Gujarat Top Headline News: ગુજરાતના આજના મહત્ત્વના સમાચાર, સુરતમાં પતંગ કાઢવા જતાં 13 વર્ષીય કિશોરનું મોત, લેટરકાંડમાં પરેશ ધાનાણીનાં ધરણાં

Gujarat Top Headline: ગુજરાતના આજના મહત્ત્વના સમાચારની વાત કરીએ તો બાળકોમાં સોશિયલ મીડિયા- સ્માર્ટ ફોનનો વ્યાપ વધી રહ્યો છે, જેના કારણે બાળકોમાં વાંચન શક્તિ અને રમત ગમતનો વ્યાપ પણ ઘટી રહ્યો છે. આ કારણે રાજ્ય સરકાર બાળકો માટે ગાઇડલાઇન લાવશે. બીજી તરફ સુરતમાં પતંગ કાઢવા જતાં 13 વર્ષીય કિશોરનું મોત થયું છે. આ સિવાય અન્ય ગુજરાતના મહત્વના સમાચારો અહીં વાચો.

બાળકો માટે રાજ્ય સરકાર લાવશે ગાઇડલાઇન

સમગ્ર દેશમાં બાળકોમાં સોશિયલ મીડિયા- સ્માર્ટ ફોનનો વ્યાપ વધી રહ્યો છે, જેના કારણે બાળકોમાં વાંચન શક્તિ અને રમત ગમતનો વ્યાપ પણ ઘટી રહ્યો છે, જેની ચિંતા કરીને રાજ્ય શિક્ષણ મંત્રી પ્રફુલ પાનશેરીયા દ્વારા ગાંધીનગર ખાતે ઉચ્ચ અધિકારીઓ સાથે આજે બાળકોને સોશિયલ મીડિયા-સ્માર્ટ ફોનની નકારાત્મક અસરોથી કઈ રીતે દૂર રાખી શકીએ એ અંગે ગંભીર ચર્ચા કરવામાં આવી. આ મુદ્દે દેશમાં સૌ પહેલા ગુજરાત સરકાર ટીચર-પેરેન્ટ્સ-બાળકો માટે ગાઇડલાઇન લાવશે.

લેટરકાંડમાં પરેશ ધાનાણીનાં ધરણાં

અમરેલી લેટરકાંડમાં પરેશ ધાનાણી આજથી 24 કલાક માટે 'નારી સ્વાભિમાન આંદોલન' પર બેઠા છે. ધરણાંમાં પાટીદાર યુવતીને ન્યાય અપાવવાની માગ કરાઈ રહી છે. આ ધરણાંમાં પૂર્વ ધારાસભ્ય લલિત વસોયા સહિતના પૂર્વ ધારાસભ્યો સાથે અન્ય કોંગ્રેસના નેતાઓ પણ જોડાયા છે.

આ પણ વાંચો - ફોરેસ્ટ ગાર્ડની હિંમતને દાદ! રેલ્વે ટ્રેક પર આવી ચઢેલા સિંહને લાકડી બતાવી ભગાડયો, જુઓ વીડિયો

સુરતમાં પતંગ કાઢવા જતાં 13 વર્ષીય કિશોરનું મોત

ઉત્તરાયણના પર્વને હવે થોડા દિવસોની વાર છે. આ દરમિયાન એક દુર્ઘટનાના સમાચાર સામે આવ્યા છે. સુરતમાં વીજળીની હાઈટેન્શન લાઈનમાંથી પતંગ કાઢવા જતાં દાઝી જતાં એક 13 વર્ષીય કિશોરનું મોત નીપજ્યું હતું. સચિનમાં કિશોર હાઈટેન્શન વીજલાઈનમાંથી પતંગ કાઢવા જતાં ગંભીર રીતે દાઝી ગયો હતો. ત્યાર બાદ સારવાર દરમિયાન તેનું મોત થયું હતું.

ગુજરાતમાં જોરદાર ઠંડી

ઉત્તરના બર્ફીલા પવનો સક્રિય થવાના કારણે ગુજરાતમાં કડકડકતી ઠંડીનું મોજું ફરી વળ્યું છે. કચ્છ સહિત ગુજરાતમાં છેલ્લા બે દિવસથી જોરદાર ઠંડી અનુભવાઇ રહી છે. ભુજના નલિયામાં તો તાપમાનનો પારો માત્ર 3 ડિગ્રી પર પહોંચી ગયો છે.