Mohammed Shami Not Play In Vijay Hazare Trophy: ભારતના દિગ્ગજ ફાસ્ટ બોલર મોહમ્મદ શમીની ફિટનેસ હજુ પણ ચર્ચાનું કારણ છે. બ્રિસબેન ટેસ્ટ બાદ રોહિત શર્માએ શમીની ફિટનેસ અંગે અપડેટ માગી હતી. હવે મોટા સમાચાર એ છે કે બંગાળે વિજય હજારે ટ્રોફીની પ્રથમ મેચ માટે આ ફાસ્ટ બોલરને આરામ આપવાનો નિર્ણય લીધો છે. ક્રિકેટ એસોસિએશન ઓફ બેંગાલ (સીએબી)એ ગુરુવારે આ જાહેરાત કરી હતી.
મોહમ્મદ શમી 2023માં વર્લ્ડ કપ બાદ કોઈ મેચ રમ્યો નથી
મોહમ્મદ શમી છેલ્લે 2023ના વન ડે વર્લ્ડકપમાં ટીમ ઇન્ડિયા તરફથી રમ્યો હતો. શમીએ ઘૂંટણની સર્જરી બાદ લાંબા સમય બાદ ડોમેસ્ટિક ક્રિકેટમાં પુનરાગમન કર્યું હતુ. ત્યારબાદ બેંગલુરુમાં બીસીસીઆઈના હાઈ પરફોર્મન્સ દરમિયાન તે ઈજામાંથી બહાર આવી રહ્યો હતો.
મોહમ્મદ શમીની ડોમેસ્ટિક ક્રિકેટમાં વાપસી
મોહમ્મદ શમીએ ડોમેસ્ટિક ક્રિકેટ સાથે વાપસી કરી હતી. તેણે બંગાળ માટે શાનદાર વાપસી કરી હતી અને સાત વિકેટ ઝડપી હતી અને ટીમને રણજી ટ્રોફીની આ સિઝનમાં પ્રથમ જીત અપાવવામાં મદદ કરી હતી. તાજેતરમાં જ પુરી થયેલી સૈયદ મુસ્તાક અલી ટ્રોફીમાં તેણે નવ વિકેટ ઝડપી હતી. જો કે, તેના ઘૂંટણમાં સોજો હજી પણ ચિંતાનો વિષય છે જે ડોમેસ્ટિક ટી 20 મેચ દરમિયાન આવ્યો હતો.
રોહિત શર્માને બ્રિસબેનમાં ડ્રો થયેલી ત્રીજી ટેસ્ટ બાદ મોહમ્મદ શમીની ઉપલબ્ધતા અંગે પૂછવામાં આવતા તે ગુસ્સે થયો હતો. મને લાગે છે કે એનસીએ (નેશનલ ક્રિકેટ એકેડેમી) માંથી કોઈએ તેના વિશે વાત કરવી જોઈએ કે તે ક્યા રિહેબિલિટેશન કરી રહ્યો છે. તેમણે જ આવીને અમને કોઇ અપડેટ્સ આપવાની જરૂર છે.
અમે કોઇ જોખમ લઇશું નહીં : રોહિત શર્મા
રોહિત શર્માએ કહ્યું કે, હું સમજું છું કે તે ઘરઆંગણે ઘણી ક્રિકેટ મેચ રમી રહ્યો છે, પરંતુ તેના ઘૂંટણ વિશે પણ કેટલીક ચિંતાઓ છે. જ્યાં સુધી અમને તેની ફિટનેસ વિશે 200 ટકા ખાતરી ન થાય ત્યાં સુધી અમે કોઈ જોખમ લઈશું નહીં.
વિજય હઝારે ટ્રોફીમાં મોહમ્મદ શમીની ભાગીદારીને ચેમ્પિયન્સ ટ્રોફી સહિતની આગામી આંતરરાષ્ટ્રીય ટુર્નામેન્ટ્સ માટે તેની ઉપલબ્ધતા નક્કી કરવાની દિશામાં એક મહત્ત્વનું પગલું માનવામાં આવી રહ્યું છે. ઓસ્ટ્રેલિયાના રિઝર્વ બોલરમાં સામેલ ફાસ્ટ બોલર મુકેશ કુમાર પણ સુદીપ કુમાર ઘરામીની આગેવાની હેઠળની બંગાળની ટીમમાં સામેલ છે.
