PM Narendra Modi Gujarat Visit : પીએમ નરેન્દ્ર મોદી બે દિવસના ગુજરાત પ્રવાસે આવી પહોંચ્યા છે. પીએમ મોદીએ બનાસકાંઠામાં ડીસાથી ગુજરાતની 25 લોકસભા બેઠકમાં પ્રચંડ જીતની આશા સાથે પ્રચારના શ્રીગણેશ કરી જનસભા સંબોધી હતી. જેમાં ભાજપ સરકારના કામોના વખાણ કરી કોંગ્રેસ પર પ્રહાર કર્યા હતા. આ પછી પીએમ મોદીએ હિંમતનગર સભા સંબોધી હતી.
પીએમ મોદીએ હિંમતનગરમાં શું કહ્યું
પીએમ મોદીએ હિંમતનગરમાં કહ્યું કે કેટકેટલા દશકાઓથી સાબરકાંઠા સાથે મારો નિકટ નાતો છે, પેઢીઓ બદલાઈ ગઈ, રંગરૂપ બદલાઈ ગયા પણ સાબરકાંઠાનો પ્રેમ એવો ને એવો મારા પર રહ્યો છે.
પીએમ મોદીએ કહ્યું – આજે હું આપની પાસે કંઈક માંગવા માટે આવ્યો છું, મને તમારા આશીર્વાદ જોઈએ છે જેથી કરીને 140 કરોડ દેશવાસીઓ જે સપના લઈને જીવી રહ્યા છે, એ સપનાને સાકાર કરવામાં હું કોઈ પાછી પાની ના કરું. મારી કોઈ ઉણપ ના રહી જાય એના માટે મને મજબૂત સમર્થન જોઈએ.
પીએમે કહ્યું – જ્યારે તમે મને 2014માં દિલ્હી મોકલ્યો હતો ત્યારે તમે મને પડકારોને પડકારો આવવા મોકલ્યો હતો. પડકારો ટાળવા માટે નહીં પરંતુ પડકારોનો સામનો કરવા મોકલવામાં આવ્યા હતા. આ માટીમાં એટલી તાકાત છે અને દુનિયાએ એ તાકાત મહાત્મા ગાંધીમાં જોઈ હતી. દેશે સરદાર વલ્લભભાઈ પટેલમાં આ તાકાત જોઈ હતી. આ માટીમાં એવી તાકાત છે જેણે મને પોષ્યો અને મને ઉછેર્યો અને હું તમારી બધાની સેવામાં રાત-દિવસ લગાવી રહ્યો છું.
પીએમ મોદીએ કહ્યું – કોંગ્રેસે વોટ બેંકની રાજનીતિમાં પ્રાણ પ્રતિષ્ઠાના આમંત્રણને ફગાવી દીધું હતું. તેઓ મતબેંકની રાજનીતિમાં એટલા ડૂબી ગયા છે કે તેઓ પોતાનું સંતુલન ગુમાવી બેઠા છે. તેઓ કહેતા હતા કે જમ્મુ-કાશ્મીરમાંથી કલમ 370 હટાવી દેવામાં આવશે તો દેશ તૂટી જશે, લોહીની નદીઓ વહી જશે, પરંતુ તેઓ નથી જાણતા કે આ મોદી છે, આજે જમ્મુ-કાશ્મીરમાં તિરંગો ગર્વથી લહેરાવી રહ્યો છે.
પીએમે કહ્યું – દેશમાં આપણી મુસ્લિમ બહેનો વોટબેંકની રાજનીતિનો ભોગ બની છે. શાહબાનો કેસમાં તેઓએ (કોંગ્રેસ) સુપ્રીમ કોર્ટનું અપમાન કરીને કાયદો બનાવ્યો અને મુસ્લિમ બહેનોને રક્ષણ આપ્યું નહીં. આજે કોંગ્રેસના રાજકુમાર બંધારણને લઈને ફરી રહ્યા છે. જ્યારે ટ્રિપલ તલાકને નાબૂદ કરવાથી માત્ર મુસ્લિમ બહેનોને જ નહીં, પરંતુ સમગ્ર પરિવારને પણ સુરક્ષા મળી છે.
પીએમ મોદીએ કહ્યું – મોદીનું કામ જોઈને કોંગ્રેસના રાજકુમારને તાવ આવી જાય છે અને તાવમાં વ્યક્તિ કંઈ પણ બોલી નાખે છે. રાજકુમાર કહી રહ્યા છે કે મોદી ત્રીજી વખત આવશે તો દેશમાં આગ લાગી જશે. ખબર નથી કે તેમના મગજમાં આગ ક્યાંથી ભરાઇ ગઇ છે. કોંગ્રેસના સપનાઓ રાખ થઈ ગયા છે.
