Gujarat Rain Weather Forecast Update : રાજ્યમાં વરસાદનો વિરામ જોવા મળી રહ્યો છે. શનિવારને 2 ઓગસ્ટના રોજ સવારના 6.00 થી સાંજના 6.00 વાગ્યા સુધીમાં 46 તાલુકામાં વરસાદ નોંધાયો છે. જેમાં સૌથી વધારે મહેસાણાના જોટાણામાં 1.02 ઇંચ વરસાદ વરસ્યો છે. ફક્ત એક જ તાલુકામાં એક ઇંચથી વધારે વરસાદ વરસ્યો છે. આ સિવાય રાજ્યમાં ક્યાંય ભારે વરસાદ જોવા મળ્યો નથી.
શનિવારે 46 તાલુકામાં વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં શનિવારને 2 ઓગસ્ટના રોજ સવારના 6 થી સાંજના 6 વાગ્યા સુધીમાં 46 તાલુકામાં વરસાદ વરસ્યો છે. જેમાં જોટાણામાં 26 મીમી, નેત્રંગમાં 9 મીમી, તળાજામાં 8 મીમી, તિલકવાડા, કપરાડા, ઉમરગામ અને માળિયામાં 7 મીમી, મહેમદાબાદમાં 6 મીમી, કડી અને કલોલમાં 5 મીમી વરસાદ વરસ્યો છે. આ સિવાય અન્ય 26 તાલુકામાં 1 થી લઇને 4 મીમી સુધી વરસાદ વરસ્યો છે.
હવામાન વિભાગની આગાહી
હવામાન વિભાગના જણાવ્યા પ્રમાણે આગામી સાત દિવસ સામાન્યથી મધ્યમ વરસાદની આગાહી કરવામાં આવી છે. હાલના સંજોગોમાં ક્યાંય ભારે વરસાદની આગાહી નથી. બે ઓગસ્ટથી પાંચ ઓગસ્ટ સુધી રાજ્યમાં વરસાદનું જોર થોડું ઘટી શકે છે. કેટલાક વિસ્તારોમાં છૂટાછવાયા હળવા ઝાપટાં પડી શકે છે.
હવામાન વિભાગે 5 ઓગસ્ટ સુધી રાજ્યભરમાં હળવા વરસાદની આગાહી કરી છે. 4-5 ઓગસ્ટ દરમિયાન માછીમારોને દરિયો ન ખેડવા સૂચના આપી છે. 40/50 કિમી પ્રતિ કલાકની ઝડપે પવન ફૂંકાવવાની આગાહી છે. અમદાવાદમાં ગાજવીજ સાથે હળવા વરસાદી ઝાપટાં પડી શકે છે.
આ પણ વાંચો – સૂમસામ જગ્યાએ રંગલીને લઈ જવાય નહીં…વિવાદ પછી અમદાવાદમાં લાગેલા વિવાદાસ્પદ બોર્ડ હટાવાયા
રાજ્યમાં સિઝનનો કુલ 63.01 ટકા વરસાદ
2 ઓગસ્ટ 2025 સુધીમાં રાજ્યમાં સિઝનનો કુલ 63.01 ટકા વરસાદ નોંધાયો છે. જેમાં કચ્છમાં 64.16 ટકા, ઉત્તર ગુજરાતમાં 65.47 ટકા, પૂર્વ મધ્ય ગુજરાતમાં 64.87 ટકા, સૌરાષ્ટ્રમાં 55.11 ટકા અને દક્ષિણ ગુજરાતમાં 67.11 ટકા વરસાદ વરસ્યો છે.
સરદાર સરોવર નર્મદા નિગમ લી. માં 2 ઓગસ્ટને સાંજના 4 વાગ્યા સુધીમાં પાણીનો સંગ્રહ 276972 mcft છે. જે કુલ સંગ્રહ ક્ષમતાના 82.91% જેટલો છે. રાજ્યના અન્ય 206 જળાશયોમાં સંગ્રહ 379336 mcft છે. જે કુલ સંગ્રહ ક્ષમતાના 67.97% છે. 100 ટકા ભરાયેલ ડેમોની સંખ્યા 30 છે. 52 ડેમ હાઇએલર્ટ પર અને 23 ડેમ એલર્ટ પર છે.
