Gujarat Police Recruitment 2024 updates, Police Bharti : એલઆરડી અને પીએસઆઈની શારીરિક કસોટીને લઇને પોલીસ ભરતી બોર્ડના અધ્યક્ષ હસમુખ પટેલે મહત્વની જાણકારી આપી છે. એક પ્રેસ કોન્ફરન્સમાં હસમુખ પટેલે કહ્યું હતું કે શારીરિક કસોટી ચોમાસા પછી લેવાશે. ઓક્ટોબર-નવેમ્બર મહિનાની આસપાસ શારીરિક કસોટી લેવામાં આવશે. આ પરીક્ષામાં કુલ કેટલી અરજી આવી છે તેના વિશે તેમણે કહ્યું હતું કે પીએસઆઈમાં 4.50 લાખ અરજી અને લોકરક્ષકમાં 9.83 લાખ અરજી આવી છે.
આ ઉમેદવારો માટે સુવર્ણતક?
પ્રેસ કોન્ફરન્સમાં હસમુખ પટેલે કહ્યું હતું કે અરજી કરવા માટે ઉમેદવારોને વધુ એક તક મળશે. ધોરણ 12 અને કોલેજના છેલ્લા વર્ષના વિધાર્થીઓ માટે અને જે લોકો યોગ્યતા ધરાવતા હશે તે ફરીથી ઓગસ્ટ-સપ્ટેમ્બરમાં ફરીથી અરજી કરી શકશે. ધોરણ 12 અને કોલેજ પાસ કરનાર વિદ્યાર્થીઓ માટે આશરે 15 દિવસ માટે અરજી કરવાનો સમય પણ અપાશે.
ગુજરાત પોલીસ ભરતી બોર્ડ દ્વારા તાજેતરમાં લોકરક્ષક, પીએસઆઈ સહિતની 12 હજાર કરતા વધારે પોસ્ટ માટે ભરતી બહાર પાડી હતી. જોકે આ ભરતી માટે અરજી કરવાની છેલ્લી તારીખ 30 એપ્રિલ 2024 રાખવામાં આવી હતી. જોકે, આ સમય મર્યાદામાં કોઈ કારણસર અરજી કરવાનું બાકી રહી ગયું હોય તેવા ઉમેદવારોને ફરી નવી તક મળશે.
આ પણ વાંચો – ગુજરાત હાઈકોર્ટ ભરતી : સ્નાતકો માટે ₹ 1.42 લાખ સુધીના પગારની નોકરીની તક, અહીં વાંચો સંપૂર્ણ માહિતી
નવા નિયમ સાથે યોજાશે પરીક્ષા
આ વખતે પોલીસ ભરતી નવા નિયમો સાથે યોજાશે. જે પ્રમાણે શારીરિક કસોટીમાં ઉમેદવારોના વજનને ધ્યાનમાં લેવામાં આવશે નહીં. તે સિવાય શારીરિક કસોટી હવે ફક્ત ક્વોલિફાઈંગ રહેશે એના કોઈ ગુણ આપવામાં આપશે નહીં.
ગુજરાત પોલીસ ભરતી : કયા પદ પર કેટલી ભરતી થશે?
ગુજરાત પોલીસ દ્વારા 12472 પદો પર ભરતી કરવામં આવશે. જેમાં બિન હથિયારધારી પોલીસ સબ ઇન્સ્પેક્ટરમાં 316 પુરુષ અને 156 મહિલા કર્મચારીની ભરતી કરવામાં આવશે. તો બિન હથિયારધારી પોલીસ કોન્સ્ટેબલમાં 4422 પુરુષ અને 2187 મહિલા ઉમેદવારની ભરતી કરાશે. હથિયારધારી પોલીસ કોન્સ્ટેબલ (એસઆરપીએફ) પદ માટે 1000 પુરુષ ઉમેદવાર પાસેથી અરજી મંગાવી છે. જેલ સિપાઇમાં 1013 પુરુષ અને 85 મહિલા કર્મીની ભરતી થશે.
