સોનાની પાછળ પાછળ ચાંદીના ભાવ પણ ઐતિહાસિક ઉંચી સપાટીને પહોંચ્યા છે. સ્થાનિક ઝવેરી બજારમાં 13 એપ્રિલ, 2023ના રોજ 1 કિગ્રા ચાંદીની કિંમત ઇતિહાસમાં પહેલીવાર 76,000 રૂપિયા થઇ છે, જે અત્યાર સુધીનો સૌથી ઉંચો ભાવ છે. સોનું પણ ઓલટાઇમ હાઇ બોલાઇ રહ્યું છે. સોના-ચાંદીના ભાવ સર્વોચ્ચ સપાટીએ પહોંચતા સામાન્ય માણસ માટે બંને કિંમતી કોમોડિટીની ખરીદી ગજા બહારની વાત બની રહી છે.
ઇતિહાસમાં પહેલીવાર ચાંદી 76,0000
અમદાવાદના ઝવેરી બજારમાં ચાંદીની કિંમતમાં પ્રતિ કિગ્રા દીઠ 500 રૂપિયાનો વધારો થયો હતો. આ સાથે 1 કિગ્રા ચાંદી ચોરસાનો ભાવ વધીને 76,000 રૂપિયા થયો હતો, જે અત્યાર સુધીન સૌથી ઉંચો ભાવ છે. તેવી જ રીતે ચાંદી રૂપૂની કિંમત પણ પ્રતિ કિગ્રા દીઠ 75,800 રૂપિયા થઇ હતી.
વર્ષ 2023માં ચાંદી કેટલી મોંઘી થઇ
આર્થિક મંદી અને મોંઘવારી વચ્ચે સોના-ચાંદીના ભાવ સતત વધી રહ્યા છે. જો ચાંદીની વાત કરીયે તો 13 એપ્રિલ, 2023ના રોજ ચાંદીની કિંમત 76000 રૂપિયાની ઐતિહાસિક ઉંચી સપાટીએ પહોંચી ગઇ છે. આમ ચાલુ મહિનામાં ચાંદી અત્યાર સુધી 4000 રૂપિયા મોંઘી થઇ છે. 31 માર્ચ, 2023ના રોજ 1 કિગ્રા ચાંદીનો ભાવ 72000 રૂપિયા હતો. તો ચાલુ કેલેન્ડર વર્ષ 2023માં ચાંદી 8500 રૂપિયા મોંઘી થઇ છે. 31 ડિસેમ્બર 2022ના રોજ સ્થાનિક બજારમાં 1 કિગ્રા ચાંદીની કિંમત 67500 રૂપિયા હતી.
ચાલુ વર્ષે સોનું 5900 રૂપિયા મોંઘુ થયુ છે.
સોનાના ભાવ પણ હાલ સતત ઐતિહાસિક ઉંચી સપાટી બનાવી રહ્યા છે. 12 એપ્રિલે સ્થાનિક બજારમાં સોનાએ પ્રતિ 10 ગ્રામ દીઠ 62600 રૂપિયાનો સર્વોચ્ચ ભાવ બનાવ્યો હતો. જે 13 એપ્રિલના રોજ માત્ર 100 ઘટીને 62500 રૂપિયા થયો છે. આમ કેલેન્ડર વર્ષ 2023માં સોનાના ભાવ પ્રતિ 10 ગ્રામ દીઠ 6000 રૂપિયા વધી ગયા છે.
વાયદા બજારમાં પણ ચાંદી 76000ની પાર
વાયદા બજારમાં ચાંદીના ભાવ તો 76000 રૂપિયાની સપાટીને કુદાવી ગયા છે. એમસીએક્સ ખાતે ચાંદીનો મે વાયદો 500 રૂપિયાની તેજી સાથે 76411ની ઉંચી સપાટીને સ્પર્શ્યો હતો. તો જૂન વાયદો ઉપરમાં 77655 રૂપિયા સુધી બોલાયો હતો. ચાંદીની જેમ સોનામાં પણ તેજી તરફી માહોલ હતો. સોનાનો ઓગસ્ટ વાયદો તેજી સાથે ઉપરમાં 62981 બોલાયો હતો. તો ઓગસ્ટ વાયદો પણ 61000ની સપાટી કુદાવીને 61453 રૂપિયા પર ટ્રેડ થઇ રહ્યો હતો.
આ પણ વાંચોઃ શેર બજાર કરતા સોના-ચાંદીમાં દમદાર રિટર્ન, FY23માં ગોલ્ડ-સિલ્વરની કિંમત 15 ટકા જેટલી વધી
સોના-ચાંદીના ભાવ વધવાના કારણો
- વૈશ્વિક બુલિયન બજારમાં સોના-ચાંદીની કિંમતોમાં તેજી
- યુએસ ફેડ રિઝર્વ દ્વારા વ્યાજદરમાં વૃદ્ધિની ગતિ ધીમી પડવાની શક્યતાઓ
- અમેરિકા-યુરોપની બેન્કિંગ કટોકટીથી
- સમગ્ર દુનિયામાં આર્થિક મંદીના એંધાણા
- આર્થિક કટોકટી અને મોંઘવારીથી બચવા સોના-ચાંદીમાં સેફ-હેવન ખરીદી
- યુએસ ડોલર સામે ભારતીય રૂપિયાના મૂલ્યમા એકંદરે ધોવાણ
- શેરબજારમાં અસ્થિરતા
- ભારતમાં કોરોના વાયરસના કેસોમાં ફરી વધારો
