Rathyatra jagannath temple Ahmedabad : અમદાવાદમાં આજે 20 જૂને 146મી રથયાત્રા નીકળશે. હિન્દુ પંચાંગ અનુસાર દર વર્ષે અષાઢ સુદ બીજના દિવસે ભગવાન જગન્નાથની રથયાત્રા યોજાય છે. ઓડિશાના પુરીમાં યોજાતી રથયાત્રા બાદ અમદાવાદમાં યોજાતી રથયાત્રા ભારત સહિત દુનિયાભરમાં પ્રખ્યાત છે. રથયાત્રાને લઇને ભક્તોમાં અનેરો ઉત્સાહ છે. રથયાત્રા શાંતિપૂર્વક સંપન્ન થાય તે માટે રાજ્ય સરકારના વહીવટી તંત્ર અને પોલીસતંત્ર દ્વારા કડક સુરક્ષા વ્યવસ્થા ગોઠવવામાં આવી છે. ઉલ્લેખનિય છે કે, અમદાવાદ ઉપરાંત ગુજરાતમાં વિવિધ સ્થળે 198 સ્થળે રથયાત્રા યોજાય છે.
સવારે 4 વાગે મંગળા આરતી
ભગવાન જગન્નાથ, ભાઇ બલરામ અને બહેન સુભદ્રાજી અષાઢ સુદ બીજના દિવસે અમદાવાદમાં નગરચર્ચાએ નીકળશે. આ દિવસે સૌથી પહેલા અમદાવાદમાં જમાલપુર વિસ્તારમાં સાબરમતી નદીના કિનારે આવેલા પ્રસિદ્ધ ભગવાન જગન્નાથ મંદિરે વહેલી સવારે ચાર વાગે મંગળા આરતી થાય છે. રથયાત્રાના દિવસે થતી મંગળા આરતીનું વિશેષ મહત્વ છે અને તેના દર્શન કરવા સવારથી જ મોટી સંખ્યામાં ભક્તો ઉમટી પડે છે. આ વખતે મંગળા આરતીમાં દેશના કેન્દ્રીય ગૃહમંત્રી અમિતભાઇ શાહ હાજર રહેશે. મંગળા આરતી બાદ ત્રણેય ભગવાનના આંખના પાટા ખોલવાની વિધિ થશે. તેમજ મંદિરના જ પ્રાંગણમાં કલાકારો દ્વારા ભગવાનને પ્રિય આદિવાસી નૃત્ય, રસ ગરબા કરવામાં આવશે.
અમદાવાદની રથયાત્રાનો રૂટ અને કાર્યક્રમ
- ભગવાન જગન્નાથ ભાઇ-બહેન સાથે સવારે 5.45 વાગે રથમાં બિરાજમાન થશે
- મુખ્યમંત્રી દ્વારા સવારે 7 વાગે પહિંદ વિધિ થશે અને ત્યારબાદ રથયાત્રાનો શુભારંભ થશે
- રથયાત્રા સવારે 9 કલાકની આસપાસે અમદાવાદ મ્યુનિસિપલ કોર્પોરેશનની ઓફિસ (AMC) પહોંચશે, જ્યારે રથયાત્રાનું અધિકારીઓ દ્વારા ભવ્ય સ્વાગત કરાશે
- રથયાત્રા રાયપુર, સારંગપુર, કાલુપુર થઇ 12 વાગેની આસપાસ ભગવાનના મોસાળ સરસપુર પહોંચશે
- સરસપુરમાં બપોરે ભગવાન જગન્નાથ, ભાઇ બલરામ અને બહેન સુભદ્રાજીના રથનું આગમન થશે અને પ્રભનું મામેરું કરવામાં આવશે. રથયાત્રામાં આવેલા સાધુ-સંતોષ ખલાસી ભાઇઓ અને ભક્તો સરસપુરની પોળમાં પ્રસાદ ગ્રહણ કરશે.
- સરસપુરથી બપોરે 1.30 કલાકે કાલુપુર, પ્રેમ દરવાજા, દરિયાપુર, શાહપુર થઇને રથયાત્રા મંદિર તરફ પરત આવશે.
- ત્રણેય રથ રાત્રે 8.30 કલાકે નિજ મંદિર પરત આવવાની સાથે જ રથયાત્રા સંપન્ન થશે.
