Ola Electric : ઓલા લોન્ચ કરશે પહેલું ADAS થી સજ્જ ઇલેક્ટ્રિક સ્કૂટર, લીક રિપોર્ટમાં મળી મહત્વપૂર્ણ વિગતો

Ola Electric First ADAS scooter Ola S1 Pro Sport Launch Soon : ઓલા ઇલેક્ટ્રિક ઘણીવાર ખોટા કારણોસર હેડલાઇન્સ બનાવે છે, પરંતુ બેંગલુરુ સ્થિત ઇલેક્ટ્રિક વાહન ઉત્પાદક ઓટોમોબાઇલ્સ સેક્ટરમાં અમુક અભૂતપૂર્વ ઇનોવેશન રજૂ કરવા માટે પ્રશંસાને પાત્ર છે. અને એવું લાગે છે કે નજીકના ભવિષ્યમાં કેટલાક વધુ ઇનોવેશન કરવાની યોજના ધરાવે છે, જેના વિશે અમુક વિગતો મીડિયા રિપોર્ટમાં લીક થઇ છે.

રશલેનના રિપોર્ટ અનુસાર ઓલા ઇલેક્ટ્રિક પોતાના ફ્લેગશિપ ઇલેક્ટ્રિક સ્કૂટર એસ1 પ્રો સ્પોર્ટના વધુ એક એડવાન્સ વર્ઝન પર કામ કરી રહી છે. આ નવું ઇલેક્ટ્રિક સ્કૂટર માત્ર ઇલેક્ટ્રિક સ્કૂટરમાં જ નહીં પરંતુ ટુ-વ્હીલર માર્કેટમાં પણ ટેક્નોલોજી ક્ષેત્રે એક નવા માપદંડો સ્થાપિત કરશે. તે કહેવું ખોટું નહીં હોય કે તે ભારતીય બજારમાં સૌથી વધુ ફીચર-સમૃદ્ધ ટુ-વ્હીલર હશે.

Ola S1 Pro Sport :ઓલા એસ1 પ્રો સ્પોર્ટઃ રિવાઇઝ્ડ સ્ટાઇલિંગ

મીડિયા રિપોર્ટમાં કહેવામાં આવ્યું છે કે આગામી ઓલા એસ1 પ્રો સ્પોર્ટ એસ1 લાઇનઅપના બાકીના મોડેલો કરતા અલગ હશે, જેમાં સ્ટ્રીટ એસ્થેટિક ફેરિંગ્સ અને વર્ટિકલ રેસિંગ સ્ટ્રાઇપ્સ સાથે પાછળના ભાગમાં સ્પ્લિટ ગ્રેબ રેલ્સનો સમાવેશ થાય છે. લીક થયેલી તસવીરોમાં દેખાતા અન્ય વિશિષ્ટ આકર્ષણોમાં નવા રીઅર-વ્યૂ મિરર્સ, નવા સીટ કવર્સ, સ્વિંગ આર્મ કવર્સ, ફ્લોરમેટ્સ અને બોડી ડેકલ્સનો સમાવેશ થાય છે. જો કે, સુંદરતા કરતાં, તેની કાર્યક્ષમતા સંભવિત ગ્રાહકોને પ્રભાવિત કરશે.

ઓલા એસ1 પ્રો સ્પોર્ટ: બિલ્ડમાં અગ્રણી ફીચર્સ

એસ1 પ્રો સ્પોર્ટ ભારતનું પહેલું ટુ-વ્હીલર હશે, જે એડવાન્સ્ડ ડ્રાઇવર આસિસ્ટન્સ સિસ્ટમ (એડીએએસ)થી સજ્જ હશે. ઓલા લાંબા સમયથી ADAS ટેક્નોલોજી પર કામ કરી રહી છે, જે કારમાં જોવા મળતી ટેક્નોલોજીથી સંપૂર્ણપણે અલગ છે. આગામી ઓલા એસ1 પ્રો સ્પોર્ટમાં, એડીએએસ શહેરી વાતાવરણમાં સવારીના અનુભવને સુધારવા પર વધુ ધ્યાન કેન્દ્રિત કરશે. આ સિસ્ટમ વાહનચાલકને સલામત શહેરી સવારી સુનિશ્ચિત કરવા માટે રીઅલ-ટાઇમ એલર્ટ પ્રાપ્ત કરવામાં સક્ષમ બનાવશે.

તેમાં બીજું એક રસપ્રદ લક્ષણ એ છે કે ફ્રન્ટ ડેશકેમ છે જે ઘણા હેતુઓ પૂરા કરી શકે છે, પરંતુ વધુ મહત્ત્વની વાત એ છે કે, તે રસ્તા પર કોઈ અનિચ્છનીય ઘટનાની સ્થિતિમાં સવારને મદદ કરશે, જે કમનસીબે દેશભરમાં એક સામાન્ય ઘટના બની ગઈ છે. આશા છે કે કંપની આ ફીચરની જાહેરાત વ્લોગર્સને ધ્યાનમાં રાખીને કરશે. એસ1 પ્રો સ્પોર્ટમાં અપેક્ષિત અન્ય નોંધપાત્ર વિશેષતાઓમાં 7 ઇંચની ટીએફટી ટચસ્ક્રીન, એબીએસ સાથે બ્રેક-બાય-વાયર, ટ્રેક્શન કન્ટ્રોલ, રાઇડ મોડ, મોટર સાઉન્ડ અને એડેપ્ટિવ બુસ્ટનો સમાવેશ થાય છે.

ઓલા એસ1 પ્રો સ્પોર્ટ : નવી ઇલેક્ટ્રિક મોટર

લુક અને ફીચર્સ ઉપરાંત ઓલા પાવરટ્રેનમાં પણ કેટલાક મહત્વના ફેરફાર કરે તેવી આશા છે. ઓલા સ્થાનિક રીતે ઉત્પાદિત નવી 13 કિલોવોટ (17.43 બીએચપી) ફેરાઇટ ઇલેક્ટ્રિક મોટરનો ઉપયોગ કરશે. આનાથી આયાતી દુર્લભ પૃથ્વી પદાર્થો પરની નિર્ભરતામાં ઘટાડો થશે, જે હાલમાં ઓછો પુરવઠો ધરાવે છે. બાદમાં આ બેટરી પેકનો ઉપયોગ ઓલાના અન્ય મોડલમાં પણ કરવામાં આવશે.

આ ઇલેક્ટ્રિક મોટરને 5.2 kWh બેટરી પેક સાથે જોડવામાં આવે તેવી શક્યતા છે, જે 320 કિ.મી.ની પ્રમાણિત આઇડીડીસી રેન્જ ધરાવતી હોવાનો દાવો કરવામાં આવી રહ્યો છે. પરફોર્મન્સની વાત કરીએ તો એસ1 પ્રો સ્પોર્ટની ટોપ સ્પીડ 141 કિમી પ્રતિ કલાકની છે અને તે માત્ર 2.1 સેકન્ડમાં 0થી 40 કિમી પ્રતિ કલાકની ઝડપ પકડી શકે છે. ઓલાએ ઇન-હાઉસ મૂવઓએસ અને બેટરી સિસ્ટમમાં પણ કેટલાક સુધારા કર્યા હોવાના અહેવાલ છે.