Jul 22, 2025
શ્રાવણ માસમાં ઘણા લોકો આખો મહિનો વ્રત ઉપવાસ કરે છે. આવી સ્થિતિમાં ઘણા લોકો એક મહિનો એક ટાઇમ ફરાળી વાનગી ખાય છે. અહીં સૌથી પ્રખ્યાત અને સ્વાદિષ્ટ 10 ફરાળી વાનગીની રેસીપી આપી છે. જે વ્રત ઉપવાસમાં ઘરે બનાવી ખાઇ શકાય છે.
મોરૈયાની ખીચડી બનાવવામાં સૌથી સરળ અને પ્રખ્યાત ફરાળી વાનગી છે. તેલમાં જીરું અને લીલા મરચોનો તડકો લગાવી, પ્રેશર ક્રૂકરમાં મોરૈયો, બટાકા, સીંગદાણા બાફીને આ ફરાળી ખીચડી બને છે. મોરૈયાની ખીચડી પાચન થવામાં પણ સરળ હોય છે.
સાબુદાણાની ખીચડી સ્વાદિષ્ટ ફરાળી વાનગી લાગે છે. 3 થી 5 કલાક પાણીમાં પલાળેલા સાબુદાણામાં બાફેલા બટાકા, શેકેલી સીંગ, લીલા મરચા સહિત વિવિધ મસાલો ઉમેરીને સાબુદાણાની ખીચડી બને છે. તેને દહીં કે છાશ સાથે ખાઇ શકાય છે. સાબુદાણા ખાવાથી પેટ લાંબા સમય સુધી ભરેલુ લાગે છે.
રાજગરાના લોટની ફરાળી પુરી અને બટાકાનું શાક વ્રત ઉપવાસમાં ખાઇ શકાય છે. રાજગરા અને શિંગાડોનો લોટ મિક્સ કરીને ફરાળી પુરી બનાવો, તે બટાકાના રસાવાળા શાક કે સુકી ભાજી અથવા દહીં કે ખીર સાથે ખાઇ શકાય છે.
મખાના ખીર વ્રત ઉપવાસમાં ખાઇ શકાય છે. દૂધમાં મખાના ઉકાળો, તેમા ખાંડ અને ડ્રાયફ્રૂટ્સ ઉમેરી મખાના ખીર બને છે. મખાના ખીર ખાવાથી વ્રત ઉપવાસ દરમિયાન શરીરને એનર્જી મળે છે.
બીટ રાયતું ટેસ્ટી અને હેલ્ધી હોય છે. બીટ છીણીને દહીં ઉમેરો, તેમા ફુદીનાના પાન, લીલું કોથમીર, ફરાળી મીઠું અને દાડમના દાણા ઉમરી શકાય છે. બીટ રાયતું ખાવાથી ઉપવાસ દરમિયાન શરીરને પોષણ મળે છે.
સાબુદાણા પેટીસ ચટપટી ફરાળી વાનગી છે. પલાળેલા સાબુદાણા, બાફેલા બટાકા, શેકેલી સીંગ અને વિવિધ મસાલા ઉમેરીને સાબુદાણા પેટીસ બનાવી શકાય છે. તેને દહીં, આમલી ગોળની મીઠી ચટણી કે તીખી ચટણી ખાઇ શકાય છે.
ફરાળી ઢોકળા બનાવવા માટે મોરૈયા અને સાબુદાણા પાણીમાં પલાળો પછી મિક્સ જારમાં પીસી તેનું ખીરું તૈયાર કરો. સ્ટીમરમાં ખીરું બાફીને સ્વાદિષ્ટ ફરાળી ઢોકળા બનાવી શકાય છે.
ઘણા લોકોને ફરાળી બફવડા ખાવા ગમે છે. બાફેલા બટાકામાં મસાલા ઉમેરી નાના બોલ બનાવો, પછી રાજગરા કે શિંગાડોના લોટના ખીરામાં ડબોડી તેલમાં તળી લો. ગરમાગરમ બફવડા ખજૂરની ચટણી સાથે ખાવાની મજા પડે છે.
ફરાળી આલુ પરાઠા બાફેલા બટાકા, સાબુદાણાનો લોટ, રાજગરા અને શિંગોડાનો લોટ મિક્સ કરીને બનાવી શકાય છે. તેને દહીં અને લીલી ચટણી સાથે ખાઇ શકાય છે.
ફરાળી ચાટ સ્વાદમાં ટેસ્ટી અને હેલ્ધી હોય છે. છીણા સમારેલા બાફેલા બટાકા, શક્કરિયા, બીટ, ગાજર, દાડમના દાણા, દહીં, ફુદીનાના પાન, સમારેલું લીલું કોથમીર, ફરાળી મીઠું ઉમેરીને ફરાળી ચાટ બને છે.