રથયાત્રા સાથેના આકર્ષણો
- 18 ગજરાજ – રથયાત્રામાં સૌથી આગળ હોય છે
- 101 ટ્રક – ભારતની વિવિધ સંસ્કૃતિની ઝાંખી કરાવતી સુશોભિત ટ્રકો
- 30 અખાડ – અખાડના પહેલવાનો વિવિધ કસરત અને કરતબો દેખાડશે
- 18 ભજન મંડળીઓ અને 3 બેન્ડવાજા રથયાત્રાને ભક્તિમય બનાવશે
- 2000 સાધુસંતો – હરિદ્વાર, ઉજ્જૈન, નાસિક, અયોધ્યા, જગન્નાથપુરી સહિત વિવિધ સ્થળેથી આવેલ લગભગ 2000 જેટલા સાધુસંતો રથયાત્રામાં જોડાશે
- હજારો કિલોનો પ્રસાદ – રથયાત્રામાં આ વખતે 500 કિલો જાંબુ, 3000 કિલો મગ અને 500 કિલો કાકડીના પ્રસાદનું ભક્તોને વિતરણ કરાશે.
‘ડ્રોન’ રાખશે રથયાત્રા પર બાજનજર
અમદાવાદમં રથયાત્રાને લઇને સરકાર અને પોલીસતંત્ર દ્વારા કડક સુરક્ષા વ્યવસ્થાનું આયોજન કરાયુ છે. આ વખતે 32 ડ્રોન મારફતે રથયાત્રાનું મોનેટરિંગ કરવામાં આવશે. આ ડ્રોન સતત 10 કલાક સુધી આકાશમાં ઉડાન ભરવામાં સક્ષમ છે અને 3 કિમી સુધીના ફૂટેજ આપી શકે છે.
હજારો પોલીસ અને આર્મી સૈનિકો ‘રથયાત્રા’ની સુરક્ષામાં ખડપગે
- અમદાવાદની રથયાત્રાએ ભક્તો માટે આનંદનો પર્વ છે તો બીજી બાજુ સરકાર અને પોલીસતંત્ર માટે એક અગ્નિ પરીક્ષા હોય છે. રથયાત્રામાં કોઇ અનિચ્છનિય ઘટના ન બને તે માટે કડક સુરક્ષા વ્યવસ્થા ગોઠવાય છે. રથયાત્રા માટે પેરા મિલિટરી ફોર્સ, 26091 પોલીસ અધિકારીઓ તૈનાત
- 2322 બોડીવોર્ન કેમેરા સાથે પોલીસ જવાન ખડેપગે રહેશે
- 25 વાહનો પર જીપીએસ સિસ્ટમ અને સીસીટીવી કેમેરા લગાવાશે
- રથયાત્રાના લગભગ 18 કિમીના સમગ્ર રૂટ પર 250 ધાબા પોઇન્ટ અને 25 વોચ ટાવર ઉભા કરાયા
આ પણ વાંચોઃ અમદાવાદની રથયાત્રા અને જગન્નાથ મંદિરનો જાણો ઇતિહાસ
મોસાળ સરસપુરમાં મહાપ્રસાદનું આયોજન
અમદાવાદના સરરસપુર વિસ્તારને ભગવાન જગન્નાથનું મોસાળ કહેવાય છે અને રથયાત્રાના દિવસે દર વર્ષે ત્યાં ભગવાનનું મામેરું કરાય છે. ઉપરાંત રથયાત્રામાં આવેલા તમામ લોકો માટે સરસપુરની પોળોમાં ‘મહાપ્રસાદ’ની વ્યવસ્થા કરવામાં આવે છે. આ વખતે સરસપુરની લગભગ 16 જેટલી પોળમાં ભોજન પ્રસાદની વ્યવસ્થા કરાઇ છે જ્યાં હજારો ભક્તો જમશે. ભક્તોને 30 હજાર કિગ્રા લોટની પૂરી, 50 હજાર કિગ્રા શાકભાજી, 25 હજાર કિગ્રા મોહનથાળ, 40 કિગ્રા બુંદી, 3 હજાર કિગ્રા ખીચડીનો પ્રસાદ પીસરવામાં આવશે.
