Jun 17, 2025
ચોમાસામાં લોકોને ભજીયા ખાવાની બહુ ઇચ્છા થાય છે. ચણાના લોટ સાથે વિવિધ શાકભાજી મિક્સ કરીને બનેલા ભજીયા ખાવામાં સ્વાદિષ્ટ લાગે છે.
ચોમાસામાં ઘરે બનેલા ભજીયા ખાવા આરોગ્ય માટે સારું રહે છે. અહીં 7 પ્રકારના ભજીયાની રેસીપી આપી છે, ચોમાસામાં ઘરે બનાવવાની ટ્રાય કરી શકાય છે.
મેથીના ગોટા સૌથી વધુ ખાવામાં આવતા ભજીયાની વેરાયટી છે. ચણાના લોટમાં ઝીણી સમારેલી મેથીની ભાજી, મસાલા અને પાણી ઉમેરી ખીરું બનાવાય છે. ત્યાર પછી ગેસ પર મીડિયમ તાપે ગરમ તેલમાં ભજીયા સહેજ બ્રાઉન થાય ત્યાં સુધી તળવા. વરસાદમાં ગરમા ગરમ મેથીના ગોટા ચા કે ચટણી સાથે ખાવાની મજા પડે છે.
દાળ વડા મગની દાળ માંથી બને છે. મગની દાળ 6 થી 8 કલાક પાણીમાં પલાળી રાખવી. ત્યાર પછી મગ દાળ મિક્સર જારમાં પીસી પેસ્ટ બનાવી લો. તેમા આદું લીલા મરચા મીઠું અને મસાલા નાંખો. ગરમ તેલમાં મગની દાળના ભજીયા સહેજ બ્રાઉન અને ક્રિસ્પી ત્યાં સુધી તળી લો. ચોમાસાના વરસાદમાં તળેલા લીલા મરચા, ડુંગળી અને ચટણી સાથે ગરમા ગરમ દાળ વડા ખાવાની મજા પડે છે.
બટાકા વડા બનાવવા બટાકા બાફી લો. પછી મેશ કરેલા બટાકામાં વિવિધ મસાલા ઉમેરી સ્ટફિંગ તૈયાર કરો. બટકાના મસાલા માંથી નાના બોલ બનાવી ચણાના લોટના ખીરામાં ડુબાડી ગરમ તેલમાં તળી લો. બટેકા વડા નાના બાળકને ખાવા ગમે છે.
ડુંગળીના ભજીયા વરસાદના ઠંડા હવામાનમાં ખાવાની મજા પડે છે. ચણાના લોટના ખીરામાં ડુંગળી ઉમેરો. ત્યાર પછી ગરમ તેલમાં ચણાના લોટના ભજીયા તળો. ગરમા ગરમ ડુંગળીના ભજીયા ખાવાથી ચોમાસામાં શરીરને ગરમી મળે છે.
આખા લીલા મરચા ઉભા વચ્ચેથી કાપી શેકેલા ચણાના લોટનો મસાલો ભરો. હવે ચણાના લોટમાં આખા લીલા મરચા ડબોડી ગરમ તેલમાં તળી લો. મરચા વડા ખજૂરીની ચટણી સાથે ખાવામાં સ્વાદિષ્ટ લાગે છે.
બટાકાની છાલ ઉતારી પાતળી ગોળ ચીપ્સમાં કાપી લો. બટાકાની એક એક ચીપ્સ ચણાના લોટમાં ડુબાડી ગરમ તેલમાં તળી લો. બટાકાની ચીપ્સના ભજીયા ખાસ કરીને બાળકોને ખાવા ગમે છે.
પાલક પકોડા બનાવવા માટે ચણાના લોટના ખીરામાં પાલકના આખા પાંદડા ડુબાડી ગરમ તેલમાં તળી લો. એક વાતનું ધ્યાન રાખો પાલક પકોડા ગરમ જ ખાવા જોઇએ.