Gujarat Rain Weather Forecast Update: રાજ્યમાં વરસાદી માહોલ બરાબરનો જામ્યો છે. હવામાન વિભાગે આગામી 5 દિવસ માટે ભારેથી અતિભારે વરસાદ થવાની આગાહી કરી છે. શનિવારે સવારના 6.00 થી સાંજના 6.00 વાગ્યા સુધીમાં સૌથી વધારે દેવભૂમિ દ્વારકામાં 2.44 ઇંચ વરસાદ વરસ્યો છે. આ સિવાય જાંબુઘોડામાં 2.4 ઇંચ વરસાદ વરસ્યો છે.
સાંજના 6 વાગ્યા સુધીમાં 21 તાલુકામાં 1 ઇંચથી વધારે વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં શનિવારને 28 જૂનના રોજ સવારના 6 થી સાંજના 6 વાગ્યા સુધીમાં 21 તાલુકામાં 1 ઇંચથી વધારે વરસાદ પડ્યો છે. જેમાં દ્વારકામાં 2.44 ઇંચ, જાંબુઘોડામાં 2.4 ઇંચ, લખપતમાં 1.89 ઇંચ, પોરબંદરમાં 1.85 ઇંચ, ભરુચમાં 1.81, કરજણ, ચીખલી અને વલસાડમાં 1.73 ઇંચ વરસાદ વરસ્યો છે.
અમદાવાદમાં વરસાદ
હવામાન વિભાગની આગાહી વચ્ચે અમદાવાદ શહેરમાં વહેલી સવારથી વરસાદ વરસી રહ્યો છે. અમદાવાદના એસજી હાઈવે, બોપલ, ઘુમા, આંબલી, પ્રહલાદનગર, આનંદનગર,વેજલપુર, બોડકદેવ, થલતેજ સહિતના વિસ્તારોમાં વરસાદ વરસી રહ્યો છે. અમદાવાદ શહેરના મોટાભાગના વિસ્તારોમાં વરસાદના કારણે લોકોને બફારાથી રાહત મળી છે.
આ પણ વાંચો – અમદાવાદ રથયાત્રામાં હાથી બેકાબૂ કેમ થયા? ઝૂ સુપ્રિન્ટેન્ડેન્ટે જણાવ્યા કારણ
હવામાન વિભાગની 29 જૂનની વરસાદની આગાહી
હવામાન વિભાગ પ્રમાણે આગામી પાંચ દિવસ સુધી રાજ્યમાં વરસાદી માહોલ રહેશે. 29 જૂનના રોજ નવસારી, વલસાડ, દમણ અને દાદરા નગર હવેલીમાં ઓરેન્જ એલર્ટ સાથે ભારેથી અતિભારે વરસાદની સંભાવના છે. જ્યારે છોટા ઉદેપુર, નર્મદા, ડાંગ, તાપી, અમરેલી, ભાવનગર, ગીર સોમનાથ, કચ્છ અને દીવમાં યલ્લો એલર્ટ સાથે ભારે વરસાદની સંભાવના છે. આ સિવાય અન્ય જિલ્લમાં પણ વરસાદની સંભાવના છે.
લો પ્રેશર સિસ્ટમ સક્રિય થતા અને અપર એર સાયકલોનિક સર્ક્યુલેશન સિસ્ટમ સક્રિય થતા વરસાદની આગાહી કરાઈ છે. હવામાન વિભાગની આગાહી અનુસાર, રાજ્યમાં 40 કિલોમીટર પ્રતિ કલાકની ઝડપે પવન ફૂંકાવાની સાથે ભારે વરસાદ થવાની સંભાવના છે.
