Diwali Festive Shopping Tips : તહેવારોની મોસમ એ ભરપૂર આનંદ, ઉજવણી અને ખરીદીનો સમય છે. પરિવારો માટે એક સાથે ભેગા થવાનો, ભેટ-સોગાંદની આપ-લે કરવાનો, ઘરને સજાવવાનો અને પરિવારજનો-મિત્રો સાથે આનંદપૂર્વક સુખદ સમય પસાર કરવાનો આ સમય છે. જો કે, તહેવારોની આ સિઝનમાં ઘણો ખર્ચ થાય છે. કેટલીક વખત ઉત્સાહમાં આવી તહેવારોમાં વધારે ખર્ચ કરવાના પગલે પાછળથી નાણાંકીય સમસ્યાનો પણ સામનો કરવો પડે છે.
આ દિવાળીના તહેવારની સિઝનમાં તમે અહીંયા જણાવેલી 11 ટીપ્સ અપનાવી તમે તમારા બજેટનો મહત્તમ ઉપયોગ કરીને તહેવારનો ભરપૂર આનંદ માણી શકો છો.
ફેસ્ટિવ શોપિંગનું પ્રથમ પગલું છે બજેટ નક્કી કરવું. તમારી નાણાકીય સદ્ધરતા સાથે સમાધાન કર્યા વગર તમારી ખર્ચ કરવાની મર્યાદા નક્કી કરો. આવેગજન્ય ખરીદીઓને રોકવા માટે આ બજેટ તમારું માર્ગદર્શક પુરું પાડશે. યાદ રાખો કે, તહેવારોની ઉજવણી કરવાની સાથે સાથે ઘણી બધી નાણાકીય જવાબદારીઓ પણ પૂર્ણ કરવાની છે.
શોપિંગની યાદી બનાવો (Diwali Festive Shopping List)
તહેવારોની ખરીદી શરૂ કરવાની પહેલા એક શોપિંગ લિસ્ટ બનાવો જેમાં ભેટો, ડેકોરેશનઅને અન્ય કોઈપણ આવશ્યક વસ્તુઓનો સમાવેશ થાય છે. બિનજરૂરી ખરીદીઓ ટાળવા માટે તમારી શોપિંગ લિસ્ટને વળગી રહો, આમ કરવાથી તમારા બજેટ કરતા વધારે ખર્ચ થવાની શક્યતા ઓછી હશે.
કિંમતોની સરખામણી કરો
કઇ વસ્તુ ઑફલાઇન અથવા ઑનલાઇન સસ્તામાં વેચાઇ રહી છે? પહેલાના સમયમાં માત્ર ઓનલાઈન જ સસ્તી ચીજો વેચાતી હતી, જો કે હવે એવું રહ્યુ નથી. સોસાયટીના બહારની આવેલી દુકાનો પણ સ્પર્ધાત્મક કિંમતે ચીજવસ્તુઓને વેચાણ કરી રહી છે. તમે જે વસ્તુઓ ખરીદવાનો પ્રયાસ કરી રહ્યાં છો તેની કિંમતોની સરખામણી કરવા માટે થોડો સમય ફાળવો, ખાસ કરીને મોટી રકમની મોંઘી ચીજવસ્તુઓ માટે. ઘણી વખત નજીકની સ્ટોરમાં વેચાતી વસ્તુ પણ ઓછી કિંમતે મળી શકે છે, તેથી ઑનલાઇન ઑફર્સમાં ખરીદી કરવાની ઉતાવળ કરશો નહીં.
કેશબેક અને રિવર્ડનો ઉપયોગ કરો (Festive Offers Cashback And Rewards)
ઘણા ક્રેડિટ કાર્ડ્સ કેશબેક અને રિવોર્ડ પ્રોગ્રામ ઓફર કરે છે. તમે તહેવારોની સિઝનની ખરીદી પર કેશબેક અથવા રિવર્ડ મેળવી શકો છો કે કેમ તે જોવા માટે તમારા કાર્ડના નિયમો અને શરતો તપાસો. આ આદત તમને નાણાં બચાવવા અથવા ભાવિ ખર્ચ માટે પોઈન્ટ કમાવવામાં મદદ કરી શકે છે. ઘણા કાર્ડ્સ પસંદગીની બ્રાન્ડ્સ પર ઝડપી રિવર્ડ ઓફર કરે છે, જે તમારી ખરીદીને સસ્તી બનાવે છે.
ક્રેડિટ કાર્ડ્સ પર નો-કોસ્ટ ઈએમઆઈ (Credit Cards No Cost EMI)
તહેવારોની મોસમ દરમિયાન સ્માર્ટ ખરીદી કરવાની એક રીત તમારા ક્રેડિટ કાર્ડ પર નો-કોસ્ટ ઇએમઆઈ વિકલ્પનો લાભ લેવાનો છે. ઘણી ક્રેડિટ કાર્ડ કંપનીઓ આ સુવિધા આપે છે, જે તમને તમારી ઉંચા-મૂલ્યની ખરીદીઓને શૂન્ય વ્યાજ સાથે સરળ માસિક હપ્તામાં રૂપાંતરિત કરવાની મંજૂરી આપે છે. વધારાના ખર્ચ કર્યા વિના તમારા ફેસ્ટિવલ શોપિંગના ખર્ચને વધારવાની આ એક સરસ રીત છે. વધુમાં, તમારે વધારાની પર્સનલ લોન અથવા કન્ઝ્યુમર ડ્યુરેબલ લોનની જરૂર પડશે નહીં કારણ કે તમને કોઈ વધારાનો ખર્ચ વગર નાણાંકીય સુવિધા મળે છે.
