નકલી સરકારી ઓફિસ વિવાદ અંગે ગુજરાત વિધાનસભામાં સૂત્રોચ્ચાર, કોંગ્રેસના 10 ધારાસભ્યોને કરાયા સસ્પેન્ડ

પરિમલ ડાભી : વિધાનસભા પક્ષના નેતાઓ અમિત ચાવડા અને જીગ્નેશ મેવાણી સહિત કોંગ્રેસના દસ ધારાસભ્યોને મંગળવારે ગુજરાત વિધાનસભામાંથી સસ્પેન્ડ કરવામાં આવ્યા હતા કારણ કે તેઓએ રાજ્યમાં નકલી સરકારી કચેરીઓના ખુલાસા અંગે ગૃહમાં સૂત્રોચ્ચાર કર્યા હતા. ધારાસભ્યો ગૃહની બે બેઠકો સહિત બાકીના દિવસ માટે સસ્પેન્ડ રહેશે.

અમિત ચાવડા અને જીગ્નેશ મેવાણી ઉપરાંત સસ્પેન્ડ કરાયેલા અન્ય ધારાસભ્યોમાં તુષાર ચૌધરી, ગેનીબેન ઠાકોર, ગુલાબસિંહ ચૌહાણ, અમૃતજી ઠાકોર, અનંત પટેલ, ઈમરાન ખેડાવાલા, કાંતિ ખરાડી અને અરવિંદ લાડાણીનો સમાવેશ થાય છે.

આ ઘટના પ્રશ્નકાળ દરમિયાન પ્રથમ બેઠક દરમિયાન બની હતી જ્યારે, કોંગ્રેસના ધારાસભ્ય તુષાર ચૌધરીએ ઉઠાવેલા તારાંકિત પ્રશ્નને ચર્ચા માટે લેવામાં આવ્યો હતો. ચૌધરી આદિજાતિ વિકાસ વિભાગ હેઠળના છોટા ઉદેપુર જિલ્લામાં મળી આવેલી નકલી સરકારી કચેરી વિશે વિગતો જાણવા માગે છે.

ત્યારપછીની ચર્ચા દરમિયાન આદિજાતિ વિકાસ મંત્રી કુબેર ડીંડોરે માહિતી આપી હતી કે, છોટા ઉદેપુરના બોડેલી ખાતે આવેલી નકલી ઓફિસને રાજ્ય સરકાર હેઠળ કોઈ સત્તા નથી અને તે જાણવા મળતાની સાથે જ FIR નોંધવામાં આવી હતી અને પાંચ લોકોની ધરપકડ કરવામાં આવી હતી.

ડીંડોરએ જણાવ્યું હતું કે, આરોપી નકલી ઓફિસ દ્વારા આશરે રૂ. 21 કરોડ (સરકારી અનુદાનમાં) મેળવવામાં સફળ રહ્યો હતો. મંત્રીએ કહ્યું કે, નકલી ઓફિસ વિશે કોઈએ ફરિયાદ કરી નથી પરંતુ, સરકારે જાતે જ તેને શોધી કાઢ્યું અને તાત્કાલિક પગલાં લેવામાં આવ્યા.

ચૌધરીએ ત્યારબાદ આરોપ લગાવ્યો કે, છોટા ઉદેપુરમાં કુલ પાંચ નકલી સરકારી કચેરીઓ (વિવિધ વિભાગો હેઠળ) કાર્યરત જોવા મળી હતી અને આરોપીઓએ તેમના દ્વારા રૂ. 21 કરોડથી વધુ એકઠા કર્યા હતા.

કોંગ્રેસના ધારાસભ્ય અમૃતજી ઠાકોર એ જાણવા માગતા હતા કે, ડિંડોર દ્વારા દર્શાવેલ નકલી ઓફિસની શોધ કરતા પહેલા તેમણે છોટા ઉદેપુરમાં કેટલો સમય કામ કર્યું હતું. તેના પર મંત્રી ડિંડોરએ કહ્યું કે, તે 2016-17 થી કામ કરી રહ્યું છે અને 26 ઓક્ટોબર 2023 ના રોજ FIR નોંધવામાં આવી હતી.

