Gujarat Weather Update : ગુજરાતમાં તમામ તાલુકા કોરા ધાકોર, ઠંડીનો ધીમે ધીમે પગ પેસારો, આજની આગાહી

Gujarat Weather Forecast : ગુજરાતમાં ચોમાસાની વિદાય વચ્ચે ક્યાંક ક્યાંક વરસાદ પડ્યો હતો. જોકે, છેલ્લા 24 કલાકમાં ગુજરાતમાં એક પણ તુલાકમાં વરસાદ નોંધાયો નથી. જોકે, હવામાન વિભાગે આજે દક્ષિણ ગુજરાત અને સૌરાષ્ટ્રના કેટલાક તાલુકામાં વરસાદની આગાહી કરી છે.ગુજરાતમાં ઠંડી ધીમે ધીમે આગળ વધી રહી છે. વહેલી સવારે ગુલાબી ઠંડીનો અનુભવ થાય છે.

24 કલાકમાં એક પણ તાલુકામાં વરસાદ નોંધાયો નથી

સ્ટેટ ઇમરજન્સી ઓપરેશન સેન્ટર ગાંધીનગર દ્વારા જાહેર કરવામાં આવેલી માહિતી પ્રમાણે ગુરુવારે સવારે 6 વાગ્યાથી લઈને શુક્રવારે સવારે 6 વાગ્યા સુધીમાં ગુજરાતમાં એક પણ તાલુકામાં વરસાદ નોંધાયો નથી. આમ આખું ગુજરાત કોરું ધોકાર રહ્યું હતું. ગુજરાતમાં વરસાદે એકદમ વિદાય લીધી હોય એમ કહી શકાય.

હવામાન વિભાગની આજની આગાહી

હવામાન વિભાગની આગાહી પ્રમાણે આજે 18 ઓક્ટોબર 2024, શુક્રવારે વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ, દાદરા નગરહવેલીમાં ગાજવીજ સાથે વરસાદ પડી શકે છે. આ ઉપરાંત કચ્છ સૌરાષ્ટ્રના વિસ્તારોમાં પોરબંદર, રાજકોટ, જૂનાગઢ, ભાવનગર, ગીર સોમનાથ, દીવમાં વીજળીના કડાકા ભડાકા સાથે વરસાદ પડી શકે છે.

ગુજરાતમાં ક્યાં કેટલી ઠંડી નોંધાઈ?

ગુજરાતમાં બેવડી ઋતુનો અહેસાસ

ગુજરાતમાં ચોમાસાની વિદાય બાદ હવે ધીમે ધીમે શિયાળાની શરુઆત થઈ રહી છે. ગુજરાતમાં ઠંડી ધીમે ધીમે આગળ વધી રહી છે. જોકે, અત્યારે બેવડી ઋતુનો અહેસાસ થઈ રહ્યો છે. બપોરે ગરમી અને વહેલી સવારે ઠંડીનો અનુભવ થાય છે. ગુજરાતમાં ઠંડીની વાત કરીએ તો ગુરુવારે રાજ્યમાં 23.5 ડિગ્રી લઘુતમ તાપમાનથી લઈને 27.6 લઘુતમ તાપમાન વચ્ચે ઠંડી નોંધાઈ હતી.