Gujarat Rain Weather Forecast Update : રાજ્યમાં વરસાદી માહોલ ધીમો પડી રહ્યો હોય તેવો માહોલ હવે જોવા મળી રહ્યો છે. શુક્રવારે 3 ઓક્ટોબરના રોજ સવારના 6.00 થી સાંજના 6.00 વાગ્યા સુધીમાં 25 તાલુકામાં વરસાદ નોંધાયો છે. જેમાં સૌથી વધારે દ્વારકામાં 1.30 ઇંચ વરસાદ વરસ્યો છે.
25 તાલુકામાં વરસાદ
ગુજરાત સ્ટેટ ઈમરજન્સી ઓપરેશન સેન્ટર ગાંધીનગર દ્વારા જાહેર કરાયેલા વરસાદના આંકડા પ્રમાણે 3 ઓક્ટોબર 2025ના રોજ સાંજના 6 વાગ્યા સુધીમાં 25 તાલુકામાં વરસાદ વરસ્યો છે. જેમાં દ્વારકામાં 33 મીમી (1.30 ઇંચ), સાયલામાં 26 મીમી (1.02 ઇંચ), કુકાવાવ વાડીયામાં 21 મીમી, ચોટીલામાં 13 મીમી, ડાંગમાં 9 મીમી, વાગરા, સુત્રાપાડામાં 8 મીમી, જોડીયા, રાણપુરમાં 6 મીમી અને ગોંડલમાં 5 મીમી વરસાદ વરસ્યો છે. આ સિવાય અન્ય 15 તાલુકામાં 1 થી લઇને 4 મીમી સુધી વરસાદ વરસ્યો છે.
હવામાન વિભાગની આગાહી
અરબ સાગરમાં હાલમાં ડીપ ડિપ્રેશન સક્રિય છે. આ ઉપરાંત આગામી 24 કલાકમાં અરબ સાગરની આ સિસ્ટમ વધુ મજબૂત બનીને સિવિયર સાયક્લોનિક સ્ટોર્મમાં પરિવર્તિત થવાની શક્યતા છે. આ સંભવિત વાવાઝોડાના પગલે ગુજરાતના પશ્ચિમ ભાગમાં વરસાદી માહોલ રહેવાની સંભાવના છે. હવામાન વિભાગે સૌરાષ્ટ્ર અને કચ્છ વિસ્તારમાં વીજળીના કડાકા-ભડાકા સાથે વરસાદ વરસવાની આગાહી કરી છે. રાજ્યમાં પવનની ગતિ પણ વધશે.
રાજ્યમાં સિઝનનો 117.18 ટકા વરસાદ
3 ઓક્ટોબર 2025 સુધીમાં રાજ્યમાં સિઝનનો કુલ 117.18 ટકા વરસાદ નોંધાયો છે. જેમાં કચ્છમાં 147.23 ટકા, ઉત્તર ગુજરાતમાં 120.54 ટકા, પૂર્વ મધ્ય ગુજરાતમાં 116.06 ટકા, સૌરાષ્ટ્રમાં 107.56 ટકા અને દક્ષિણ ગુજરાતમાં 122.42 ટકા વરસાદ વરસ્યો છે.
આ પણ વાંચો – જગદીશ વિશ્વકર્મા ગુજરાત ભાજપ પ્રદેશ અધ્યક્ષ પદે બિન હરીફ, શનિવારે પદગ્રહણ સમારોહ
સરદાર સરોવર નર્મદા નિગમ લી. માં 3 ઓક્ટોબરના રોજ સાંજના 4 વાગ્યા સુધીમાં પાણીનો સંગ્રહ 334080 mcft છે. જે કુલ સંગ્રહ ક્ષમતાના 100% જેટલી છે. રાજ્યના અન્ય 206 જળાશયોમાં સંગ્રહ 539922 mmcft છે. જે કુલ સંગ્રહ ક્ષમતાના 96.98% છે. 100 ટકા ભરાયેલ ડેમોની સંખ્યા 127 છે. હાઇ એલર્ટ પર 153 ડેમ અને એલર્ટ પર 13 ડેમ છે.
