Tata Capital IPO: ટાટા ગ્રૂપની આ કંપની લાવશે IPO, રોકાણકારો માટે કમાણીનો મોકો, જાણો બધી જ વિગત

Tata Capital IPO News: ટાટા ગ્રૂપ વધુ એક કંપનીનો આઈપીઓ લાવી રહ્યું છે. ટાટા કેપિટલ IPO લાવવા માટે તૈયારીઓ શરૂ થઇ ગઇ છે. ટાટા ગ્રૂપની આ ફાઈનાન્સ સર્વિસ કંપનીએ સત્તાવાર રીતે સેબીને ડ્રાફ્ટ પેપર્સ ફાઇલ કર્યા છે. તેને આ વર્ષના સૌથી વધુ રાહ જોવાતા IPO પૈકી એક માનવામાં આવે છે. આઈપીઓ ઇશ્યુ સંબંધિત મહત્વપૂર્ણ માહિતીથી લઈને તેની પાછળની વ્યૂહરચના સુધી, ટાટા કેપિટલ IPO વિશે તમારે જે જાણવાની જરૂર છે તે બધું અહીં છે.

Tata Capital IPO : ટાટા કેપિટલ આઈપીઓ

ટાટા કેપિટલે એપ્રિલમાં IPO માટે દસ્તાવેજો ફાઇલ કર્યા હતા અને જુલાઈમાં સેબીની મંજૂરી મળ્યા પછી, તેણે હવે તેનું અપડેટેડ ડ્રાફ્ટ રેડ હેરિંગ પ્રોસ્પેક્ટસ (DRHP) સબમિટ કર્યું છે. તેની પ્રાઇસ બેન્ડ અને તારીખો ટૂંક સમયમાં જાહેર કરવામાં આવશે.

આગામી IPO હેઠળ, બજારમાં કુલ 47.58 કરોડ શેર ઓફર કરવામાં આવી શકે છે, જેમાં 21 કરોડ નવા શેર જારી કરવામાં આવશે અને 26.58 કરોડ શેર હાલના રોકાણકારો દ્વારા વેચવામાં આવશે. આમાંથી, ટાટા કેપિટલની પેરેન્ટ કંપની ટાટા સન્સ 23 કરોડ શેર વેચશે, જ્યારે પ્રારંભિક રોકાણકાર ઇન્ટરનેશનલ ફાઇનાન્સ કોર્પોરેશન (IFC) 3.58 કરોડ શેર ઓફર કરશે. એટલે કે, આ IPO કંપની માટે નવી મૂડી એકત્ર કરવાની તક અને જૂના રોકાણકારો માટે બહાર નીકળવાની તક બંને લાવી રહ્યું છે.

Tata Capital IPO : ટાટા કેપિટલ આઈપીઓ કેમ લાવી રહી છે?

ટાટા કેપિટલનો IPO ફક્ત ભંડોળ એકત્ર કરવા માટે નથી, પરંતુ તેની પાછળ એક મહત્વપૂર્ણ નિયમનકારી કારણ પણ છે. વાસ્તવમાં, રિઝર્વ બેંક ઓફ ઈન્ડિયા (RBI) એ ટાટા કેપિટલને "ઉચ્ચ સ્તર" NBFC ની કેટેગરીમાં મૂકી છે. આ કેટેગરીમાં આવતી કંપનીઓ માટે સપ્ટેમ્બર 2025 સુધીમાં શેરબજારમાં લિસ્ટેડ થવું ફરજિયાત છે. તેથી, ટાટા કેપિટલ હવે આઈપીઓ લાવી રહી છે જેથી તે RBI ના નવા નિયમોનું પાલન કરી શકે અને મોટી નોન-બેંકિંગ કંપનીઓ માટે નિર્ધારિત પારદર્શિતા અને શાસનની શરતોને પૂર્ણ કરી શકે.

Tata Capital IPO : ટાટા કેપિટલ આઈપીઓના ભંડોળનું ઉપયોગ ક્યા કરશે?

ટાટા કેપિટલ IPO દ્વારા એક્ત્ર કરવામાં થનાર ભંડોળનો ઉપયોગ તેના ટાયર 1 કેપિટલને મજબૂત બનાવવા માટે કરશે. આનાથી કંપનીની ધિરાણ ક્ષમતા વધશે અને તે ઝડપથી વિકસતા NBFC ક્ષેત્રમાં તેના વ્યવસાયનો વિસ્તાર કરી શકશે. એટલે કે, આ રોકાણ કંપનીની વૃદ્ધિ અને ધિરાણ શક્તિ બંનેને મજબૂત બનાવશે.

Tata Capital IPO : કંપનીનું પ્રદર્શન

નાણાકીય વર્ષ 2024-25માં ટાટા કેપિટલનું પ્રદર્શન ઉત્તમ રહ્યું હતું. કંપનીનો ચોખ્ખો નફો લગભગ 10% વધીને રૂ. 3,655 કરોડ થયો, જ્યારે કાર્યકારી આવક 57% વધીને રૂ. 25,719 કરોડ થઈ. 31 માર્ચ, 2025 સુધીમાં, ટાટા કેપિટલની લોન બુક રૂ. 2.26 લાખ કરોડ હતી, જે તેને ભારતની ત્રીજી સૌથી મોટી વૈવિધ્યસભર NBFC બનાવે છે. આ આંકડા દર્શાવે છે કે કંપની મજબૂત નાણાકીય પાયા પર ઉભી છે અને ભવિષ્યના વિકાસ માટે સંપૂર્ણપણે તૈયાર છે.

ટાટા કેપિટલના IPO ને દેશ અને વિશ્વની ઘણી મોટી રોકાણ બેંકો દ્વારા હેન્ડલ કરવામાં આવી રહી છે. આ યાદીમાં કોટક મહિન્દ્રા કેપિટલ, એક્સિસ કેપિટલ, સિટી, BNP પરિબાસ, HDFC બેંક, HSBC, ICICI સિક્યોરિટીઝ, IIFL, SBI કેપિટલ અને JP મોર્ગન જેવા નામો શામેલ છે. IPO ના રજિસ્ટ્રાર તરીકે MUFG Intime ની નિમણૂક કરવામાં આવી છે. મોટી નાણાકીય સંસ્થાઓની ભાગીદારી સ્પષ્ટ કરે છે કે આ IPO ખૂબ જ મહત્વપૂર્ણ બનવાનો છે.