસર ગામના પૂરગ્રસ્ત વિસ્તારોમાંથી લોકોને એરલિફ્ટ કર્યા હતા. દેવભૂમિ દ્વારકા જિલ્લામાં રાતભર ભારે વરસાદ ચાલુ રહ્યો હતો. જિલ્લાના ભાણ્યાદ બ્લોકમાં ગુરુવારે સવારે 6 વાગ્યા સુધીમાં 12 કલાક દરમિયાન પાંચ ઈંચ વરસાદ નોંધાયો હતો. આ જ સમયગાળા દરમિયાન કલ્યાણપુર, ખંભાળિયા અને દ્વારકા બ્લોકમાં અનુક્રમે ચાર, બે અને એક ઈંચ વરસાદ નોંધાયો હતો.

આજે તારીખ 29મી ઓગસ્ટ, 2024ના રોજ સવારે 6 કલાક સુધીમાં રાજ્યમાં મોસમનો કુલ સરેરાશ વરસાદ 109 ટકા નોંધાયો છે. આ વર્ષે કચ્છ ઝોનમાં મેઘરાજા મન મૂકીને વરસ્યા છે. કચ્છ ઝોનમાં મોસમનો સૌથી વધુ 154 ટકા કરતા પણ વધારે અને ત્યારબાદ સૌરાષ્ટ્ર ઝોનમાં 123 ટકાથી વધુ તેમજ દક્ષિણ ગુજરાત ઝોનમાં 110 ટકાથી વધુ વરસાદ નોંધાયો છે. આ ઉપરાંત પૂર્વ-મધ્ય ગુજરાતમાં 104 ટકાથી વધુ, જ્યારે, ઉત્તર ગુજરાતમાં હજુ સુધી 86 ટકા જેટલો મોસમનો કુલ સરેરાશ વરસાદ નોંધાયો છે.

સ્ટેટ ઇમરજન્સી ઓપરેશન સેન્ટર ગાંધીનગર દ્વારા જાહેર કરવામાં આવેલા વરસાદના આંકડા પ્રમાણે ગુજરાતમાં આજે 29 ઓગસ્ટ 2024, સવારે 6 વાગ્યાથી 10 વાગ્યા સુધીમાં ચાર કલાકમાં 90 તાલુકામાં વરસાદ નોંધાયો હતો. જેમાં સૌથી વધારે વરસાદ કચ્છ જિલ્લામાં પડ્યો છે. માંડવીમાં સાડા ચાર ઈંચ, મુંદ્રામાં પોણા ચાર ઈંચ, અંજારમાં પોણા બે ઈંચ વરસાદ પડ્યો હતો.

ગુજરાતમાં ભારે વરસાદને કારણે પરિસ્થિતિ વધુ વણસી ગઈ છે. રાજ્યમાં વરસાદ સંબંધિત ઘટનાઓમાં અન્ય 25 લોકોના મોત થયા છે. જેના કારણે સોમવારથી ત્રણ દિવસમાં મૃત્યુઆંક વધીને 35 થયો છે.

એનડીઆરએફ અને એસડીઆરએફ સાથે આર્મી, એરફોર્સ અને કોસ્ટ ગાર્ડ અસરગ્રસ્ત વિસ્તારોમાં બચાવ અને રાહત કામગીરી કરી રહ્યા છે, જેમાં અત્યાર સુધીમાં લગભગ 17,800 લોકોને પૂર પ્રભાવિત વિસ્તારોમાંથી બહાર કાઢવામાં આવ્યા છે. અને 2,000 લોકોને બચાવી લેવાયા છે. રાજ્ય સરકારના જણાવ્યા અનુસાર, આ ચોમાસામાં અત્યાર સુધીમાં 41,000 થી વધુ લોકોનું સ્થળાંતર કરવામાં આવ્યું છે. જ્યારે 3000થી વધુ લોકોને બચાવી લેવાયા છે.

ભરૂચ જિલ્લામાં છેલ્લા બે ત્રણ દિવસ દરમિયાન વરસેલા વરસાદ બાદ ધીમે ધીમે પાણી ઓસરતા હવે નુકસાનીના દૃશ્યો સામે આવી રહ્યા છે. જંબુસરના ઉબેર ગામના ભાથા વિસ્તારમાં રહેતા માલધારી પરિવારોના 100થી વધુ પશુઓ પાણીમાં ડૂબી જતા મોતને ભેંટ્યા હોવાનુ્ં સામે આવ્યું છે.

સમગ્ર ગુજરાતમાં છેલ્લા ત્રણ દિવસથી ભારે વરસાદ વરસી રહ્યો છે. અનેક વિસ્તારોમાં પૂર જેવી સ્થિતિ સર્જાઈ છે. આવી પરિસ્થિતિ વચ્ચે વડાપ્રધાન નરેન્દ્ર મોદીએ ગુજરાતના મુખ્યમંત્રી ભૂપેન્દ્ર પટેલ સાથે વાતચીત કરી હતી. રાજ્યના વિવિધ જિલ્લાઓના અસરગ્રસ્ત લોકો માટે રાહતના પગલાઓ સહિતની બાબતોની જાણકારી તેમણે મેળવી હતી.

દેવભૂમિ દ્વારકા અને પોરબંદરમાં છેલ્લા બે દિવસમાં RHQ ઉત્તર પશ્ચિમ ગાંધીનગર અને જિલ્લા મથક 1 પોરબંદરની સૂચનાથી છત અને પાણીમાં ફસાયેલા 10 બાળકો સહિત કુલ 39 લોકોને એરલિફ્ટ દ્વારા એરલિફ્ટ દ્વારા બચાવી લેવામાં આવ્યા છે.

છેલ્લા ચાર દિવસથી સતત વરસી રહેલા વરસાદના કારણે ગુજરાતના અનેક ગામોમાં પાણી ફરી વળ્યા છે. આ ઉપરાંત બુધવારે રાતથી અવિરત વરસી રહેલા વરસાદના કારણે જામનગરની સ્થિતિ ખરાબ થઈ છે. જામનગર જિલ્લાના 71 ગામો પૂર ગ્રસ્ત થયા છે. રસ્તાઓ ધોવાયા છે અને પાણી ફરી વળતા સંપર્ક વિહોણા થયા છે. વીજળી ગુલ થઈ ગઈ છે.

સ્ટેટ ઇમરજન્સી ઓપરેશન સેન્ટર ગાંધીનગર દ્વારા જાહેર કરાયેલા વરસાદના આંકડા પ્રમાણે આજે ગુરુવારે 29 ઓગસ્ટ 2024, સવારે 6 વાગ્યાથી લઈને 8 વાગ્યા સુધીમાં 63 તાલુકામાં વરસાદ નોંધાયો હતો. જેમાં સૌથી વધારે વરસાદ કચ્છ જિલ્લામાં નોંધાયો હતો. મુદ્રામાં ત્રણ ઈંચ, માંડવીમાં સવા બે ઈંચ, અંજારમાં દોઢ ઈંચ, ભચાઉમાં દોઢ ઈંચ, અબડાસામાં એક ઇંચ વરસાદ નોંધાયો હતો.

વડોદરાના કામનાથ નગર નરહરિ હોસ્પિટલ રોડ પરથી વન વિભાગ અને NGOએ મળીને 15 ફૂટના મગરનું રેસ્ક્યૂ કરવામાં આવ્યું.