India Economy : ભારત હાલ વિશ્વની પાંચમી સૌથી મોટી અર્થવ્યવસ્થા છે અને તે 2030 સુધીમાં જાપાનને પાછળ રાખીને 7300 અબજ અમેરિકી ડોલરના જીડીપી સાથે વિશ્વની ત્રીજી સૌથી મોટી અર્થવ્યવસ્થા બની જશે. જ્યારે એશિયાની બીજી સૌથી મોટી અર્થવ્યવસ્થા બની જશે. એસએન્ડપી ગ્લોબલ ઇન્ડિયા મેન્યુફેક્ચરિંગે તેના તાજેતરના પરચેઝિંગ મેનેજર્સ ઇન્ડેક્સ (પીએમઆઈ)માં આ વાત કહી છે. વર્ષ 2021 અને 2022માં શાનદાર આર્થિક વૃદ્ધિ પછી ભારતીય અર્થવ્યવસ્થા નાણાકીય વર્ષ 2023માં પણ સતત પ્રગતિ કરી છે. માર્ચ 2024માં પૂરા થતા નાણાકીય વર્ષમાં ભારતનું કુલ ઘરેલું ઉત્પાદન (જીડીપી) 6.2-6.3 ટકા વધવાની ધારણા છે. આથી ભારતીય અર્થવ્યવસ્થા આ નાણાકીય વર્ષમાં સૌથી ઝડપથી વધનારી પ્રમુખ અર્થવ્યવસ્થા રહેશે.
S&Pએ શું કહ્યું?
એસએન્ડપી ગ્લોબલે જણાવ્યું હતું કે આગામી સમયગાળામાં ભારતની અર્થવ્યવસ્થામાં વધુ વૃદ્ધિની અપેક્ષા છે. અમેરિકન ડોલરની દ્રષ્ટિએ માપવામાં આવતા વર્તમાન કિંમતમાં ભારતની જીડીપી 2022માં 3500 અબજ અમેરિકન ડોલરથી વધીને 2030 સુધીમાં 7300 અબજ અમેરિકન ડોલર થવાનો અંદાજ છે. આર્થિક વિસ્તરણની આ તેજી રહેતા 2030 સુધીમાં ભારતીય જીડીપીનું કદ જાપાનના જીડીપી કરતા વધુ હશે. જેનાથી ભારતને એશિયા-પેસિફિક ક્ષેત્રમાં બીજા ક્રમની સૌથી મોટી અર્થવ્યસ્થા બની જશે.
આ પણ વાંચો – સામાન્ય લોકો માટે શરૂ થઈ NAMO bharat train, જાણો કેટલું હશે ભાડું અને કઈ સુવિધાઓ મળશે
અમેરિકા હાલમાં 25500 અબજ અમેરિકન ડોલરની જીડીપી સાથે વિશ્વની સૌથી મોટી અર્થવ્યવસ્થા છે. આ પછી ચીન 18000 અબજ અમેરિકન ડોલર સાથે બીજા ક્રમની સૌથી મોટી અર્થવ્યવસ્થા છે. જ્યારે જાપાન 4200 અબજ ડોલર સાથે ત્રીજા ક્રમની સૌથી મોટી અર્થવ્યવસ્થા છે. ભારતીય જીડીપીનું કદ 2022માં બ્રિટન અને ફ્રાન્સના જીડીપીથી પણ વધારે થઇ ગયું છે. 2030 સુધીમાં ભારતનો જીડીપી જર્મનીથી પણ આગળ નીકળી જાય તેવો અંદાજ છે.
પીએમ મોદીએ કહી ચુક્યા છે આ વાત
વડાપ્રધાન નરેન્દ્ર મોદીએ 15 ઓગસ્ટે લાલ કિલ્લા પરથી ભારતની અર્થવ્યવસ્થા વિશે વાત કરી હતી. આ સિવાય પીએમ મોદીએ દિલ્હીના પ્રગતિ મેદાન ખાતે ‘ભારત મંડપમ’નું ઉદ્ઘાટન કરતાં ગેરન્ટી આપી હતી કે તેમની સરકારના ત્રીજા કાર્યકાળમાં ભારત વિશ્વની ત્રણ સૌથી મોટી અર્થવ્યવસ્થાઓમાં સામેલ થશે. તે સતત આ વિશે વાત કરી રહ્યા છે.