પીએમ મોદીએ કહ્યું – એક જમાનો હતો ઉમરગામથી અંબાજી સુધી આખા આદિવાસી પટ્ટામાં વિજ્ઞાનની શાળા ન હતી. ગુજરાતમાં મોદી મુખ્યમંત્રી બન્યા પછી પહેલીવાર આદિવાસી પટ્ટાની અંદર વિજ્ઞાનની શાળાઓ શરુ થઈ અને આજે યુનિવર્સિટીઓ અને મેડિકલ કોલેજો આદિવાસી પટ્ટામાં છે.
આ પણ વાંચો – અતિ આત્મવિશ્વાસ મોટો પડકાર, લોકસભા ચૂંટણી 2024માં ભાજપ સામે કેવા કેવા પડકારો? પૂર્વ CM વિજય રૂપાણીએ શું કહ્યું?
પીએમ મોદીએ ડીસા જનસભા સંબોધી, જુઓ શું કહ્યું?
પીએમ મોદીએ ડીસાથી ભાષણની શરૂઆત કરતા કહ્યું કે, આજે ગુજરાતનો સ્થાપના દિવસ આપણા બધા માટે નવા સંકલ્પનો દિવસ, નવી ઊર્જા માટેનો દિવસ અને એ નિમિતે આ વખતે આપણે સંકલ્પ લઈએ વિકસિત ભારત બનાવવા માટે વિકસિત ગુજરાત બનાવવામાં અમે કોઈ કમી નહિ રહેવા દઈએ.
તેમણે કહ્યું કે, હું ગેરંટી લઈને આવ્યો છું અને મારી ગેરંટી છે કે, મારા ત્રીજા કાર્યકાળમાં હું ભારતને વિશ્વની ત્રીજી સૌથી મોટી અર્થવ્યવસ્થા બનાવીશ. જ્યારે દેશ ત્રીજી સૌથી મોટી અર્થવ્યવસ્થા બની જશે, ત્યારે તેની સમૃદ્ધિ, શક્તિ અને તેનો લાભ વર્તમાન પેઢી તેમજ તમારી ભાવિ પેઢીને પણ મળશે.
પીએમ મોદીએ કહ્યું, 2014માં જ્યારે હું પહેલીવાર લોકસભાના મેદાનમાં ઉતર્યો ત્યારે કોંગ્રેસ પાસે મુદ્દા હતા કે આ ચા વેચનાર શું કરશે… તેઓ મારી મજાક ઉડાવતા હતા. પરંતુ દેશે તેમના કાર્યોનો જવાબ એવી રીતે આપ્યો કે જેઓ એક સમયે 400 બેઠકો પર કબજો જમાવતા હતા તેઓ ઘટીને 40 બેઠકો પર આવી ગયા.
તેમણે કોંગ્રેસ પર પ્રહાર કરતા કહ્યું કે, કોંગ્રેસના રાજકુમારે ગર્વથી સમગ્ર મોદી સમુદાય અને સમગ્ર ઓબીસી સમુદાયને ચોર કહ્યા. આટલું જ નહીં, તે મારા માતા-પિતાને સારું કે ખરાબ કહેવામાં પણ પાછળ નહોતા. હવે 2024 માં, કોંગ્રેસ અને ભારતનું ગઠબંધન ફરીથી આવા જુઠ્ઠાણા સાથે મેદાનમાં આવ્યું છે – તેઓ બંધારણ બતાવે છે, તેઓ અનામત લેશે… તેઓ તેનો ડર દર્શાવે છે. એ તેમનું કામ છે.
પીએમએ કહ્યું, ચાલો જોઈએ… આ વખતે પણ તેઓ પહેલા કરતા ઓછી બેઠકો સુધી મર્યાદિત રહેશે. ભારતનું ગઠબંધન પ્રથમ તબક્કામાં હાર્યું હતું અને બીજા તબક્કામાં સંપૂર્ણપણે તૂટી ગયું છે. કોંગ્રેસવાળા પ્રેમની દુકાન લઈને નીકળ્યા હતા, પરંતુ પ્રેમની દુકાનમાં નકલી વીડિયોનો ધંધો ખોલી નાખ્યો છે. હવે ચૂંટણીમાં તેના શબ્દો કામ નથી કરતા, તેથી તે નકલી વીડિયો બનાવીને ફેલાવી રહ્યો છે. તેમની પ્રેમની દુકાન નકલી ફેક્ટરી બની ગઈ છે.
