Gujarat Rain : રાજ્યમાં શુક્રવારે 54 તાલુકામાં મેઘમહેર, જાણો હજુ કેવી છે વરસાદની આગાહી

Gujarat Rain Weather Forecast Update : એક તરફ વરસાદની વિદાયનો સમય આવી ગયો છે છતા રાજ્યમાં હજુ મેઘમહેર જોવા મળી રહી છે. શુક્રવારને 19 સપ્ટેમ્બરના રોજ સવારના 6.00 થી સાંજના 6.00 વાગ્યા સુધીમાં 54 તાલુકામાં વરસાદ નોંધાયો છે. જેમાં સૌથી વધારે ભરુચના વાગરામાં 3.78 ઇંચ વરસાદ વરસ્યો છે.

54 તાલુકામાં વરસાદ

ગુજરાત સ્ટેટ ઈમરજન્સી ઓપરેશન સેન્ટર ગાંધીનગર દ્વારા જાહેર કરાયેલા વરસાદના આંકડા પ્રમાણે 19 સપ્ટેમ્બર 2025ના રોજ સાંજના 6 વાગ્યા સુધીમાં 54 તાલુકામાં વરસાદ વરસ્યો છે. જેમાં વાગરામાં 96 મીમી (3.78 ઇંચ), સુરત શહેરમાં 46 મીમી (1.81 ઇંચ), ઝઘડીયામાં 29 મીમી (1.14 ઇંચ), વડોદરામાં 25 મીમી, આંકલાવમાં 24 મીમી, કરજણ, ભરુચમાં 23 મીમી, સાગબારામાં 22 મીમી, ખેરગામમાં 21 મીમી અને તળાજામાં 20 મીમી વરસાદ નોંધાયો છે. આ સિવાય અન્ય 44 તાલુકામાં 1 થી લઇને 18 મીમી સુધી વરસાદ નોંધાયો છે.

હવામાન વિભાગની આગાહી

હવામાન વિભાગની આગાહી મુજબ આગામી 22 સપ્ટેમ્બર સુધી ગાંધીનગર, અરવલ્લી, સાબરકાંઠા, ખેડા, અમદાવાદ, આણંદ, પંચમહાલ, દાહોદ, મહિસાગર, વડોદરા, છોટા ઉદેપુર, નર્મદા, ભરૂચ, સુરત, તાપી, નવસારી, વલસાડ, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદમાં છૂટાછવાયા સ્થળોએ હળવી મેઘગર્જના સાથે હળવાથી મધ્યમ વરસાદની આગાહી છે. આ દરમિયાન રાજ્યમાં 30-40 કિ.મી.ની ઝડપે પવન ફૂંકાવવાની શક્યતા છે.

આ પણ વાંચો - પીએમ મોદી શનિવારે ગુજરાત પ્રવાસે, રાજ્યને કરોડોના વિકાસકાર્યોની ભેટ આપશે

રાજ્યમાં સિઝનનો 108.81 ટકા વરસાદ

19 સપ્ટેમ્બર 2025 સુધીમાં રાજ્યમાં સિઝનનો કુલ 108.81 ટકા વરસાદ નોંધાયો છે. જેમાં કચ્છમાં 135.95 ટકા, ઉત્તર ગુજરાતમાં 118.72 ટકા, પૂર્વ મધ્ય ગુજરાતમાં 110.42 ટકા, સૌરાષ્ટ્રમાં 94.13 ટકા અને દક્ષિણ ગુજરાતમાં 113.18 ટકા વરસાદ વરસ્યો છે.

સરદાર સરોવર નર્મદા નિગમ લી. માં 19 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 316931 mcft છે. જે કુલ સંગ્રહ ક્ષમતાના 94.87% જેટલી છે. રાજ્યના અન્ય 206 જળાશયોમાં સંગ્રહ 520323 mmcft છે. જે કુલ સંગ્રહ ક્ષમતાના 93.27% છે. 100 ટકા ભરાયેલ ડેમોની સંખ્યા 114 છે. 145 ડેમ હાઇ એલર્ટ પર અને 14 ડેમ એલર્ટ પર છે.