Nov 05, 2025
ઢાબામાં તમે જીરા રાઈસ અને દાલ ફ્રાય અવશ્ય ખાધા હશે. તે એકદમ ટેસ્ટી લાગે છે અને મજા આવી જાય છે.
આવા જ ઢાબા જેવી ટેસ્ટી દાલ ફ્રાય તમે ઘરે પણ બનાવી શકો છો. અહીં દાલ ફ્રાયની રેસીપી જણાવી રહ્યા છીએ.
તુવેર દાળ, ચણાની દાળ, મગની દાળ, મસૂર દાળ, ઘી, લવિંગ, તજ, જીરું, લાલ મરચાં, ગરમ મસાલા પાઉડર, હળદર, લાલ મરચું પાઉડર, પાણી, ટામેટું, ડુંગળી, લસણની કળી, પીસેલું આદું, બારીક સમારેલા લીલા મરચા, ધાણાજીરું, લીંબુનો રસ, મીઠું, લીલા ધાણા.
સૌ પહેલા બધી દાળને મિક્સ કરીને બરાબર પાણીથી ધોઈ લો અને 10 મિનિટ માટે પાણીમાં પલાળી દો. વધારાનું પાણી કાઢીને દાળના મિશ્રણને પ્રેશર કૂકરમાં મુકો.
તેમાં મીઠું અને પાણી નાખીને કૂકરનું ઢાંકણ બંધ કરી દો બાફવા માટે મૂકો. 3 સીટી વાગે ત્યાં સુધી પકાવો. દાળને મસળવાની કે પીસવાની જરૂર નથી.
હવે વઘાર માટે એક કડાઈમાં મધ્યમ આંચ પર ઘી ગરમ કરો. તેમાં જીરું, સૂકા લાલ મરચાં, તજ અને લવિંગ નાખો. જ્યારે જીરું ગોલ્ડન થવા લાગે ત્યારે તેમાં ડુંગળી નાખીને ચમચાથી હલાવીને તેને હલકી બદામી રંગની થાય ત્યાં સુધી સાંતળો.
આ પછી તેમાં પીસેલું આદું, લસણ અને બારીક સમારેલા લીલા મરચાં નાખીને સાંતળો. તેમાં બારીક સમારેલું ટામેટું અને મીઠું નાખીને ત્યાં સુધી પકાવો જ્યાં સુધી ટામેટું નરમ ન પડી જાય.
તેમાં ગરમ મસાલા પાઉડર, ધાણાજીરું, લાલ મરચું પાઉડર અને હળદર નાખીને બરાબર મિક્સ કરો. તેમાં બાફેલી દાળ નાખીને એક મિનિટ માટે ઉકાળો.
તેમાં લીંબુનો રસ અને પાણી નાખીને મધ્યમ આંચ પર 5 મિનિટ માટે પકાવો. વચ્ચે-વચ્ચે ચમચાથી હલાવતા રહો. ગેસને બંધ કરીને દાળને સર્વિંગ બાઉલમાં કાઢો અને બારીક સમારેલા લીલા ધાણાથી સજાવીને પીરસો.