Gujarati News 19 March 2025 : નાગપુરમાં હિંસા બાદ પોલીસે કાઢી ફ્લેગ માર્ચ, 50થી વધુની ધરપકડ

ધોરાજી નગરપાલિકાની ચૂંટણી પહેલાથી લઇ ચૂંટણીના પરિણામ બાદ ચર્ચામાં રહેલા પ્રમુખ સંગીતાબેન બારોટે એકાએક ધોરાજી નગરપાલિકના પ્રમુખ પદ ઉપરથી રાજીનામું આપી દેતા અનેક તર્ક વિતર્ક શરૂ થયા છે. પ્રદેશ કક્ષાની સૂચનાથી નિર્ણય લેવાયો હોવાનું રાજકીય વર્તૂળોમાં ચર્ચાઇ રહ્યું છે.

શેરબજાર સેન્સેક્સ નિફ્ટી બુધવારે વધીને ખુલ્યા બાદ ફ્લેટ ટ્રેડિંગ કરી રહ્યા છે. સેન્સેક્સ પાછલા બંધ 75301 સામે 150 પોઇન્ટના ઉંચા ગેપમાં આજે 75473 ખુલ્યો હતો. જો કે આઈટી શેરમાં નરમાઇથી માર્કેટનો અંડર ટોન ડાઉન હતો. એનએસઇ નિફ્ટી પાછલા બંધ 22834 સામે આજે 22874 ખુલ્યો હતો. સેન્સેક્સના ટોપ 5 લુઝરમાં ઇન્ફોસિસ, ટીસીએસ, એચસીએલ ટેક, ટેક મહિન્દ્રા અને સન ફાર્મા 1 થી સવા બે ટકા સુધી ડાઉન હતા. નિફ્ટી આઈટી ઈન્ડેક્સ 700 પોઇન્ટથી વધુ તૂટ્યો હતો. બેંક નિફ્ટી 150 પોઇન્ટ મજબૂત હતો.

ગુજરાતમાં અત્યારે ગરમીમાં રાહત વર્તાઈ રહી છે. ત્યારે હજી ચાર દિવસ આવું જ તાપમાન રહેશે. જોકે, ચાર દિવસ બાદ તાપમાનમાં બેથી ત્રણ ડિગ્રી સુધી તાપમાન વધશે. એટલે આગામી ચાર દિવસ બાદ તાપમાન વધવાથી લોકો ગરમીથી ત્રાહિમામ પોકારી જશે.

મહારાષ્ટ્રના નાગપુરમાં થયેલી હિંસામાં અત્યાર સુધીમાં 50થી વધુ આરોપીઓની ધરપકડ કરવામાં આવી છે. અહીંથી ઔરંગઝેબની કબર હટાવવાની માંગ કરવામાં આવી હતી. આ દરમિયાન બે જૂથ વચ્ચે ઝઘડો શરૂ થયો હતો. મહારાષ્ટ્રના સીએમ દેવેન્દ્ર ફડણવીસે કહ્યું કે આ હિંસક ઘટના અને રમખાણો પૂર્વ આયોજિત લાગે છે. છાવા ફિલ્મે ઔરંગઝેબ સામે લોકોનો ગુસ્સો ભડક્યો છે, છતાં બધાએ મહારાષ્ટ્રમાં શાંતિ જાળવી રાખવી જોઈએ.” મહારાષ્ટ્રના નાયબ મુખ્ય પ્રધાન એકનાથ શિંદેએ કહ્યું છે કે જે લોકો આમાં સામેલ છે તેમને બક્ષવામાં આવશે નહીં, ફડણવીસે લોકોને શાંતિ જાળવવા માટે પોલીસ કમિશનરને સૂચના આપી છે.