ફરસાણની દુકાન અને બહાર લારીમાં મળતા પાપડી ગાંઠીયા એકદમ પોચા અને ટેસ્ટી લાગે છે.
આવી જ ટેસ્ટી પાપડી તમે ઘરે પણ બનાવી શકો છો. અહીં પાપડી બનાવવાની રેસીપી જણાવી રહ્યા છીએ.
ચણાનો લોટ, તેલ, પાણી, મીઠું, અજમો, બેકિંગ સોડા.
સૌપ્રથમ એક બાઉલમાં એક વાટકી તેલ લો. તેમાં બે વાટકી પાણી ઉમેરો. આ પછી તેને ગ્લેન્ડરથી કે મિક્સરમાં વલોવી લેવું.
આ કરવાથી તે એકદમ સફેદ જેવું થઇ જશે. આ પછી તેમાં સ્વાદ પ્રમાણે મીઠું, અજમો અને બેકિંગ સોડા નાખીને સારી રીતે મિક્સ કરી લો.
આ પછી તેમાં ચણાનો લોટ નાખો અને હાથથી સારી રીતે મિક્સ કરી લેવું અને પાપડીનો લોટ બાંધવો. આ લોટ વધારે કઠણ કે વધારે નરમ પણ ના બાંધવો.
પાપડી ગાંઠિયા બનાવવાનો સંચો લેવો અને તેને તેલથી ગ્રીસ કરવો. આ પછી બાંધેલા લોટમાંથી થોડો લોટ સંચાની અંદર નાખવો.
બીજી તરફ ગેસ પર એક કડાઇમાં તેલ ગરમ કરવું અને સંચાની મદદથી પાપડી ગાંઠીયા પાડવા. તળાઇ જાય પછી તેને ઝારાની મદદથી બહાર એક ડીશમાં લઇ લેવા.
આ રીતે તમારા ફરસાણની દુકાન જેવા સ્વાદીષ્ટ અને પોચા પાપડી ગાંઠીયા તૈયાર થઇ જશે. તમે તેને કઢી, મરચું, ડુંગળી કે ચા સાથે ખાઇ શકો છો.