Smartphone Safety Tips: મોબાઈલ વરસાદના પાણીમાં પલળી ગયો છે તો ગભરાશો નહીં, આ 4 ટીપ્સ તમારા ફોનને બગડતા બચાવશે

Safety Tips To Protect your Smartphone During Monsoon: આજના સમયમાં મોબાઈલ ફોન બહુ ઉપયોગી ચીજ બની ગઇ છે. સ્માર્ટફોનથી આંગળીના ટેરવાં પર ઘણા બધા કામકાજ બેઠા બેઠા થઇ જાય છે. સ્માર્ટફોન વાપરતી વખતે બહુ સાવધાની રાખવી જરૂરી છે, ખાસ કરીને ચોમાસાના વરસાદમાં મોબાઈલની અંદર પાણી ઘુસી જવાથી બગડી શકે છે. ચોમાસાના વરસાદનું પાણી સ્માર્ટફોનની અંદર જંતુ રહેતો ગભરાશો નહીં, અહીં આપેલી 4 ટીપ્સ વડે તમારા મોબાઇલને બગડતા બચાવી શકાય છે.

સ્માર્ટફોન સ્વિચ ઓફ કરો

સ્માર્ટફોનમાં પાણી જતું રહે તો સૌથી પહેલા મોબાઇલ સ્વિચ ઓફ કરી દો. ફોન સ્વિચ ઓફ ન કરવામાં આવે તો શોર્ટ સર્કિટ થઇ શકે છે. જો પાણીમાં પડી ગયા બાદ ફોન ઓટોમેટિક બંધ થઇ જાય તો ચાર્જિંગમાં લગાવી મોબાઇલ ચાલુ કરવાની કોશિશ કરવી નહીં, ફોનની અંદરનું પાણી સુકાય ત્યાં સુધી રાહ જુઓ.

હેર ડ્રાયર કે બ્લોઅર વાપરવો નહીં

વરસાદનું પાણી મોબાઇલ ફોનમાં જતું રહે તો ઘણા લોકો હેર ડ્રાયર કે બ્લોઅર વડે પાણી સુકવવાની કોશિશ કરી છે, જે યોગ્ય રીત નથી. ગરમ હવાથી મોબાઇલના પાર્ટ્સને નુકસાન થઇ શકે છે. આથી પાણીમાં પલળેલા ફોનને સ્વિચ ઓફ કરી પંખાની હવામાં સુકાવા દો. જો ફોન ચાલુ ન થાય તો સર્વિસ સેન્ટરનો સંપર્ક કરો.

ચોખાના ડબ્બામાં ફોન મૂકો

ફોનની અંદરનું પાણી શોષવા અને ભેજ દૂર કરવા માટે મોબાઇલને ચોખાના ડબ્બામાં મૂકવો જોઇએ. પાણીમાં ભીના થયેલો મોબાઇલ ફોન 24 થી 48 કલાક સુધી ચોખા ભરેલા વાસણમાં મૂકી રાખો. ચોખા ફોનમાં રહેલું પાણી શોષી લેશે.

વોટરપ્રુફ બેગ વાપરો

ચોમાસામાં વરસાદના પાણીથી મોબાઈલ ફોન સુરક્ષિત રાખવા વોટરપ્રુફ બેગનો ઉપયોગ કરવો જોઇએ. ઉપરાંત પાણી વાળા ભીના હાથે ફોનની સ્કીનને ટચ કરવાનું ટાળો. ભેજ વાળી જગ્યા પર મોબાઇલ ફોન મુકવો જોઇએ નહીં.