પીએમ મોદી ગુજરાત : સાબરમતી ગાંધી આશ્રમ પુન: નિર્માણ પ્રોજેક્ટ, બાપુની વિરાસત 5 એકરમાંથી 55 એકરની બનશે

પીએમ નરેન્દ્ર મોદી આજે ગુજરાત મુલાકાતે છે તેમણે રેલવેના વિકાસ કાર્યક્રમ અંતર્ગત સાબરમતીથી 10 વંદે ભારત ટ્રેનને લીલી ઝંડી આપ્યા બાદ સાબરમતી ગાંધી આશ્રમ રિડેવલપમેન્ટ પ્રોજેક્ટનું લોકાર્પણ કર્યું હતું. આ પ્રસંગે તેમણે ગાંધી આશ્રમની વિરાસતના વિકાસ મામલે કોંગ્રેસ પર પ્રહાર કર્યા હતા, તેમણે કહ્યું કે, વિરાસત સંભાળવાની અગાઉની સરકારની ઈચ્છા શક્તિ જ ન હતી. તેમની વિદેશી દ્રષ્ટી અને તૃષ્ટીકરણની આદતથી તેઓ મજબુર હતી.

પીએમ મોદીએ ગાંધી બાપુને અને આશ્રમને યાદ કરતા કહ્યું કે, જ્યારે પણ કોઈને અહીં આવવાની તક મળે છે, ત્યારે આપણે આપણી અંદર બાપુની પ્રેરણાને સ્પષ્ટપણે અનુભવી શકીએ છીએ. પૂજ્ય બાપુનો આ સાબરમતી આશ્રમ હંમેશા અજોડ ઊર્જાનું જીવંત કેન્દ્ર રહ્યું છે. આ દિવસે બાપુએ સ્વતંત્રતા ચળવળનો માર્ગ બદલી નાખ્યો અને દાંડી કૂચ આઝાદીની ચળવળના ઈતિહાસમાં સુવર્ણ અક્ષરોમાં અંકિત થઈ ગઈ.

12 માર્ચ, ગાંધી બાપુએ દાંડીકૂચ કરી : મોદી

તેમણે કહ્યું, આજે 12મી માર્ચની ઐતિહાસિક તારીખ પણ છે. 12 માર્ચ, 2022 ના રોજ, દેશે આ સાબરમતી આશ્રમથી આઝાદીના અમૃત મહોત્સવની શરૂઆત કરી. સ્વતંત્ર ભારતમાં પણ, આ તારીખ નવા યુગની શરૂઆત કરતા સમાન ઐતિહાસિક પ્રસંગની સાક્ષી બની છે. અમૃત મહોત્સવે દેશમાં જનભાગીદારીનું એવું જ વાતાવરણ ઊભું કર્યું, જે આઝાદી પહેલાં જોવા મળતું હતું. દાંડી કૂચએ સ્વતંત્ર ભારતની પવિત્ર ભૂમિને નિર્ધારિત કરવામાં મહત્વની ભૂમિકા ભજવી હતી અને અમૃત મહોત્સવની શરૂઆત અમૃત સમયગાળામાં ભારતના પ્રવેશને ચિહ્નિત કરે છે.

પીએમએ વધુમાં ઉમેર્યું કે, સદીઓની ગુલામીના કારણે નિરાશાથી પીડાતા દેશને બાપુએ આશા અને વિશ્વાસથી ભરી દીધો હતો. આજે પણ તેમનું વિઝન આપણા દેશના ઉજ્જવળ ભવિષ્ય માટે સ્પષ્ટ દિશા દર્શાવે છે. બાપુએ ગ્રામ સ્વરાજ અને આત્મનિર્ભર ભારતનું સપનું જોયું હતું.

પીએમ નરેન્દ્ર મોદી ગાંધી આશ્રમ પૂરો કાર્યક્રમ - વીડિયો

પીએમ મોદીએ આ પ્રસંગે વિપક્ષ પર પ્રહાર કરતા કહ્યું કે, આઝાદી પછી અસ્તિત્વમાં આવેલી સરકારો પાસે દેશના આવા વારસાને બચાવવા માટે ન તો વિચાર હતો કે ન તો રાજકીય ઇચ્છાશક્તિ હતી. એક તો ભારતને વિદેશી દ્રષ્ટિકોણથી જોવાની આદત અને બીજી તૃષ્ટીકરણ કરવાની મજબૂરી હતી. જેના કારણે ભારતની ધરોહર, આપણી મહાન વિરાસતનો નાશ થતો રહ્યો છે.

જે દેશ પોતાના વારસાને જાળવતો નથી તે પોતાનું ભવિષ્ય પણ ગુમાવે છે : મોદી

તેમણે કહ્યું કે, અતિક્રમણ, અસ્વચ્છતા, અવ્યવસ્થા વગેરેએ આપણા વારસાને ઘેરી લીધા છે. જે દેશ પોતાના વારસાને જાળવતો નથી તે પોતાનું ભવિષ્ય પણ ગુમાવે છે. બાપુનો આ સાબરમતી આશ્રમ માત્ર દેશનો જ નહીં માનવજાતનો પણ ઐતિહાસિક વારસો છે. આ સમય દરમિયાન, 'હર ઘર તિરંગા' સમગ્ર દેશમાં દેશભક્તિની અભિવ્યક્તિનું ખૂબ જ શક્તિશાળી માધ્યમ બની ગયું હતું. મેરી માટી-મેરા દેશ અભિયાન અંતર્ગત કરોડો દેશવાસીઓએ દેશના શહીદોને શ્રદ્ધાંજલિ અર્પણ કરી હતી.

સાબરમતી ગાંધી આશ્રમ 5 એકરમાંથી 55 એકરનો બનશે, અનેક સુવિધાઓથી થશે સજ્જ

ઉલ્લેખનીય છે કે, સાબરમતી ગાંધી આશ્રમ અને કોચરબ આશ્રમના પુન: નિર્માણ હેઠળ ગાંધી આશ્રમનું વિસ્તરણ પણ કરવામાં આવશે. વર્તમાનમાં 5 એકરમાં ફેલાયેલો ગાંધી આશ્રમ વધીને 55 એકરનો થશે. સરકાર આશરે રૂપિયા 1200 કરોડના ખર્ચે સમગ્ર ગાંધી આશ્રમ સંકુલનો વૈશ્વિક સ્તરે વિકાસ કરશે. નવા સાબરમતી આશ્રમમાં ગાંધીજીના દિવ્ય જીવન અને આશ્રમના ભવ્ય વારસાને દર્શાવતા પ્રદર્શનોનું પણ નિર્માણ પણ કરવામાં આવશે, જે આશ્રમની મુલાકાતે આવતા સૌ મુલાકાતીઓ માટે આકર્ષણનું કેન્દ્ર બની રહેશે. સાબરમતી આશ્રમના નવા નજરાણાંમાં મુલાકાતીઓ માટે વૈશ્વિક ધારાધોરણને અનુસરતી સવલતો જેમ કે, ઓરિએન્ટેશન સેન્ટર, ફૂડ કોર્ટ અને સોવેનિયર શૉપ જેવી સુવિધાઓ ઉપલબ્ધ થશે.