શિયાળામાં બનાવો આદુ પાક, આ રીતથી બનશે બજાર જેવો ટેસ્ટી

શિયાળાની શરુઆત થઈ ગઈ છે. ત્યારે મોટાભાગના ઘરોમાં વસાણા બનવા લાગ્યા છે. ત્યારે આદુ પાક પણ શિયાળાનું શ્રેષ્ઠ વસાણું છે.

આદુ પાક બનાવવો સરળ છે. અહીં માપ સાથે સરળ રીત આપેલી છે. જેનાથી બજાર જેવો જ આદુ પાક બનશે.

સામગ્રી

200 ગ્રામ આદુ, ઘઉંનો કરકરો લોટ, 1 કપ ઘી, 1 કપ ગોળ,ડ્રાયફ્રૂટ, 2 ચમચી ખાવાનો ગુંદર,1 ચમચી ખસખસ, 3 ચમચી સુકાયેલું નારિયેળ, 1 ચમચી ગંઠોળા પાઉડર, 2 ચમચી મગતરીના બીજ

આદુની પેસ્ટ બનાવવી

સૌથી પહેલા આદુ લઈને સારી રીતે ધોઈને નાના કાણાવાળી ખમણીથી ગ્રેડ કરી લો. એકદમ પેસ્ટ જેવું થઈ જાય એવી રીતે ખમણો.

આદુની પેસ્ટને ઘીમાં શેકીશું

હવે એક પેનમાં બે ચમચી ઘી લઈને તેમાં આદુની પેસ્ટ નાંખીને ધીમા તાપે શેકીશું, આદુનો રંગ બદલાય અને ઘી છૂટુ પડે ત્યા સુધી શેકવાનું છે.

ખાવાનો ગુંદર તળીશું

હવે એક પેનમાં બે ચમચી ઘી લઈને ખાવાનો ગુંદર તળીને બાજુ પર કાઢી લઈશું અને આ ઘીમાં એક કપ ઘઉંનો કરકરો લોટ લઈને શેકીશું.લોટ બદામી રંગનો થાય ત્યાં સુધી શેકશું.

આદુની પેસ્ટ ઉમેરીશું

લોટ શેકતી વખતે જરૂર પડે તો ઘી ઉમેરવું અને બદામી રંગનો થાય ત્યારે તેમાં શેકેલી આદુની પેસ્ટ ઉમેરવી. ત્યાર બાદ તેમાં બે ચમચી સુકા નાળિયેરનો પાઉડર ઉમેરીશું.

માસાલ ઉમેરીશું

ત્યારબાદ તેમાં મગતરીના બીજ, ગંઠોળા પાઉડર, ડ્રાયફ્રૂટ્સ અને તળેલો ગુંદર ઉમેરીને બરોબર મીક્સ કરીશું.

ગોળ ઉમેરીશું

બધું બરોબર મીક્સ થઈ જાય ત્યારે ઝીણો સમારેલો ગોળ ઉમેરીને ગેસ બંધ કરી બરોબર મીક્સ કરીશું. થાળીમાં કાઢીને સેટ કરી ઉપરથી ખસખસના બીજ અને ડ્રાયફ્રૂટ્સથી ગાર્નિસ કરીશું.