IMD Gujarat Weather Forecast update Today, આજનું હવામાન :ગુજરાતમાં ઉનાળો હવે વિદાયના આરે આવીને ઊભો છે અને ચોમાસું શરુ થવાના આડે ગણતરીના દિવસો બાકી રહ્યા છે. ત્યારે અત્યારે રાજ્યના વાતાવરણમાં બે તરફી વલણ જોવા મળે છે. દિવસ દરમિયાન ગરમીનું પ્રમાણ વધારે જોવા મળે છે ત્યારે સાંજ પડતા જ વાતાવરણમાં પલટો આવે છે અને પવનો ફૂંકાતા વાતાવરણમાં ઠંડક પ્રસરે છે. આવી સ્થિતિ વચ્ચે રાજ્યમાં ગરમીમાં સામાન્ય ઘટાડો નોંધાયો છે. જ્યારે હવામાન વિભાગે આગામી પાંચ દિવસ રાજ્યમાં હળવા વરસાદની આગાહી કરી છે.
અમદાવાદમાં વહેલી સવારે વરસાદી છાંટા
ચોમાસું હવે થોડા દિવસોમાં આવી પહોંચશે ત્યારે એ પહેલા જ રાજ્યના વાતાવરણમાં પલટો જોવા મળી રહ્યો છે. અમદાવાદ શહેરમાં વહેલી સવારથી જ આકાશમાં વાદળછાયું વાતાવરણ જોવા મળ્યું હતું. શહેરના કેટલાક વિસ્તારોમાં વરસાદી છાંટા પણ પડ્યા હતા. જેના પગલે વાતાવરણમાં ઠંડક પ્રસરી છે.
પાંચ દિવસ રાજ્યમાં ક્યાં ક્યાં પડશે વરસાદ
ચોમાસાના આગમન પહેલા હવામાન વિભાગે આજે બુધવારથી આગામી પાંચ દિવસ સુધી રાજ્યના કેટલાક વિસ્તારોમાં પવન સાથે સામાન્ય વરસાદ પડવાની આગાહી કરી છે.
હવામાન વિભાગ પ્રમાણે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદમાં હળવા વરસાદની આગાહી કરી છે. આ ઉપરાંત પંચમહાલ, દાહોદ, મહિસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ, દાદરા નગર હવેલીમાં પણ સામાન્ય વરસાડ પડશે.
આ ઉપરાંત સૌરાષ્ટ્રના સુરેન્દ્રનગર, રાજકોટ, પોરબંદર, જૂનાગઢમાં પવન સાથે સામાન્ય વરસાદની આગાહી હવામાન વિભાગે કરી છે. આગામી પાંચ દિવસ સુધી આ વિસ્તારોમાં હળવા વરસાદની આગાહી કરાઈ છે.
અમદાવાદ સહિત રાજ્યમાં ગરમીનું પ્રમાણ ઘટ્યું
ચોમાસાના આગમન પહેલા રાજ્યમાં ગરમીમાં ઘટાડો નોંધાયો છે. હવામાન વિભાગે આપેલા તાપમાનના આંકડા પ્રમાણે રાજ્યમાં મહત્તમ ગરમી 40 ડિગ્રી નીચે આવી ગઈ છે. રાજ્યમાં 33 ડિગ્રીથી લઈને 39.7 ડિગ્રી વચ્ચે મહત્તમ તાપમાન નોંધાયું હતું. 39.7 ડિગ્રી મહત્તમ તાપમાન સાથે અમરેલી રાજ્યનું સૌથી ગરમ શહેર રહ્યું હતું. અમદાવાદમાં ગરમી ઘટીને 38 ડિગ્રી નોંધાઈ હતી.
શહેર મહત્તમ તાપમાન (ડિગ્રીમાં) લઘુતમ તાપમાન (ડિગ્રીમાં) અમદાવાદ 38.0 26.0 ડીસા 38.1 27.6 ગાંધીનગર 36.4 25.0 વિદ્યાનગર 37.1 22.4 વડોદરા 36.0 26.8 સુરત 34.2 29.0 વલસાડ – – દમણ 34.8 25.0 ભૂજ 37.4 28.1 નલિયા 35.3 29.0 કંડલા પોર્ટ 37.4 29.3 કંડલા એરપોર્ટ 39.0 28.9 અમરેલી 39.7 26.6 ભાવનગર 38.9 28.8 દ્વારકા 35.1 29.4 ઓખા 35.4 29.8 પોરબંદર 35.1 28.6 રાજકોટ 39.4 26.3 વેરાવળ 33.0 29.3 દીવ 33.7 29.3 સુરેન્દ્રનગર 38.8 29.2 મહુવા 33.8 28.5 કેશોદ 36.0 28.8
ગુજરાતમાં ચોમાસું ક્યારે આવશે?
દેશમાં દક્ષિણ પશ્ચિમમાં ચોમાસું સમય પહેલા આવી ગયું છે. ચોમાસું હવે કર્ણાટક અને મહારાષ્ટ્રના કેટલાક ભાગોમાં પહોંચી ગયું છે. પરેશ ગોસ્વામીના જણાવ્યા મુજબ, થોડા દિવસો પહેલા અરબી સમુદ્રમાં એક સિસ્ટમ સક્રિય થઈ હતી. હાલમાં અરબી સમુદ્રમાં કોઈ નવી સિસ્ટમ બની રહી નથી. તેથી આગામી એક કે બે દિવસમાં વર્તમાન સિસ્ટમ નિષ્ક્રિય થતાંની સાથે જ ચોમાસું પણ નિષ્ક્રિય થઈ જશે. પરિણામે ગુજરાતમાં ચોમાસાનું આગમન પણ મોડું થશે.
આ પણ વાંચોઃ- અમદાવાદ: ઓપરેશન બાદ વ્યક્તિએ આંખ ગુમાવી! પીડિતે કહ્યું- આંખ ગુમાવ્યા બાદ પત્ની છોડી ગઈ, પોલીસ FIR લેતી નથી
હાલમાં ગુજરાતના વિવિધ ભાગોમાં થઈ રહેલો વરસાદ પૂર્વ-ચોમાસાની પ્રવૃત્તિનો ભાગ છે. આ પૂર્વ-ચોમાસાના વરસાદને કારણે ખાસ કરીને ખેડૂતોને ભારે નુકસાન થયું છે. આગામી દિવસોમાં, વાતાવરણ ધીમે-ધીમે ખુલશે અને સૂર્ય ઉગવાની સાથે તાપમાન પણ વધશે. તેથી આપણે હજુ પણ દક્ષિણ પશ્ચિમ ચોમાસા માટે લાંબો સમય રાહ જોવી પડશે.
