Tax Calculator: આવકવેરા વિભાગે લોન્ચ કર્યું ટેક્સ કેલ્ક્યુલેટર, જાણો કેવી રીતે ઉપયોગ કરવો

Income Tax Calculator: ઇન્કમ ટેક્સ કેલ્ક્યુલેટરઃ આવકવેરા વિભાગે નવું સરળ ટેક્સ કેલ્ક્યુલેટર લોન્ચ કર્યું છે. આ ટેક્સ કેલ્ક્યુલેટર આવકવેરા વિભાગની સત્તાવાર વેબસાઇટ પર કરદાતાઓને મદદ કરવાના આશયથી ઉપલબ્ધ કરાવવામાં આવ્યું છે. કરદાતાઓ નાણાકીય વર્ષ 2024-25 અને 2025-26 માટે નવી કર વ્યવસ્થા હેઠળ તેમની બચતનું મૂલ્યાંકન કરી શકે છે. બજેટ 2025માં નાણામંત્રી નિર્મલા સીતારમણે 12 લાખ રૂપિયા સુધીની વાર્ષિક આવકને ટેક્સ ફ્રી કરવાની જાહેરાત કરી છે.

આવકવેરા વિભાગ દ્વારા પૂરા પાડવામાં આવેલા આ નવા સાધનની મદદથી કરદાતાઓ તેમની આવક અને પાત્ર કપાત દાખલ કરીને જૂની અને નવી કર વ્યવસ્થામાં તેમની કર જવાબદારી વિશે જાણકારી મેળવી શકે છે.

નોંધનીય છે કે સરકાર નવી કર વ્યવસ્થાને ડિફોલ્ટ સિસ્ટમ બનાવવા પર જોરશોરથી કામ કરી રહી છે. બજેટ 2025 માં 12 લાખ રૂપિયા સુધીની આવકને કરમુક્ત કર્યા પછી, નવી કર વ્યવસ્થા હવે જૂની કર વ્યવસ્થા કરતા વધુ આકર્ષક બની ગઈ છે. આ ઉપરાંત નવી કર વ્યવસ્થામાં બેઝિક છૂટની મર્યાદા પણ 3 લાખ રૂપિયાથી વધારીને 4 લાખ રૂપિયા કરવામાં આવી છે.

Tax Calculator : ટેક્સ કેલ્ક્યુલેટર કેવી રીતે કા કરે છે

કરદાતાઓ આવકવેરા વિભાગની વેબસાઇટ પર આવકવેરા કેલ્ક્યુલેટરને એક્સેસ કરી શકે છે અને કઇ કર વ્યવસ્થા વધુ ફાયદાકારક છે તે નક્કી કરવા માટે તેનો ઉપયોગ કરી શકે છે. વપરાશકર્તાઓએ તેમની રહેણાંક સ્થિતિ પસંદ કરવી પડશે અને તેમની કરપાત્ર આવક દાખલ કરવી પડશે (મૂડી લાભ જેવી વિશેષ દરની આવકને બાદ કરતા). ત્યારબાદ આ સાધન નાણાકીય વર્ષ 2024-25 માટે વર્તમાન કર દરો અને ફાઇનાન્સ બિલ 2025 (નાણાકીય વર્ષ 2025-26) હેઠળ સુધારેલા દરો હેઠળ તેમની કુલ કર જવાબદારીની તુલના કરે છે.

ટેક્સ કેલ્ક્યુલેટરમાં નવી કર વ્યવસ્થા હેઠળની ચોખ્ખી કર બચત પર પ્રકાશ પાડવામાં આવ્યો છે, જે કરદાતાઓને સુધારેલા રિવોર્ડ ટેક્સ સ્લેબને કારણે 1 એપ્રિલ, 2025 થી કેટલી બચત કરી શકે છે તેનું સ્પષ્ટ ચિત્ર આપે છે.

તમને જણાવી દઈએ કે નવી કર વ્યવસ્થા, જે નાણાકીય વર્ષ 2020-21 માં રજૂ કરવામાં આવી હતી. તેને વધુ આકર્ષક બનાવવા માટે તેમાં અનેક સુધારા કરવામાં આવ્યા છે. તેમા અમુક નવી બાબતોઉમેરવામાં આવી છે:

ડિફોલ્ટ ટેક્સ રિઝિમ (Default Tax Regime)

નવી કર વ્યવસ્થા એક સરળ માળખું પ્રદાન કરે છે અને તે ડિફોલ્ટ વિકલ્પ બને છે.

નવી મૂળભૂત મુક્તિ મર્યાદા: (Revised Basic Exemption Limit)

1 એપ્રિલ, 2025 થી મૂળભૂત મુક્તિ મર્યાદા 3 લાખ રૂપિયાથી વધીને 4 લાખ રૂપિયા થઈ જશે.

વધુ ટેક્સ રિબેટ (Higher Tax Rebate)

હાલમાં કલમ 87એ હેઠળ 7 લાખ રૂપિયા સુધીની આવક ધરાવતા વ્યક્તિઓ માટે 25,000 રૂપિયાની ટેક્સ છૂટ મળે છે. નાણાકીય વર્ષ 2025-26થી આ છૂટ વધીને 60,000 રૂપિયા થઈ જશે, જેનાથી 12 લાખ રૂપિયા સુધીની આવક પર ઝીરો ટેક્સ જવાબદારી સુનિશ્ચિત થશે.

મર્યાદિત કર કપાતો (Limited Tax Deductions)

જુની કર વ્યવસ્થા જેમ જ નવી કર વ્યવસ્થામાં પણ કર કપાત મર્યાદિત છે. જોકે, પગારદાર કરદાતાઓ હજુ પણ રૂપિયા 75000 સુધીના સ્ટાન્ડર્ડ ડિડક્શનનો દાવો કરી શકે છે. આ ઉપરાંત કંપની દ્વારા કલમ 80સીસીડી (2) હેઠળ ટિયર-1 એનપીએસ એકાઉન્ટમાં બેઝિક સેલરીના મહત્તમ 14 ટકાની કપાતનો દાવો કરી શકાય છે. આ કપાત નાણાકીય વર્ષ 2025-26માં રહેશે.

આ ફેરફારો સાથે, સરકાર ટેક્સ ફાઇલિંગને સરળ બનાવવા અને વધુને વધુ કરદાતાઓને નવી કર વ્યવસ્થા અપનાવવા માટે પ્રોત્સાહિત કરવાનું લક્ષ્ય ધરાવે છે. આવકવેરાનું કેલ્ક્યુલેટર 1 એપ્રિલ, 2025, અમલીકરણ તારીખ પહેલાં વ્યક્તિઓને જાણકાર નાણાકીય નિર્ણયો લેવામાં મદદ કરવા માટે એક મહત્વપૂર્ણ સાધન સાબિત થશે.