ગુજરાતના નાણાં મંત્રી કનુભાઇ દેસાઇએ આજે વિધાનસભામાં નાણાંકીય વર્ષ 2023-24નું અંદાજપત્ર રજૂ કર્યું છે. નાણાંમંત્રી કનુભાઇ દેસાઇએ બજેટ પ્રવચનમાં જણાવ્યું કે, વર્ષ 2023-24 માટે 3,01,022 કરોડ રૂપિયાનું બજેટ રજૂ કરવામાં આવ્યું છે જે ગુજરાતનું અત્યાર સુધીનું વિક્રમી બજેટ છે.
રૂપિયો ક્યાંથી આવશે
વર્ષ 2023-24 માટેના બજેટમાં ગુજરાત સરકારની આવક 2,97,491.06 કરોડ રૂપિયા રહેવાનો અંદાજ મૂકાયો છે. જેમાં ગુજરાત સરકાર GST સિવાયના રાજ્યના કરવેરામાંથી સૌથી વધુ 24.49 ટકા એટલે કે 72850 કરોડ રૂપિયાની આવક મેળવશે. ત્યારબાદ જાહેર ઋણ મારફતે 68001 કરોડ રૂપિયા ઉભા કરવામાં આવશે,એટલે કે સરકાર આટલા કરોડનું દેવું કરશે, જે કુલ આવકના 22.86 ટકા હિસ્સો ધરાવે છે. રાજ્ય સરકારને આગામી વર્ષે જીએસટી માંથી 66030 કરોડ એટલે કે 22.20 ટકા આવક થવાનો અંદાજછે. તેવી જ રીતે કરવેરા સિવાયના આવકના સ્ત્રોતમાંથી સરકાર 17012.60 કરોડ રૂપિયા એટલે 5.72 ટકા કમાણી મેળવશે. ઉપરાંત કેન્દ્રીય કરવેરામાંથી ગુજરાતને 35525 કરોડ રૂપિયા મળવાની અપેક્ષા રાખવામાં આવી છે, જે કુલ બજેટ આવક અંદાજના 11.94 ટકા સમકક્ષ છે.
રૂપિયો ક્યાં જશે
વર્ષ 2023-24 માટેના બજેટમાં ગુજરાત સરકાર કુલ 2,97,491.06 કરોડ રૂપિયાના ખર્ચનો અંદાજ મૂકાયો છે. જેમાં સરકારે સૌથી વધુ 64.21 ટકા એટલે કે 1,91,009 કરોડ રૂપિયા વિકાસલક્ષી યોજનાઓ પાછળ ખર્ચશે. બિનવિકાસ લક્ષી ફાળવણી અંદાજપત્રના કુલ ખર્ચના 25.93 ટકા એટલે 77147 કરોડ રૂપિયા કરશે. તો આગામી વર્ષે સરકાર 26304 કરોડ રૂપિયાના જાહેર દેવાની ચૂકવણી કરવા ઇચ્છે છે જે કુલ અંદાજપત્ર ખર્ચના 8.84 ટકા રકમ છે.
સતત ત્રીજા વર્ષે પુરાંત વાળું બજેટ
ગુજરાતના નાણાં મંત્રીએ સતત ત્રીજા વર્ષે પુરાંતવાળું બજેટ રજૂ કર્યું છે. 24 ફેબ્રુઆરી, 2023ના રોજ વિધાનસભામાં રજૂ કરાયેલા નાણાંકીય વર્ષ 2023-24નું બજેટ 916.87 કરોડની પૂરાંત રાખવામાં આવી છે. તો વર્ષ 2022-23 માટેના સુધારેલા અંદાજપત્રમાં બજેટ પુરાતની રકમ 668.09 કરોડ રૂપિયાથી વધારીને 899 કરોડ રૂપિયા છે. તો તેની પૂર્વે વર્ષ 2021-22ના બજેટમાં 418 કરોડ રૂપિયાની બજેટ રહી હતી.
