Gujarat Rain Weather Forecast Update : ગુજરાતમાં ફરી એક વખત વરસાદનો ધમાકેદાર રાઉન્ડ શરુ થવા જઇ રહ્યો છે. બુધવારને 4 સપ્ટેમ્બરના રોજ સવારના 6.00 થી સાંજના 6.00 વાગ્યા સુધીમાં 25 તાલુકામાં વરસાદ નોંધાયો છે. જેમાં સૌથી વધારે મહીસાગરના કડાણામાં 1.89 ઇંચ વરસાદ વરસ્યો છે.
25 તાલુકામાં વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં બુધવારને 3 સપ્ટેમ્બરના રોજ સવારના 6 થી સાંજના 6 વાગ્યા સુધીમાં 25 તાલુકામાં વરસાદ વરસ્યો છે. એક તાલુકામાં એક ઇંચથી વધારે વરસાદ જોવા મળ્યો છે. જેમાં કડાણામાં 1.89 ઇંચ (48 મીમી), ફતેપુરા 21 મીમી, સંતરામપુર 19 મીમી, સંજેલી 18 મીમી, ખાનપુર, ડાંગ આહવા 15 મીમી, ગરુડેશ્વરમાં 12 મીમી, સીંગવડ, ખેરગામ અને કપરાડામાં 8 મીમી વરસાદ વરસ્યો છે. આ સિવાય અન્ય 15 તાલુકામાં 1 થી લઇને 7 મીમી સુધી વરસાદ વરસ્યો છે.
હવામાન વિભાગની આગાહી
હવામાન વિભાગની આગાહી પ્રમાણે 4 સપ્ટેમ્બરે નર્મદા અને તાપીમાં રેડ એલર્ટની સાથે અતિભારે વરસાદની આગાહી કરવામાં આવી છે. જ્યારે છોટાઉદેપુર, ભરૂચ, નર્મદા, સુરત, નવસારી, વલસાડ, ડાંગમાં ઓરેન્જ એલર્ટ સાથે અતિભારે વરસાદની આગાહી કરવામાં આવી છે. આ સિવાય મહીસાગર, દાહોદ, પંચમહાલ, વડોદરા, આણંદ, ગીર સોમનાથ, અમરેલી અને ભાવનગરમાં યલ્લો એલર્ટ અપાયું છે.
આ પણ વાંચો – 15મી ગુજરાત વિધાનસભાના સાતમાં સત્ર દરમિયાન કુલ 5 વિધેયક રજૂ કરાશે: ઋષિકેશ પટેલ
રાજ્યમાં સિઝનનો કુલ 91.18 ટકા વરસાદ
3 સપ્ટેમ્બર 2025 સુધીમાં રાજ્યમાં સિઝનનો કુલ 91.18 ટકા વરસાદ નોંધાયો છે. જેમાં કચ્છમાં 85.14 ટકા, ઉત્તર ગુજરાતમાં 95.35 ટકા, પૂર્વ મધ્ય ગુજરાતમાં 90.84 ટકા, સૌરાષ્ટ્રમાં 84.56 ટકા અને દક્ષિણ ગુજરાતમાં 95.41 ટકા વરસાદ વરસ્યો છે.
સરદાર સરોવર નર્મદા નિગમ લી. માં 3 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 297554 mcft છે. જે કુલ સંગ્રહ ક્ષમતાના 89.07% જેટલી છે. રાજ્યના અન્ય 206 જળાશયોમાં સંગ્રહ 457029 mmcft છે. જે કુલ સંગ્રહ ક્ષમતાના 81.92% છે. 100 ટકા ભરાયેલ ડેમોની સંખ્યા 82 છે. 112 ડેમ હાઇ એલર્ટ પર અને 28 ડેમ એલર્ટ પર છે.
