5 Diwali Resolutions : આ વખતે દિવાળી પર કરો આ 5 સંકલ્પ, જીવનભર ધન-સંપત્તિનો મળશે આશીર્વાદ

5 Financial Resolutions for Diwali 2023 : દિવાળી પર, દરેક વ્યક્તિ ધનની દેવી લક્ષ્મીની પૂજા કરે છે. એટલે કે આ તહેવાર ધન અને સંપત્તિના મહત્વ સાથે સંબંધિત છે. પરંતુ જો તમે જીવનમાં સંપત્તિના મહત્વને યોગ્ય રીતે સમજો છો અને તમારા ભવિષ્યને આર્થિક રીતે સુધારવા માંગો છો, તો વર્ષમાં માત્ર એક દિવસ લક્ષ્મીની પૂજા કરવી પૂરતું નથી. આ માટે તમારે દિવાળી પર કેટલાક નાણાકીય સંકલ્પો લેવા જોઈએ, જેનાથી તમને હંમેશા ફાયદો થશે. ચાલો આવા જ કેટલાક સરળ નાણાકીય સંકલ્પો વિશે વાત કરીએ, જેને અમલમાં મૂકીને તમે જીવનભર સંપત્તિનો આનંદ માણી શકો છો.

1. બજેટ બનાવો અને ખર્ચ કરો

તમે પહેલાથી જ જાણતા હોય તેવા ખર્ચ માટે બજેટ બનાવવાની આદત પાડો. બજેટ બનાવવાની અને હિસાબ રાખવાની આદત ભલે જુની લાગે, પરંતુ આ જૂની આદત આજે પણ એટલી જ ફાયદાકારક છે. વર્ષમાં એકવાર લીધેલી રજા હોય કે, સપ્તાહના અંતે બહાર ખાવાનું આયોજન હોય કે, દિવાળીની ઉજવણી હોય. જો તમે આ બધા પર ખર્ચ કરતા પહેલા બજેટ બનાવો અને તેનો અમલ કરો તો તમને તેનો ઘણો ફાયદો મળી શકે છે.

2. થોડા દિવસો માટે મોંઘા ખર્ચને મુલતવી રાખવાનો પ્રયાસ કરો

મોંઘા ખર્ચના નિર્ણયો થોડા સમય માટે મુલતવી રાખો. કોઈપણ વસ્તુ પર મોટી રકમ ખર્ચતા પહેલા ઓછામાં ઓછો એક મહિનાનો સમય લો. કાર બદલતા પહેલા, કિચન મેકઓવર કરતા પહેલા અથવા આવો કોઈ પણ મોટો ખર્ચો, જેમાં તમારી જાતને રોકવાનો પ્રયત્ન કરો. જો એ ખર્ચ ખરેખર જરૂરી હોય તો, એક મહિના પછી પણ એટલો જ જરૂરી રહેશે. તમને એ વિચારીને નવાઈ લાગશે કે, એક મહિના પછી આમાંથી ઘણા બધા ખર્ચ તમારા માટે એટલા મહત્વના નહી લાગે, જેટલા પહેલા લાગતા હતા.

3. સરપ્લસ ફંડમાં રોકાણ કરો

તમારી પાસે જે પણ ફાજલ ફંડ છે, તેને રોકાણ કરવાની આદત બનાવો. તમારા પગારની તારીખના એક દિવસ પહેલા તમારું બેંક એકાઉન્ટ તપાસો. દર મહિને થોડી રકમ બચાવવાની કોશિસ કરો અને બાકીના પૈસા ઈન્ટરનેટ બેન્કિંગનો ઉપયોગ કરીને રોકાણ કરો. આ નિયમિત રોકાણ માટે રિકરિંગ ડિપોઝિટ (RD) અથવા SIP નો પણ ઉપયોગ કરી શકાય છે. આવા નિયમિત રોકાણ લાંબા ગાળે તમારા માટે મોટી સંપત્તિ સર્જક સાબિત થઈ શકે છે.

4. તમારી સંપત્તિઓની યાદી બનાવો

તમારી બધી સંપત્તિઓને એક્સેલ શીટમાં સૂચિબદ્ધ કરો. આ લીસ્ટ તમારા ઘર, જ્વેલરી, એફડીથી શરૂ કરો અને પછી તમારા બધા ઇક્વિટી શેર અને મ્યુચ્યુઅલ ફંડ સહિત અન્ય વસ્તુઓ તેમાં ઉમેરો. આ લીસ્ટમાં, તમારે મિલકતની કિંમત, જથ્થો, હોલ્ડિંગ વિગતો અને જો શક્ય હોય તો વર્તમાન બજાર કિંમત દાખલ કરવી જોઈએ. તમારી તમામ સંપત્તિનો આ દસ્તાવેજ તમારી વસિયતનામું બનાવવાથી લઈને તમારા નાણાકીય આયોજનમાં ખૂબ મદદરૂપ સાબિત થશે. ઉપરાંત, તે તમારા પરિવારના સભ્યો માટે કોઈપણ દુર્ભાગ્યપૂર્ણ પરિસ્થિતિમાં ખૂબ ઉપયોગી થશે.

5. બિન-આવશ્યક બેંક ખાતાઓ બંધ કરો

એવા બેંક ખાતાઓને ઓળખો જેની તમને હવે જરૂર નથી. આપણામાંથી ઘણા લોકોના નામ પર બેંક એકાઉન્ટ હોઈ શકે છે, જે અગાઉની નોકરી દરમિયાન ખોલવામાં આવ્યા હતા, પરંતુ નોકરી બદલ્યા પછી તેનો ઉપયોગ બંધ થઈ ગયો છે. ઘણી વખત નાની રકમ વર્ષો સુધી ત્યાં પડી રહે છે. આજના યુગમાં જ્યારે તમામ બેંક ખાતાઓ PAN અને આધાર નંબર સાથે જોડાયેલા છે, ત્યારે આટલા બેંક ખાતા રાખવાનો કોઈ અર્થ નથી. કદાચ તમે તેમને લાંબા સમયથી બંધ કરવા વિશે વિચારી રહ્યાં છો, પરંતુ તેમ કરવા માટે સક્ષમ નથી. તો આ વખતે દિવાળી પર, એક કે બે મહત્વપૂર્ણ ખાતા સિવાયના તમામ બિનઉપયોગી બેંક ખાતાઓને એક પછી એક બંધ કરવાનો સંકલ્પ કરો.