Gujarat Rain : વરસાદ ધીમો પડતા ખેલૈયાઓ મોજમાં, બુધવારે ફક્ત 8 તાલુકામાં મેઘમહેર

Gujarat Rain Weather Forecast Update : રાજ્યમાં વરસાદ ધીમો પડ્યો હોય તેવા માહોલ જોવા મળી રહ્યો છે. વરસાદ ધીમો પડતા ગરબા આયોજકો અને ખેલૈયાઓમાં મોજમાં આવી ગયા છે. બુધવારને 24 સપ્ટેમ્બરના રોજ સવારના 6.00 થી સાંજના 6.00 વાગ્યા સુધીમાં 8 તાલુકામાં વરસાદ નોંધાયો છે. જેમાં સૌથી વધારે ભાવનગરના તળાજામાં 10 મીમી વરસાદ વરસ્યો છે.

8 તાલુકામાં વરસાદ

ગુજરાત સ્ટેટ ઈમરજન્સી ઓપરેશન સેન્ટર ગાંધીનગર દ્વારા જાહેર કરાયેલા વરસાદના આંકડા પ્રમાણે 24 સપ્ટેમ્બર 2025ના રોજ સાંજના 6 વાગ્યા સુધીમાં 8 તાલુકામાં વરસાદ વરસ્યો છે. જેમાં તળાજા, આહવામાં 10 મીમી, વઘઇ 9 મીમી, માંડવી 6 મીમી, લીલીયા, જેસર, પારડી અને સોનગઢમાં 3 મીમી વરસાદ નોંધાયો છે.

હવામાન વિભાગની આગાહી

હવામાન વિભાગે આપેલી માહિતી પ્રમાણે 25મી તારીખે વરસાદની તીવ્રતા ઓછી જોવા મળશે. આણંદ, પંચમહાલ, દાહોદ, વડોદરા, છોટાઉદેપુર, નર્મદા, ભરૂચ, સુરત, તાપી, નવસારી, વલસાડ, રાજકોટ, જૂનાગઢ, અમરેલી, ભાવનગર, ગીર સોમનાથ અને બોટાદ જિલ્લાનાં છૂટાંછવાયાં સ્થળોએ હળવાથી મધ્યમ વરસાદ પડવાની આગાહી આપવામાં આવી છે. આ સાથે આ વિસ્તારોમાં ગાજવીજ થવાની પણ આગાહી છે.

આ પણ વાંચો - ગુજરાતમાં 2013 પછી પ્રથમવાર જિલ્લા તાલુકાઓની સંખ્યામાં મોટો ફેરફાર, નવા 17 તાલુકાઓને મંજૂરી

રાજ્યમાં સિઝનનો 111.16 ટકા વરસાદ

24 સપ્ટેમ્બર 2025 સુધીમાં રાજ્યમાં સિઝનનો કુલ 111.16 ટકા વરસાદ નોંધાયો છે. જેમાં કચ્છમાં 135.95 ટકા, ઉત્તર ગુજરાતમાં 119.27 ટકા, પૂર્વ મધ્ય ગુજરાતમાં 113.28 ટકા, સૌરાષ્ટ્રમાં 95.70 ટકા અને દક્ષિણ ગુજરાતમાં 116.96 ટકા વરસાદ વરસ્યો છે.

સરદાર સરોવર નર્મદા નિગમ લી. માં 24 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 320982 mcft છે. જે કુલ સંગ્રહ ક્ષમતાના 96.08% જેટલી છે. રાજ્યના અન્ય 206 જળાશયોમાં સંગ્રહ 529964 mmcft છે. જે કુલ સંગ્રહ ક્ષમતાના 94.99% છે. 100 ટકા ભરાયેલ ડેમોની સંખ્યા 114 છે. 145 ડેમ હાઇ એલર્ટ પર અને 16 ડેમ એલર્ટ પર છે.