ભેટ-સોગાદ અને સાજ-સજાવટ
બધા માટે ભેટો ખરીદવાની જરૂર નથી. તમારા પોતાના હાથે ગિફ્ટ તૈયાર કરવો અથવા તમારી રીતે ઘરને સુશોભિત કરવાનું વિચારો. હાથથી બનાવેલી ભેટમાં વ્યક્તિગત લાગણીઓ હોય છે અને તેથી તેને સ્ટોરમાંથી ખરીદેલી ભેટો કરતાં વધુ કિંમતી ગણવામાં આવશે. તે તમારા ફાજલ સમયમાં તમારા માટે એક મનોરંજક, આરામદાયક પ્રવૃત્તિ પણ બની શકે છે.
કૂપન્સ અને પ્રોમો કોડ્સનો ઉપયોગ કરો
કોઈપણ ઓનલાઈન ખરીદી કરતા પહેલા, કૂપન અને પ્રોમો કોડ શોધો. ડિસ્કાઉન્ટ અને ડીલ્સ માટે સમર્પિત ઘણી વેબસાઇટ્સ અને એપ્લિકેશન્સ છે. તેઓ વિશિષ્ટ કોડ પ્રદાન કરે છે જે તમને તમારી ખરીદી પર બચત કરવામાં મદદ કરી શકે છે. તમારા ક્રેડિટ કાર્ડ પ્રોવાઇડર્સને પૂછો કારણ કે તેઓ તમને મોટી રકમના ખર્ચ પર ઇન્સેન્ટિવ વિશે માહિતી આપશે.
વહેલી ખરીદી કરો
છેલ્લી ઘડીના ધસારાને ટાળો, કારણ કે વધારે ખર્ચ તમારા બજેટને ઝડપથી બગાડી શકે છે અને તમારી ખરીદીને અસંતોષકારક બનાવી શકે છે. તહેવારો માટે વહેલી ખરીદી શરૂ કરવી જોઇએ, આમ કરવાતી તમને તમારી માટે બેસ્ટ ડીલ્સ શોધવામાં, ઉપલબ્ધ તમામ વિકલ્પો ચકાસવામાં અને સૌથી વધુ ફાયદાકારક ડિસ્કાઉન્ટનો લાભ લેવા માટે પુરતો સમય મળશે.
લોયલ્ટી પ્રોગ્રામ્સ અને રિવર્ડ
જો તમે તમારા મનપસંદ સ્ટોર પર લોયલ્ટી પ્રોગ્રામના મેમ્બર છો, તો તમારા રિવર્ડ અને કુલ પોઈન્ટ્સનો ફાયદો મેળવવાનો આ યોગ્ય સમય છે. કેટલાક સ્ટોર્સ તેમના વફાદાર ગ્રાહકો માટે ખાસ ડિસ્કાઉન્ટ અથવા વેચાણની પ્રારંભિક ઍક્સેસ ઓફર કરે છે. બીજું, રિવોર્ડ પ્રોગ્રામ તમારા ક્રેડિટ અને ડેબિટ કાર્ડ પર પણ ઉપલબ્ધ છે. જો તમે પોઈન્ટ્સ એકઠા કરી રહ્યાં છો અથવા ઑફર્સ માટે પાત્ર છો, તો તેનો ફાયદો ઉઠવવાનો પ્રયાસ કરો.
પ્રાઇસ એલર્ટ સેટ કરો
તમે ખરીદવા માંગો છો તે ચોક્કસ વસ્તુઓ માટે એલર્ટ સેટ કરવા માટે કિંમત ટ્રેકિંગ ટુલ્સ અથવા એપ્લિકેશનોનો ઉપયોગ કરો. જ્યારે પ્રોડક્ટ્સની કિંમત ઘટશે ત્યારે આ ટુલ્સ તમને જાણકારી આપશે, જે તમને શક્ય તેટલી બેસ્ટ કિંમતે ખરીદવાની મંજૂરી આપશે.
બિનજરૂરી ખરીદી ટાળો
ફેસ્ટિવલની લલચામણી જાહેરાતો ખોટા ખરાબ નિર્ણયો અને આવેગજન્ય ખરીદી તરફ દોરી શકે છે. પરંતુ તમારી શોપિંગ લિસ્ટ અને તમારા બજેટને વળગી રહેવાનું યાદ રાખો. તમારી યાદીમાં એવી ચીજવસ્તુઓ ઉમેરવાનું ટાળો કે જે ખરીદવાની યોજના ન હતી. જો તમે ખરેખર બિનઆયોજિત કંઈક ખરીદવા માંગતા હો, તો ખરીદીને 24-કલાકની કસોટીમાં પાસ થવા દો. આ 24 કલાકમાં તે વસ્તુ ખરીદવી તમારી માટે કેમ જરૂરી છે, અને પછી નિર્ણય લે.
આ પણ વાંચો | સિમ કાર્ડ સ્વેપથી હેકર્સ લૂંટી રહ્યા છે તમારી મહેનતની કમાણી; સાયબર ફ્રોડની નવી મોડસ ઓપરેન્ડી અને બચવાની રીત જાણો
તહેવારોની સિઝન એ ઉજવણી કરવાનો સમય છે અને સ્માર્ટ શોપિંગ તમને તમારા બજેટનો મહત્તમ ઉપયોગ કરવામાં મદદ કરી શકે છે. ભવિષ્યની યોજના ઘડવાનું યાદ રાખો, શોપિંગ લિસ્ટ બનાવો, કિંમતોની તુલના કરો અને તમારા ક્રેડિટ કાર્ડમાંથી કેશબેક અને રિવર્ડનો ઉપયોગ કરો. નો-કોસ્ટ ઇએમઆઈ એ વ્યાજ ચૂકવ્યા વગર મોટી રકમની ખરીદી કરવાની સુવિધા આપતી તકો છે.
