Apr 14, 2025
ગુજરાતનું સાપુતારા હિલ સ્ટેશન સૌથી વધુ પ્રખ્યાત છે. તે સિવાય પણ અમુક હિલ સ્ટેશન ફેમસ છે, જેનું કુદરતી સૌંદર્ય જોઇ પ્રવાસીઓ આશ્ચર્ય પામે છે. ગુજરાતમાં આવું જ એક હિલ સ્ટેશન છે જેનું નામ અંગ્રેજ અધિકારીના નામ પરથી પડ્યું છે.
વિલ્સન હિલ સ્ટેશન ગુજરાતનું વલસાડ તાલુકાના ધરમપુર તાલુકામાં આવેલું છે. ઉંચા પહાડ, લીલાછમ જંગલ, પક્ષીઓનો કલરવ પ્રવાસીઓના મનને શાંતિ આપે છે.
વિલ્સન હિલ દરિયાની સપાટીથી 2500 ફુટની ઉંચાઇ પર આવેલું હોવાથી અહીં ઉનાળામાં પણ ગરમી લાગતી નથી. વિલ્સન હિલને મિની સાપુતારા પણ કહેવાય છે.
વિલ્સન હિલ સ્ટેશનનું નામ મુંબઇના ગવર્નર અંગ્રેજ અધિકારી લોર્ડ વિલ્સન પરથી પડ્યું છે. વિલ્સન હિલ્સનું નિર્માણ લોર્ડ વિલ્સન અને ધરમપુરના છેલ્લા રાજા વિજય દેવજી દ્વારા કરવામાં આવ્યું હતું.
વિલ્સન હિલ સ્ટેશન પર ઘણા જોવાલાયક સ્થળો છે. જેમા પંગરબારી વન્યજીવ અભ્યારણ, બરુમલ શિવ મંદિર, લેડી વિલ્સન મ્યુઝિયમ, નેચરલ હિસ્ટરી ગેલેરી, ડોલ વિભાગ, ફિલાટેલિક અને આર્મ્સ વિભાગ મુખ્ય આકર્ષણો છે.
સહ્યાદ્રિ પર્વતમાળાના ખોળામાં આવેલી વિલ્સન હિલ્સ પ્રકૃતિ પ્રેમીઓ માટે સ્વર્ગ સમાન છે. ઉંચા પહાડ, લીલાછમ વૃક્ષોનું બનેલું જંગલ, વિવિધ પક્ષીઓ જોવા મળે છે. ઉંચા પર્વત પર પ્રવાસીઓ ટ્રેકિંગની પણ મજા માણી શકે છે.
ભારતમાં બહુ ઓછા હિલ સ્ટેશન છે જ્યાંથી દરિયો દેખાય છે. વિલ્સન હિલ સ્ટેશનથી તિથલ બીચ નજીક છે. વિલ્સન હિલ તેમાનું એક છે જ્યાં પ્રવાસીઓ દરિયા અને પર્વતનો નજારો જોવાની મજા માણી શકે છે. ચોમાસાના વરસાદમાં વિલ્સન હિલ્સ સોળે કળાએ ખીલી ઉઠે છે.
વિલ્સન હિલ સ્ટેશન વાયા સુરત વલસાડ થઇ પહોંચી શકાય છે. સૌથી નજીકનું રેલવે સ્ટેશન વલસાડ છે, જે 55 કિમી દૂર આવેલું છે. મુંબઇ જતી ટ્રેનો વલસાડ થઇ જાય છે. સૌથી નજીકનું વિમાનમથક સુરત એરપોર્ટ 130 કિમી દૂર છે. અમદાવાદથી વિલ્સન હિલ સ્ટેશન 365 કિમી દૂર છે.
વિલ્સન વિલ સ્ટેશનની સૌથી નજીક સાપુતારા હિલ સ્ટેશન છે, જે 72 કિમી દૂર આવેલું છે.