International Plastic Bag Free Day 2024 : દર વર્ષે 3 જુલાઇના રોજ આંતરરાષ્ટ્રીય પ્લાસ્ટિક બેગ મુક્ત દિવસ તરીકે મનાવવામાં આવે છે. પ્લાસ્ટિકથી જળ-જમીન પર પ્રદુષણ ફેલાય છે અને તે સમગ્ર દુનિયામાં એક ગંભીર સમસ્યા બની ગઇ છે. પ્લાસ્ટિકનો નાશ થવામાં 100-200 વર્ષ જેટલો સમય લાગે છે. દુનિયાભરમાં પ્લાસ્ટિકની બેગનો સૌથી વધારે ઉપયોગ થાય છે અને તેનાથી પ્રદુષણની ગંભીર સમસ્યા ઉભી થઇ છે.
પ્લાસ્ટિક બેગ એ આપણા રોજિંદા જીવનનો અનુકૂળ અને વ્યાપકપણે ઉપયોગમાં લેવાતો ભાગ છે. પરંતુ તે પર્યાવરણીય પ્રદૂષણનો મુખ્ય સ્ત્રોત પણ બની શકે છે. પ્લાસ્ટિકનો નાશ થવામાં 100-200 વર્ષ જેટલો સમય લાગે છે તેથી તેઓ જમીન અને પાણીમાં એકઠા થઈ શકે છે, જેનાથી જીવસૃષ્ટિ અને દરિયાઈ જીવનને નુકસાન થાય છે. તેઓ ડ્રેનેજ સિસ્ટમને પણ રોકી શકે છે, રિસાયક્લિંગ પ્રક્રિયાઓને વિક્ષેપિત કરી શકે છે અને જળમાર્ગોને દૂષિત કરી શકે છે.
આંતરરાષ્ટ્રીય પ્લાસ્ટિક બેગ મુક્ત દિવસ ઇતિહાસ
2008માં ઝીરો વેસ્ટ યુરોપે સિંગલ યુઝ પ્લાસ્ટિક બેગના મુદ્દાને લક્ષ્યાંકિત કરતી ઝુંબેશ શરૂ કરી, જે 3 જુલાઈના રોજ થઈ હતી. ત્યારબાદ 2015માં યુરોપિયન યુનિયન દ્વારા સિંગલ-યુઝ પ્લાસ્ટિક બેગનો ઉપયોગ ઘટાડવા માટે ચોક્કસ નિર્દેશો રજૂ કરવામાં આવ્યા હતા. જેમ જેમ સમય પસાર થતો ગયો તેમ તેમ આ ચળવળને નોંધપાત્ર વેગ મળ્યો હતો. જેના કારણે ઘણા દેશોએ પ્લાસ્ટિકની થેલીઓ પર પ્રતિબંધ મૂક્યો. હાલમાં આ દિવસ વિશ્વના ઘણા દેશો દ્વારા ઉજવવામાં આવતી વૈશ્વિક ઘટના બની ગઈ છે.
આ પણ વાંચો – કેમ ઉજવવામાં આવે છે વિશ્વ પવન દિવસ, જાણો ઇતિહાસ અને મહત્વ
આંતરરાષ્ટ્રીય પ્લાસ્ટિક બેગ મુક્ત દિવસ મહત્વ
આ એક વૈશ્વિક પહેલ છે, જેનો ઉદ્દેશ્ય પ્લાસ્ટિક બેગનો ઉપયોગ બંદ કરવાનો છે. પ્લાસ્ટિક મૂવમેન્ટના બ્રેક ફ્રીના ભાગરૂપે લગભગ 1500 સંસ્થાઓ દ્વારા આંતરરાષ્ટ્રીય પ્લાસ્ટિક બેગ મુક્ત દિવસની ઉજવણી કરવામાં આવે છે. આ ચળવળ પ્લાસ્ટિક પ્રદૂષણની કટોકટીના ઉકેલો શોધવા અને માનવો, પર્યાવરણ અને વન્યજીવન માટે ગ્રહને વધુ સુરક્ષિત બનાવવા માટે પ્રતિબદ્ધ છે. ઉલ્લેખનિય છે કે ભારતમાં સિંગલ યુઝ પ્લાસ્ટિક પર પ્રતિબંધ મૂકાયો છે, જેમાં પ્લાસ્ટિકની 19 જેટલી પ્રોડક્ટનો સમાવેશ થાય છે.
