IND vs ENG 5th Test: ભારત વિ. ઈંગ્લેન્ડ ટેસ્ટ બીજા દિવસના અંતે ભારતની 255 રનની લીડ, રોહિત ગિલે ફટકારી સદી

India vs England 5th Test Match Day-2 Score Today Match, ભારત ઈંગ્લેન્ડ ટેસ્ટ : રોહિત શર્મા અને શુભમન ગિલની સદીની મદદથી ભારતે ઇંગ્લેન્ડ સામેની પાંચમી ટેસ્ટના બીજા દિવસે પકડ મજબૂત બનાવી લીધી છે. ઇંગ્લેન્ડના 218 રનના જવાબમાં ભારતે બીજા દિવસના અંતે 120 ઓવરમાં 8 વિકેટે 473 રન બનાવી લીધા છે. ભારતે 255 રનની લીડ મેળવી લીધી છે અને તેની 2 વિકેટો હજુ બાકી છે. દિવસના અંતે કુલદીપ યાદવ 27 અને જસપ્રીત બુમરાહ 19 રને રમતમાં છે.

રોહિત શર્મા અને શુભમન ગિલની સદી

લંચ પછી ભારતીય ટીમને ઉપરા-ઉપરી બે ફટકા પડ્યા હતા. જેમાં રોહિત શર્મા અને શુભમન ગિલ બંને આઉટ થઈ પેવેલિયન ભેગા થયા હતા. શુભમન ગિલ 110 રન બનાવી અને રોહિત શર્મા 103 રન બનાવીને આઉટ થયા હતા. રોહિત શર્માએ 162 બોલ રમી 13 ચોગ્ગા અને 3 સિક્સ સાથે 63.58 સ્ટ્રાઇક રેટ સાથે 103 રન ફટકાર્યા હતા. જ્યારે શુભમન ગિલે 150 બોલમાં 12 ચોગ્ગા અને 5 સિક્સ સાથે 73.33 નીસ્ટ્રાઇક રેટ સાથે 110 રન બનાવ્યા હતા.

ભારત વિ. ઇંગ્લેન્ડ 5મી ટેસ્ટમાં ભારતની પ્રથમ ઇનિંગ સ્કોરકાર્ડ

સરફાઝ ખાને 56 રનની ઇનિંગ્સ રમી હતી. જ્યારે ડેબ્યૂ ટેસ્ટ રમી રહેલા દેવદત્ત પડ્ડિકલે 65 રન બનાવ્યા હતા. રવિન્દ્ર જાડેજા અને ધ્રુવ જુરેલ 15-15 રને આઉટ થયા હતા.

ભારત વિ. ઇંગ્લેન્ડ 5મી ટેસ્ટ: ઇંગ્લેન્ડ પ્રથમ ઇનિંગ સ્કોરકાર્ડ

ભારત ઈંગ્લેન્ડ ટેસ્ટ : પહેલા દિવસે જ ઈંગ્લેન્ડ ઓલઆઉટ

ઈંગ્લેન્ડનો પ્રથમ દાવ ત્રીજા સેશનમાં ઓલઆઉટ થઈ ગયો હતો. ભારત તરફથી કુલદીપ યાદવે 5 વિકેટ, રવિચંદ્રન અશ્વિને 4 અને રવિન્દ્ર જાડેજાએ એક વિકેટ લીધી હતી. ઈંગ્લેન્ડ તરફથી જેક ક્રાઉલે સૌથી વધુ રન બનાવ્યા હતા. તેણે 79 રન બનાવ્યા હતા. તેમના સિવાય બેન ડકેટ 27, ઓલી પોપ 11, જો રૂટ 26, જોની બેરસ્ટો 29, બેન ફોક્સ 24 રન બનાવીને આઉટ થયા હતા. શોએબ બશીર 11 રન બનાવીને અણનમ રહ્યો હતો.

બેન સ્ટોક્સ, ટોમ હાર્ટલી અને જેમ્સ એન્ડરસન ખાતું ખોલાવ્યા વિના જ પેવેલિયન પરત ફર્યા હતા. બીજા સેશન દરમિયાન ઈંગ્લેન્ડે 29.3 ઓવરમાં 6 વિકેટ ગુમાવીને 94 રન બનાવ્યા હતા. તેમાંથી 3 વિકેટ કુલદીપ યાદવના ખાતામાં ગઈ હતી, બે વિકેટ રવિચંદ્રન અશ્વિનને અને એક વિકેટ રવિન્દ્ર જાડેજાના ખાતામાં ગઈ હતી. કુલદીપ યાદવે ટેસ્ટ ક્રિકેટમાં ચોથી વખત એક ઇનિંગ્સમાં 5 વિકેટ લીધી હતી.

દેવદત્ત પડિકલે શ્રેણીમાં ડેબ્યૂ કરનારો ભારતનો પાંચમો ખેલાડી

દેવદત્ત પડિકલે ભારત માટે પદાર્પણ કર્યું હતું. આ શ્રેણીમાં ડેબ્યૂ કરનાર તે ભારતનો 5મો ખેલાડી છે. ઈંગ્લેન્ડ પહેલા જ પ્લેઈંગ 11 જાહેર કરી ચૂક્યું છે. તેણે 1 ફેરફાર કર્યો. ઓલી રોબિન્સનની જગ્યાએ માર્ક વુડને તક મળી છે. ભારતના પ્લેઇંગ 11માં 2 ફેરફાર થયા છે. આકાશદીપની જગ્યાએ જસપ્રીત બુમરાહની વાપસી થઈ છે. રજત પાટીદારની જગ્યાએ દેવદત્ત પડિકલને તક મળી. ભારતના દિગ્ગજ સ્પિનર ​​રવિચંદ્રન અશ્વિન અને ઈંગ્લેન્ડના મિડલ ઓર્ડર બેટ્સમેન જોની બેયરસ્ટોની આ 100મી ટેસ્ટ મેચ છે. ભારતીય ટીમે શ્રેણી 3-1થી જીતી લીધી છે.

આ પણ વાંચોઃ- યશસ્વી જયસ્વાલે ટેસ્ટમાં 1000 રન પુરા કર્યા, રેકોર્ડ્સની વણઝાર સર્જી

હૈદરાબાદમાં પ્રથમ ટેસ્ટ હાર્યા બાદ રોહિત શર્માની આગેવાની હેઠળની ટીમે શાનદાર પ્રદર્શન કર્યું હતું. વિશાખાપટ્ટનમ, રાજકોટ અને રાંચીમાં જીત મેળવી. શ્રેણી જીત્યા બાદ પણ ભારતીય ટીમ ધર્મશાલા ટેસ્ટને હળવાશથી નહીં લે. તેણે વર્લ્ડ ટેસ્ટ ચેમ્પિયનશિપ રેન્કિંગમાં ટોચના સ્થાન પરનો પોતાનો દાવો મજબૂત કરવા માટે આ મેચ જીતવી પડશે. બીજી તરફ ઈંગ્લેન્ડની ટીમ ભારત પ્રવાસનો અંત જીત સાથે કરવા ઈચ્છશે.