Share Market News: સેન્સેક્સ 501 પોઇન્ટ તૂટ્યો, નિફ્ટી 25000 નીચે બંધ, રોકાણકારોએ ₹ 2.5 લાખ કરોડ ગુમાવ્યા

શેરબજારમાં ઘટાડાથી રોકાણકારોને 2.5 લાખ કરોડ રૂપિયાનું જંગી નુકસાન થયું છે. શુક્રવારે બીએસઇ પર લિસ્ટેડ તમામ કંપનીઓની કુલ માર્કેટકેપ 458.37 લાખ કરોડ રૂપિયા થઇ હતી. જ્યારે ગુરુવારે બીએસઇની માર્કેટકેપ 460.87 લાખ કરોડ રૂપિયા થઇ હતી. શુક્રવારે બીએસઇ પર 1657 શેર વધીને જ્યારે 2394 શેર ઘટીને બંધ રહેતા માર્કેટ બ્રેડ્થ નેગેટિવ રહી હતી.

એક્સિસ બેંક સવા 5 ટકા ઘટી 1099 રૂપિયા બંધ થયો હતો, જેનું કારણ નબળા પરિણામ છે. બેંક શેરમાં ભારે વેચવાલીથી બેંક નિફ્ટી ઇન્ડેક્સ 545 પોઇન્ટ તૂટ્યો હતો. સેન્સેક્સના 30 માંથી 23 શેર ઘટ્યા હતા. જેમા એક્સિસ બેંક સવા 5 ટકા ઘટી સેન્સેક્સનો ટોપ લૂઝર સ્ટોક બન્યો હતો. તો બીઇએલ 2.4 ટકા, ભારતી એરટેલ 1.4 ટકા, એચડીએફસી બેંક 1.5 ટકા અને કોટક બેંક 1.5 ટકા ઘટ્યા હતા. તો બીજી બાજુ બજાર ફિનસર્વ 2 ટકા, ટાટા સ્ટીલ 1.9 ટકા, આઈસીઆઈસીઆઈ બેંક, એચસીએલ ટેક અને ઇન્ફોસિસના શેર અડધા ટકા આસપાસ વધ્યા હતા.

શેરબજાર ભારે વેચવાલીના પગલે શુક્રવારે મોટા ઘટાડે બંધ થયું છે. સેન્સેક્સ 501 પોઇન્ટ ઘટી 81757 અને નિફ્ટી 143 પોઇન્ટ ઘટી 24968 બંધ થયો છે. એટલે કે સેન્સેક્સ 82000 અને નિફ્ટી 25000ના મહત્વપૂર્ણ સપોર્ટ લેવલ નીચે બંધ થયા છે. ટ્રેડિંગ સેશન દરમિયાન સેન્સેક્સ 82334 થી 81608 અને નિફ્ટી 25144 થી 24918 રેન્જમાં અથડાયો હતો. બેંકિંગ અને આઈટી શેરમાં ભારે વેચવાલીથી માર્કેટ તૂટ્યું છે.

રિલાયન્સ રિટેલ કંપનીએ હોમ એપ્લાયન્સિસ બ્રાન્ડ કેલ્વિનેટર હસ્તગત કરવાની શુક્રવારે જાહેરાત કરી છે. રિલાયન્સ રિટેલે શુક્રવારે ભારતના ઝડપથી વિકસતા કન્ઝ્યુમર ડ્યુરેબલ્સ બજારમાં તેની સ્થિતિ મજબૂત કરવા માટે હોમ એપ્લાયન્સિસ બ્રાન્ડ કેલ્વિનેટરના સંપાદનની જાહેરાત કરી છે. આ અધિગ્રહણનો ઉદ્દેશ્ય ઉચ્ચ-ગુણવત્તાવાળા, વૈશ્વિક સ્તરે બેન્ચમાર્ક કરેલ ઉપકરણોને ભારતીય ઘરો માટે વધુ સુલભ બનાવવાનો છે.

શેરબજારમાં શુક્રવારે ભારે વેચવાલીના પગલે સેન્સેક્સ 500 પોઇન્ટનો કડાકો બોલાયો અને 82000નું સપોર્ટ લેવલ તોડી 81800 નીચે ઉતરી ગયા હતા. તો એનએસઇ નિફ્ટી પણ 160 પોઇન્ટથી વધુ તૂટ્યો અને 25000નું મહત્વપૂર્ણ લેવલ તોડીને 24950 નીચે ટ્રેડ કરી રહ્યા છે.

એક્સિસ બેંક શેર 4 ટકાથી વધુ ઘટી સેન્સેક્સનો ટોપ લૂઝર સ્ટોક બન્યો છે. જૂન ક્વાર્ટરના નબળાં પરિણામથી સેન્ટિમેન્ટ ખરડાતા એક્સિસ બેંક શેર 4 ટકાથી વધુ ઘટી 1073 રૂપિયા થયો હતો. ભારતીય એરટેલ 1.4 ટકા, ટેક મહિન્દ્રા 1 ટકાથી વધુ ઘટ્યા હતા. એપ્રિલ જૂન 2025 ત્રિમાસિકમાં એક્સિસ બેંકનો ચોખ્ખો નફો 4 ટકા ઘટીને 5806 કરોડ રૂપિયા થયો છે. તો નેટ ઇન્ટરેસ્ટ ઇન્કમ માત્ર 0.8 ટકા વધીને 13560 કરોડ રૂપિયા થઇ છે.

શુક્રવારે સેન્સેક્સ નિફ્ટી ઘટાડે ખુલ્યા બાદ અંડર પ્રેશર હતા. સેન્સેક્સ પાછલા બંધ 82259 સામે શુક્રવારે 82193 ખુલ્યો હતો. બેંક સ્ટોકમાં વેચવાલીના દબાણથી સેન્સેક્સ 170 પોઇન્ટથી વધુ તૂટીને 82036 સુધી ગયો હતો. એનએસઇ નિફ્ટી પાછલા બંધ 25111 સામે શુક્રવારે 25108 ખુલ્યો હતો.