Vande Bharat Express Ticket Booking : ભારતીય રેલવેએ ટ્રેન મુસાફરો માટે સારા સમાચાર આપ્યા છે. હવે વંદે ભારત ટ્રેનમાં મુસાફરી કરવાના માત્ર 15 મિનિટ પહેલાં મુસાફરો ટ્રેન ટિકિટ બુક કરાવી શકશે. આ માટે ભારતીય રેલવેએ પેસેન્જરની રિઝર્વેશન સિસ્ટમમાં ફેરફાર કર્યા છે. રિઝર્વેશન સિસ્ટમમાં આ ફેરફારનો હેતુ છેલ્લી ઘડી સુધી ટિકિટ મેળવતા મુસાફરોની સુવિધામાં સુધારો કરવાનો છે. જો કે આ નિયમ માત્ર 8 વંદે ભારત એક્સપ્રેસ પર લાગુ કરવામાં આવ્યો છે.
દક્ષિણ રેલ્વે ઝોન દ્વારા સંચાલિત વંદે ભારત ટ્રેનો પર આ નિયમ લાગુ કરવામાં આવ્યો છે. આ અંગે ઝોનલ રેલવેએ જણાવ્યું હતું કે, દક્ષિણ રેલવે તરફથી દોડતી 8 વંદે ભારત ટ્રેનો માટે આ સુવિધા આપવામાં આવી છે. આ હેઠળ, ટ્રેનના પ્રસ્થાન સમયના 15 મિનિટ પહેલા સુધી રસ્તામાં સ્ટેશનો પર વર્તમાન રિઝર્વેશન કરી શકાય છે.
નવા નિયમથી ટ્રેન મુસાફરોને ફાયદો થશે
અગાઉ આ સુવિધા મર્યાદિત હતી, જેના કારણે મુસાફરો સ્ટેશનથી રવાના થયા બાદ ઇન રૂટ સ્ટેશનો પરથી ટ્રેન બુક કરાવી શકતા ન હતા. પરંતુ આ નવા નિયમ હેઠળ વંદે ભારત ટ્રેનોમાં ખાલી સીટ હવે રૂટના સ્ટેશનો પર વર્તમાન બુકિંગ માટે ઉપલબ્ધ થશે, જેનાથી મુસાફરોને ઘણો ફાયદો થશે અને ટ્રેનમાં સારી સીટ મળશે.
દક્ષિણ રેલ્વે દ્વારા સંચાલિત આ વંદે ભારત ટ્રેન ઉપડવાના માત્ર 15 મિનિટ પહેલા ટિકિટ બુક કરી શકાશે.
- ટ્રેન નંબર 20631 : મેંગલુરુ સેન્ટ્રલ – તિરુવનંતપુરમ સેન્ટ્રલ વંદે ભારત એક્સપ્રેસ
- ટ્રેન નંબર 20632 : તિરુવનંતપુરમ સેન્ટ્રલ – મેંગલુરુ સેન્ટ્રલ વંદે ભારત એક્સપ્રેસ
- ટ્રેન નંબર 20627 : ચેન્નાઈ એગમોર-નાગરકોઈલ વંદે ભારત એક્સપ્રેસ
- ટ્રેન નંબર 20628 : નાગરકોઇલ-ચેન્નાઈ એગમોર વંદે ભારત એક્સપ્રેસ
- ટ્રેન નંબર 20642 : કોઇમ્બતુર – બેંગલુરુ કેન્ટ વંદે ભારત એક્સપ્રેસ
- ટ્રેન નંબર 20646 : મેંગલુરુ સેન્ટ્રલ-મડગાંવ વંદે ભારત એક્સપ્રેસ
- ટ્રેન નંબર 20671 : મદુરાઈ-બેંગલુરુ કેન્ટ. વંદે ભારત એક્સપ્રેસ
- ટ્રેન નંબર 20677 : ડૉ. એમજીઆર ચેન્નાઈ સેન્ટ્રલ – વિજયવાડા વંદે ભારત એક્સપ્રેસ
દેશભરમાં 144 વંદે ભારત એક્સપ્રેસ ટ્રેન સક્રિય
હાલમાં દેશના વિવિધ રૂટ પર કુલ 144 વંદે ભારત એક્સપ્રેસ ટ્રેન ચાલી રહી છે. ભારતના રેલવે મંત્રી અશ્વિની વૈષ્ણવના જણાવ્યા અનુસાર વંદે ભારત એક્સપ્રેસ ટ્રેનો તમામ રૂટ પર 100 ટકાથી વધુ ક્ષમતા સાથે દોડી રહી છે. વૈષ્ણવે બુધવારે (30 જુલાઈ, 2025) લોકસભામાં જણાવ્યું હતું કે, “નાણાકીય વર્ષ 2024-25 અને 2025-26 (જૂન, 2025 સુધી) માં વંદે ભારત એક્સપ્રેસ ટ્રેનોની કુલ ક્ષમતા અનુક્રમે 102.01 ટકા અને 105.03 ટકા રહેશે.” ”
