Gujarat Rain Weather Forecast Update : ગુજરાતમાં ફરી એક વખત વરસાદનો ધમાકેદાર રાઉન્ડ શરુ થઇ ગયો છે. ગુરુવારને 4 સપ્ટેમ્બરના રોજ સવારના 6.00 થી સાંજના 6.00 વાગ્યા સુધીમાં 142 તાલુકામાં વરસાદ નોંધાયો છે. જેમાં સૌથી વધારે સુરતના ઉમરપાડામાં 5.24 ઇંચ વરસાદ વરસ્યો છે.
142 તાલુકામાં વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં ગુરુવારને 4 સપ્ટેમ્બરના રોજ સવારના 6 થી સાંજના 6 વાગ્યા સુધીમાં 142 તાલુકામાં વરસાદ વરસ્યો છે. 49 તાલુકામાં એક ઇંચથી વધારે વરસાદ જોવા મળ્યો છે. જેમાં ઉમરપાડામાં 5.24 ઇંચ, સોનગઢમાં 3.86 ઇંચ, સિંગવડમાં 3.50 ઇંચ, નેત્રંગમાં 3.43 ઇંચ, ખંભાતમાં 2.99 ઇંચ, ધોલેરા અને સાંજલીમાં 2.95 ઇંચ, અંકલેશ્વર અને ઝઘડીયામાં 2.80 ઇંચ, સુરતના માંડવીમાં 2.52 ઇંચ, ભરુચમાં 2.48 ઇંચ, ઝાલોદ અને માગંરોળમાં 2.44 ઇંચ, ઘોઘામાં 2.20 ઇંચ, હાંસોટમાં 2.17 ઇંચ, કુકરમુંડામાં 2.13 ઇંચ અને દાહોદમાં 2.01 ઇંચ વરસાદ વરસ્યો છે. આ સિવાય અન્ય 124 તાલુકામાં 1 થી લઇને 50 મીમી સુધી વરસાદ વરસ્યો છે.
હવામાન વિભાગની આગાહી
હવામાન વિભાગની આગાહી પ્રમાણે 5 સપ્ટેમ્બરે નવસારી, વલસાડ અને ડાંગ જિલ્લામાં ભારેથી અતિ ભારે વરસાદની ચેતવણી સાથે રેડ એલર્ટ જાહેર કર્યું છે. અમરેલી, બોટાદ, ભાવનગર, છોટા ઉદેપુર, નર્મદા, ભરૂચ, સુરત અને તાપી જિલ્લામાં ભારે વરસાદની ચેતવણી સાથે ઓરેન્જ એલર્ટ જાહેર કરવામાં આવ્યું છે. જ્યારે ગીર સોમનાથ, જૂનાગઢ, રાજકોટ, સુરેન્દ્રનગર, પાટણ, બનાસકાંઠા, સાબરકાંઠા, મહેસાણા, ગાંધીનગર, અમદાવાદ, અરવલ્લી, ખેડા, આણંદ, મહિસાગર, દાહોદ, પંચમહાલ અને વડોદરા જિલ્લાઓમાં યલ્લો એલર્ટની ચેતવણી આપવામાં આવી છે. આ સમય દરમિયાન આ બધા જિલ્લાઓમાં વાવાઝોડા અને વીજળી પડવાની શક્યતા છે.
આ પણ વાંચો – ધોરણ 9 થી 12 વિદ્યાર્થીઓએ હવે સત્ર દીઠ એકમ કસોટી આપવી પડશે, દરેક કસોટીના હશે 25 માર્ક્સ
રાજ્યમાં સિઝનનો કુલ 92.64 ટકા વરસાદ
4 સપ્ટેમ્બર 2025 સુધીમાં રાજ્યમાં સિઝનનો કુલ 92.64 ટકા વરસાદ નોંધાયો છે. જેમાં કચ્છમાં 85.14 ટકા, ઉત્તર ગુજરાતમાં 96.94 ટકા, પૂર્વ મધ્ય ગુજરાતમાં 93.79 ટકા, સૌરાષ્ટ્રમાં 84.74 ટકા અને દક્ષિણ ગુજરાતમાં 96.91 ટકા વરસાદ વરસ્યો છે.
સરદાર સરોવર નર્મદા નિગમ લી. માં 4 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 300509 mcft છે. જે કુલ સંગ્રહ ક્ષમતાના 89.95% જેટલી છે. રાજ્યના અન્ય 206 જળાશયોમાં સંગ્રહ 460682 mmcft છે. જે કુલ સંગ્રહ ક્ષમતાના 82.58% છે. 100 ટકા ભરાયેલ ડેમોની સંખ્યા 82 છે. 114 ડેમ હાઇ એલર્ટ પર અને 25 ડેમ એલર્ટ પર છે.
