Gujarat Rain Weather Forecast Update : રાજ્યમાં વરસાદનો વિરામ જોવા મળી રહ્યો છે. બુધવારને 16 જુલાઇના રોજ સવારના 6.00 થી સાંજના 4.00 વાગ્યા સુધીમાં ફક્ત 7 તાલુકામાં વરસાદ નોંધાયો છે. જેમાં સૌથી વધારે દાહોદમાં ફક્ત 8 મીમી વરસાદ નોંધાયો છે.
ફક્ત 7 તાલુકામાં વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં બુધવારને 16 જુલાઇના રોજ સવારના 6 થી સાંજના 4 વાગ્યા સુધીમાં ફક્ત 7 તાલુકામાં વરસાદ વરસ્યો છે. જેમાં દાહોદમાં 8 મીમી, કુકરમુંડામાં 6 મીમી, નસવાડીમાં 5 મીમી, ગરબડામાં 3 મીમી, ચૌર્યાસી અને વ્યારામાં 2 મીમી, માંડવીમાં 1 મીમી સુધી વરસાદ વરસ્યો છે.
હવામાન વિભાગની આગાહી
હવામાન વિભાગની આગાહી પ્રમાણે 17 જુલાઈના રોજ બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નલસારી, વલસાડ, દમણ, દાદરા નગર હવેલી, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દીવમાં ગર્જના સાથે હળવાથી મધ્યમ વરસાદની ભાવના છે.
આ પણ વાંચો – સુરતમાં ખાડા અને ટ્રાફિક જામ સામે AI ટેક્નોલોજીનો અદભૂત ઉપયોગ, જાણો કેવી રીતે કરે છે કામ
રાજ્યમાં સિઝનનો કુલ 51.09 ટકા વરસાદ
રાજ્યમાં સિઝનનો કુલ 51.09 ટકા વરસાદ નોંધાયો છે. જેમાં કચ્છમાં 58.46 ટકા, ઉત્તર ગુજરાતમાં 48.01 ટકા, પૂર્વ મધ્ય ગુજરાતમાં 49.26 ટકા, સૌરાષ્ટ્રમાં 49.26 ટકા અને દક્ષિણ ગુજરાતમાં 55.19 ટકા વરસાદ વરસ્યો છે.
સરદાર સરોવર નર્મદા નિગમ લી નો હાલનો પાણીનો સંગ્રહ 178158 mcft છે. જે કુલ સંગ્રહ ક્ષમતાના 53.331% જેટલો છે. રાજ્યના અન્ય 206 જળાશયોમાં સંગ્રહ 331980 mcft છે. જે કુલ સંગ્રહ ક્ષમતાના 59.48% છે. 100 ટકા ભરાયેલ ડેમોની સંખ્યા 26 છે. 41 ડેમ હાઇએલર્ટ પર અને 23 ડેમ એલર્ટ પર છે.