પીએમ મોદીએ નવા મતદારોને ધ્યાનમાં રાખી કોંગ્રેસ પર પ્રહાર કરતા કહ્યું કે, આજકાલની પેઢી તો ગુગલવાળી છે, જરા ગુગલ પર જઈને જુના છાપાં શોધ જો. રોજ હેડલાઈન ચોરી, લૂંટ આ જ આવતી હતી. અને આજે સમાચાર આવે છે આટલા ને જેલમાં નાખ્યા, આટલા કરોડ કબજે કર્યાં અને કોંગ્રેસને એનો જ ફફડાટ છે.
પીએમ મોદીએ ડીસા સભા મંડપથી કોંગ્રેસને પડકાર ફેંકતા કહ્યું કે, કોંગ્રેસના લોકો ખુલ્લા કાનથી સાંભળે. આ મોદી છે, જ્યાં સુધી મોદી જીવિત છે – હું ક્યારેય ધર્મના આધારે અનામતની રમત રમવા નહીં દઉં. એસસી, એસટી, ઓબીસી અને જનરલ કેટેગરીના ગરીબ… તેમને જે અનામત મળી છે તે બંધારણ હેઠળ છે. બાબા સાહેબના આશીર્વાદથી મળી છે. તેમાંથી એક અંશ પણ કોઈ ચોરી શકશે નહી. જો કોંગ્રેસમાં હિંમત હોય તો જાહેરાત કરવાનો પ્રયાસ કરે… હું તમને પડકાર આપું છું.
પીએમએ સંપતિ પુન: વિતરણ અને કોંગ્રેસના મેનિફેસ્ટોનો ઉલ્લેખ કરી કહ્યું કે, કોંગ્રેસનો ચૂંટણી ઢંઢેરો આવ્યો ને ત્યારે જ મેં કહ્યું હતું આમાં મુસ્લિમ લીગની છાપ છે અને હવે એક પછી એક પાનાં ખુલવા લાગ્યા છે. કોંગ્રેસે કહ્યું અમે આખાં દેશનો એક્સ-રે કરીશું, તમારા લોકરમાં શું પડયું છે? તમારા બેંકમાં શું પડયું છે? દાગીનાનો પણ એક્સ-રે પછી એ લૂંટી લેવાનું આ એમણે મેનિફેસ્ટોમાં કહ્યું છે. તેમણે કહ્યું કે, મિત્રો કોંગ્રેસ થી ચેતતા રહેજો. જે ફર્સ્ટ ટાઈમ વોટર છે એમને ખબર નહિ હોય સાંજે વાળું કરતી વખતે કોંગ્રેસના રાજમાં વીજળી પણ નહોતી આવતી.
પીએમ મોદી ડીસાથી લાઈવ સભા – VIDEO
ડીસામાં ચુસ્ત સુરક્ષા બંદોબસ્ત
પીએમ મોદીના ડીસા આગમનને પગલે જિલ્લા પોલીસ તંત્ર એલર્ટ મોડ પર છે. ડીસામાં ચુસ્ત પોલીસ બંદોબસ્ત ગોઠવી દેવામાં આવ્યો છે. ક્ષત્રિય સમાજની નારાજગીને જોતા સુરક્ષા વ્યવસ્થા કડક કરવામાં આવી છે, જેથી કોઈ અનિચ્છનિય ઘટના ના સર્જાય.
આ પણ વાંચો – લોકસભા ચૂંટણી 2024 : પીએમ નરેન્દ્ર મોદી બે દિવસ ગુજરાત પ્રવાસ, 6 સ્થળે સભા સંબોધશે, જુઓ પૂરો કાર્યક્રમ
લોકસભા ચૂંટણી 2024 ની જાહેરાત બાદ પીએમ મોદી પ્રથમ વખત ગુજરાત પ્રવાસે
ઉલ્લેખનીય છે કે, લોકસભા ચૂંટણી 2024 ની જાહેરાત બાદ પ્રથમ વખત પીએમ મોદી ગુજરાત પ્રવાસે આવ્યા છે. ભાજપના કાર્યકરોમાં પીએમ મોદીના આગમનને લઈ ઉત્સાહનો માહોલ જોવા મળી રહ્યો છે. ડીસામાં તેમના કાર્યક્રમમાં એન્ટ્રી થતા જ મોદી-મોદીના નારા સાથે સભા મંડપ ગુંજી ઉઠ્યો હતો, હવે પીએમ સાબરકાંઠા હિંમતનગરમાં પ્રચાર માટે પહોંચ્યા છે.