આનાથી કોંગ્રેસના ધારાસભ્યો દ્વારા આ હકીકત પર ઉગ્ર પ્રતિક્રિયા આવી હતી કે, આ છેતરપિંડી પર આઠ વર્ષ સુધી કોઈનું ધ્યાન ગયું ન હતું. જવાબમાં, ડીંડોરે કહ્યું કે તેઓ ભૂતકાળનો ઉલ્લેખ કરવા માંગતા નથી (કોંગ્રેસ શાસન દરમિયાન) જ્યારે રાજ્યમાં ડુપ્લિકેટ શાળાઓ અને ભૂતિયા વર્ગોની જાણ કરવામાં આવી હતી.

ડીંડોરની પ્રતિક્રિયા બાદ, ધારાસભ્ય દળના નેતા અમિત ચાવડાની આગેવાની હેઠળ કોંગ્રેસના ધારાસભ્યો તેમની બેઠકો પરથી ઉભા થયા અને વાંધો નોંધાવ્યો. ચાવડાએ જણાવ્યું હતું કે, ગુજરાતમાં નકલી ઓફિસો અને નકલી ટોલ બૂથનો પર્દાફાશ થઈ રહ્યો હતો ત્યારે મંત્રી ભૂતકાળની વાત કરી રહ્યા હતા.

સ્પીકર શંકર ચૌધરીએ કોંગ્રેસના ધારાસભ્યોને તેમના પ્રશ્નોના જવાબ આપવા માટે મંત્રી મળશે તેવી વારંવાર ખાતરી સાથે બેસવા માટે કહ્યું પછી પણ તેઓ સૂત્રોચ્ચાર કરવાનું ચાલુ રાખ્યું. જો કે, વિપક્ષના ધારાસભ્યોએ તેમનો વિરોધ ચાલુ રાખ્યો હતો અને કેટલાક ગૃહના વેલમાં આવ્યા હતા.

ધારાસભ્યોના નામ લેતા, સ્પીકરે તેમને બેસવા કહ્યું, પરંતુ તેઓએ તેમનો વિરોધ ચાલુ રાખ્યો અને પછી વોકઆઉટ કર્યું. આમ આદમી પાર્ટી (AAP) ના ધારાસભ્ય હેમંત આહિર પણ કોંગ્રેસના ધારાસભ્યો સાથે વોકઆઉટમાં જોડાયા હતા.

આ પણ વાંચો - રાજસ્થાન અકસ્માત : સ્કોર્પિઓ ટ્રક પાછળ ઘુસી જતાં કચ્છના ડોક્ટર કપલ, એક બાળકી સહિત પાંચના મોત

આ પછી, વિધાનસભા અને સંસદીય બાબતોના પ્રધાન રૂષિકેશ પટેલે કોંગ્રેસના ધારાસભ્યોને બાકીના દિવસ માટે સસ્પેન્ડ કરવાની માંગ કરતો ઠરાવ દાખલ કર્યો હતો. આ પ્રસ્તાવને ઉદ્યોગ મંત્રી બળવંત સિંહ રાજપૂતે ટેકો આપ્યો હતો, જેના કારણે સ્પીકરે 10 ધારાસભ્યોને સસ્પેન્ડ કરી દીધા હતા.

ગુજરાત વિધાનસભામાં કોંગ્રેસ પાસે કુલ 15 ધારાસભ્યો છે, જેમાંથી પાંચ મંગળવારે ગેરહાજર રહ્યા હતા અને તેથી સસ્પેન્ડ કરાયેલા ધારાસભ્યોમાં સામેલ નથી. તેમાં અર્જુન મોઢવાડિયા, શૈલેષ પરમાર, દિનેશ ઠાકોર, વિમલ ચુડાસમા અને કિરીટ પટેલનો સમાવેશ થાય છે.