નિવૃત્ત IAS અધિકારી એસકે લાંગાના 5 દિવસના પોલીસ રિમાન્ડ મંજૂર, પરિવારના નામે અઢળક સંપત્તિ મળી

Former Collector of Gandhinagar S K Langa remand : ગાંધીનગરની એક અદાલતે બુધવારે રાજ્યની તિજોરીને "20 કરોડ રૂપિયાથી વધુ"નું નુકસાન પહોંચાડવાના આરોપી નિવૃત્ત IAS અધિકારી એસકે લાંગાને પાંચ દિવસના પોલીસ રિમાન્ડ પર મોકલ્યા છે. ગાંધીનગર રેન્જના મહાનિરીક્ષક અભય ચુડાસમાએ જણાવ્યું હતું કે, તેઓની મંગળવારે રાજસ્થાનના માઉન્ટ આબુ ખાતેથી કોંગ્રેસના પૂર્વ લોકસભા સાંસદ સ્વર્ગસ્થ બીકે ગઢવીનામના કથિત ઘરમાંથી ધરપકડ કરવામાં આવી હતી. ચુડાસમાએ મીડિયાને જણાવ્યું કે, પોલીસે 14 દિવસના રિમાન્ડની માંગણી કરી હતી.

લાંગાને એપ્રિલ 2018 થી સપ્ટેમ્બર 2019 વચ્ચે ગાંધીનગર જિલ્લા કલેક્ટર તરીકે નિયુક્ત કરવામાં આવ્યા હતા. લાંગા સામેની ફરિયાદ જિલ્લા કલેક્ટર કચેરીના અધિકારી ધૈવત ધ્રુવે નોંધાવી હતી. તેમની સામે 17 મેના રોજ ગાંધીનગરના સેક્ટર 7 પોલીસ સ્ટેશનમાં કેસ નોંધવામાં આવ્યો હતો. લાંગા ઉપરાંત, તત્કાલિન કલેક્ટર ચિટનીશ અને ગાંધીનગરના તત્કાલીન નિવાસી અધિક કલેક્ટર (આરએસી)ના પણ એફઆઈઆરમાં આરોપી તરીકે નામ આપવામાં આવ્યા હતા.

લાંગા અને અન્ય બે સામે ભારતીય દંડ સંહિતાની વિવિધ કલમો તેમજ ભ્રષ્ટાચાર નિવારણ અધિનિયમ હેઠળ ગુનો નોંધવામાં આવ્યો હતો.

23 મેના રોજ, આ મામલાની તપાસ માટે વિશેષ તપાસ ટીમ (SIT) ની રચના કરવામાં આવી હતી. ગુનો નોંધવામાં આવ્યો ત્યારથી લાંગા કથિત રીતે ગુમ હતા અને એસઆઈટીનો દાવો છે કે, ટેકનિકલ ઈનપુટ્સ પછી જાણવા મળ્યું હતું કે, તે માઉન્ટ આબુમાં હોઈ શકે છે. ચુડાસમાએ જણાવ્યું હતું કે, પોલીસે અત્યાર સુધીમાં ગાંધીનગરના પેથાપુર અને મુલસાણામાં તેમની તપાસ હાથ ધરી છે અને એક લાખ પાનાના દસ્તાવેજો એકત્રિત કર્યા છે, જેની SIT હજુ પણ તપાસ કરી રહી છે.

કેટલી સંપત્તિ મળી આવીં?

ચુડાસમાએ જણાવ્યું હતું કે, તપાસની વિગતો મુજબ, પોલીસને લાંગા સાથે જોડાયેલ અપ્રમાણસર સંપત્તિ મળી આવી છે, જેમાં "જૂનાગઢમાં ચાર બંગલા, માતર (ખેડા)માં લગભગ 30 એકર જમીન, તેના પરિવારના સભ્યોના નામે અમદાવાદની આસપાસ ત્રણ જમીન સામેલ છે, અમદાવાદમાં રાઇસ મિલ, એક ફ્લેટ અને બંગલો… અને તે અમીરાજ બિલ્ડકોન નામની કંપનીમાં ભાગીદાર પણ છે.