Share Market News: શેરબજારમાં બિહાર ચૂંટણીમાં NDA જીતનો જશ્ન, સેન્સેક્સ નિફ્ટી સતત પાંચમાં દિવસે વધ્યા

બીએસઇના 1974 શેર વધીને જ્યારે 2189 શેર ઘટીને બંધ થતા માર્કેટ બ્રેડ્થ નેગેટિવ થઇ હતી. આજે બીએસઇની માર્કેટકેપ 473.94 લાખ કરોડ રૂપિયા થઇ હતી, જે ગઇકાલે 473.20 લાખ કરોડ રૂપિયા થઇ હતી. આમ શુક્રવારે શેરબજારના રોકાણકારોની સંપત્તિ 74 કરોડ રૂપિયા વધી હતી.

મિડકેપ 12 પોઇન્ટ ઘટ્યો હતો જ્યારે સ્મોલકેપ 34 પોઇન્ટ વધ્યો હતો. સુધારો યથાવત રહેતા કન્ઝ્યુમર ડ્યુરેબલ્સ 221 પોઇન્ટ અને કેપિટલ ગુડ્સ 109 પોઇન્ટ, બેંકેક્સ 204 પોઇન્ટ વધ્યા હતા. જ્યારે ઓઇલ ગેસ, મેટલ,ઓટો અને આઈટી ઇન્ડેક્સ નોંધપાત્ર ઘટ્યા હતા.

સેન્સેક્સના 30 માંથી 19 બ્લુચીપ શેર વધ્યા હતા. જેમા ઇટરનલ 2 ટકા, બીઇએલ 1.7 ટકા, ટ્રેન્ટ 1.6 ટકા, એક્સિસ બેંક 1.5 ટકા અને એસબીઆઈ 1.4 ટકા વધી સેન્સેક્સના ટોપ 5 ગેઇનર શેર બન્યા હતા. તો સૌથી વધુ ઘટેલા 5 શેરમાં ઇન્ફોસિસ 2.6 ટકા, TMPV 1.6 ટકા, ટાટા સ્ટીલ 1.4 ટકા, આઈસીઆઈસીઆઈ બેંક 1 ટકા અને ટેક મહિન્દ્રા અડધા ટકા ઘટ્યા હતા.

શેરબજાર સતત પાંચમાં દિવસે વધીને બંધ થયા છે. બિહાર વિધાનસભા ચૂંટણી પરિણામમાં એનડીએ ગઠબંધનની જીતના સંકેતથી સેન્સેક્સ 84 પોઇન્ટ વધી 84562 બંધ થયો છે. એનએસઇ નિફ્ટી 31 પોઇન્ટના સુધારામાં 25910 બંધ થયો છે. આમ તો સેન્સેક્સ 400 પોઇન્ટથી વધુ ઘટાડે 84060 ખુલ્યો હતો. પરંતુ ત્યારબાદ બેંક અને ફાઈનાન્સ શેરમાં તેજી અને બિહાર ચૂંટણીમાં એનડીએની જીતના જુસ્સાથી સેન્સેક્સ વધીને 84,697 ઇન્ટ્રા-ડે ટોચ સુધી પહોંચ્યો હતો. નિફ્ટીની ઇન્ટ્રા ડે ટ્રેડિંગ રેન્જ 25,940 થી 25,740 હતી.

Inflation Rate Down In India : ઓક્ટોબરમાં જથ્થાબંધ ફુગાવો -1.21 ટકા થયો છે. ઓઇલ – ગેસ, શાકભાજી અને કઠોળ જેવી ખાદ્યચીજોના ભાવ ઘટ્યા મોંઘવારી દર ઘટ્યો છે. ઉપરાંત જીએસટીમાં ઘટાડાથી પણ ફુગાવાનો દર નીચે આવ્યો છે. …વધુ વાંચો

Anil Ambani ED Summons : અનિલ અંબાણીએ ફેમા કેસમાં સમન્સ જારી કર્યા બાદ એન્ફોર્સમેન્ટ ડિરેક્ટોરેટ સમક્ષ વર્ચ્યુઅલી હાજર થવાની ઓફર કરી હતી. તમને જણાવી દઇયે કે, તાજેતરમાં ઇડીએ અનિલ અંબાણી અને તેમની કંપનીની 7500 કરોડ રૂપિયાની સંપત્તિ જપ્ત કરી હતી. …અહીં વાંચો

ફેડરલ રિઝર્વ દ્વારા વ્યાજદરમાં ઘટાડા વિશે અનિશ્ચિતતા તથા ટેકનોલોજી શેરમાં મોંઘી વેલ્યૂએશનના કારણે અમેરિકન બજાર તૂટ્યા છે. તેની અસરે શુક્રવારે એશિયન બજારોમાં પણ ઘટાડો જોવા મળ્યો છે. ગુરુવારે યુએસ માર્કેટનો એસએન્ડપી 500 ઇન્ડેક્સ 1.7 ટકા અને નાસ્ડેક 100 ઇન્ડેક્સ 2.1 ટકા ઘટીને બંધ થયો છે. શુક્રવારે પાઉન્ડ પર માર્કેટની નજર રહેશે. માર્કેટ રિપોર્ટ મુજબ બ્રિટનના ચાન્સેલર રેચલ રીવ્સ આવકવેરો વધારવાની યોજના ટાળી શકે છે. અમેરિકામાં 43 દિવસનું શટડાઉન સમાપ્ત થયા બાદ તેના આર્થિક આંકડાઓ પર નજર રહેશે. આ દરમિયાન ડિસેમ્બરમાં ફેડ રેટ ઘટવાની સંભાવના 50 ટકાથી નીચે આવી ગઇ છે.

ગ્લોબલ માર્કેટના નબળાં સંકેતના લીધે શુક્રવારે મોટાભાગના એશિયન બજારોમાં મંદીનો માહોલ હતો. જાપાનના નિક્કેઇ શેરબજારમાં 800 પોઇન્ટનો કડાકો બોલાયો હતો. હોંગકોંગ બજાર 300 પોઇન્ટ, તાઇવાન 300 પોઇન્ટ, કોરિયન માર્કેટ 90 પોઇન્ટ અને સિંગાપોર શેરબજાર 40 પોઇન્ટ ઘટાડે ટ્રેડ કરી રહ્યા છે.

સેન્સેક્સ નિફ્ટી શુક્રવારે મોટા ઘટાડે ખુલ્યા હતા. વૈશ્વિક બજારોના નબળાં સંકેત અને બિહાર વિધાનસભા ચૂંટણી પરિણામમાં એનડીએની જીત અંગે અનિશ્ચિતતાના પગલે ભારતીય શેરબજાર દબાણ હેઠળ હતા. સેન્સેક્સ પાછલા બંધ 84,478 સામે 418 પોઇન્ટ ઘટીને આજે 84,060 ખુલ્યો હતો. એનએસઇ નિફ્ટી પાછલા બંધ 25,879 લેવલની સામે આજે 112 પોઇન્ટ ઘટી 25,767 ખુલ્યો છે.